RBI: ఆర్బీఐ గుడ్ న్యూస్.. ఇకపై ఆ బ్యాంకుల్లో కూడా హోం లోన్ తీసుకోవచ్చు.. గ్రామీణ ప్రజలకు ఊరట..
సామాన్యులకు ఆర్బీఐ గుడ్ న్యూస్ తెలిపింది. గ్రామీణ సహకార బ్యాంకులు కూడా హోం లోన్లను మంజూరు చేేసే వెసులుబాటు ఆర్బీఐ కల్పించింది. ఈ మేరకు నిబంధనలను సవరించింది. గ్రామీణ సహకార బ్యాంకులు తమ డిపాజిట్లను బట్టి హోం లోన్ మంజూరు చేయవచ్చు.
సామాన్యులకు సొంత ఇల్లు అనేది ఒక కల. ఈ కలను నెరవేర్చుకునేందుకు తమ సంపాదనను కూడబెట్టుకుంటూ ఉంటారు. అవి సరిపోకపోవడంతో బ్యాంకుల నుంచి హోమ్ లోన్లు తీసుకుంటూ ఉంటారు. అయితే హోమ్ లోన్లను రిజర్వ్ బ్యాంక్ ఆఫ్ ఇండియా(RBI) మరింత సులభతరం చేయనుంది. గ్రామీణ సహకార బ్యాంకులు కూడా చాలా పెద్ద మొత్తంలో హోంలోన్లను అందించడానికి వీలు కల్పిస్తూ కొత్త నిబంధనలను తీసుకొచ్చింది. దీంతో ఇక నుంచి గ్రామీణ సహకార బ్యాంకులు కూడా హోం లోన్లను అందించనున్నాయి. గ్రామీణ ప్రాంతాల్లో ఉండే ప్రజలకు ఇది పెద్ద ఊరటగా చెప్పవచ్చు. గృహ రుణాల కోసం ఈ బ్యాంకులపై ఆధారపడే లక్షలాది మంది వినియోగదారులకు ఇది శుభపరిణామంగా చెప్పవచ్చు.
ఎంత లోన్ పొందవచ్చు..?
ప్రతి గ్రామీణ సహకార బ్యాంకు డిపాజిట్ పరిమాణం ఆధారంగా ఆర్బీఐ వేర్వేరు రుణ పరిమితులను ప్రతిపాదించింది. రూ.10 వేల కోట్లకు పైగా డిపాజిట్లు ఉన్న బ్యాంకులు రూ. 3 కోట్ల వరకు ఒక వ్యక్తికి హోం లోన్ అందించవచ్చు. రూ. 1,000 కోట్ల నుండి రూ. 10,000 కోట్ల మధ్య డిపాజిట్లు ఉన్న బ్యాంకులు రూ. 2 కోట్ల వరకు, రూ. 100 కోట్ల నుండి రూ. 1,000 కోట్ల మధ్య డిపాజిట్లు ఉన్న బ్యాంకులు రూ. 1.4 కోట్ల వరకు రుణాలు అందించవచ్చు. రూ.100 కోట్ల కంటే తక్కువ డిపాజిట్లు ఉన్న చిన్న బ్యాంకులు రూ. 60 లక్షల వరకు గృహ రుణాలు అందించవచ్చు. ఈ అధిక పరిమితులు, కుటుంబాలు పలు రుణదాతలను ఆశ్రయించకుండా ఇల్లు కట్టుకోవడానికి లేదా కొనుగోలు చేయడానికి తగినంత నిధులను సమకూర్చుకోవడంలో సహాయపడతాయి.
20 సంవత్సరాల కాల పరిమితి
ఇక రూ. 1,000 కోట్లకు పైగా డిపాజిట్లు ఉన్న గ్రామీణ సహకార బ్యాంకులకు బోర్డు ఆమోదించిన విధానాల ద్వారా రుణ కాలపరిమితిని నిర్ణయించుకునేందుకు అనుమతి ఇవ్వనున్నారు. ఇతర సహకార బ్యాంకులు మారటోరియం కాలంతో సహా గరిష్టంగా 20 సంవత్సరాల వరకు తిరిగి చెల్లించే కాలపరిమితితో గృహ రుణాలను అందించవచ్చు. నిర్మాణంలో ఉన్న ఇళ్లను కొనుగోలు చేసే వినియోగదారులు సాధారణ చెల్లింపులు ప్రారంభించే ముందు 24 నెలల వరకు మారటోరియంను కూడా పొందవచ్చు. ముసాయిదా నిబంధనలు గ్రామీణ సహకార బ్యాంకుల నామమాత్ర సభ్యులకు రుణ అర్హతను కూడా విస్తరిస్తాయి. స్థానిక సహకార చట్టాలు అనుమతిస్తే నామమాత్ర సభ్యులు రుణాలు తీసుకోగలుగుతారు. ఫిక్స్డ్ డిపాజిట్లు, బంగారం లేదా వెండి ఆభరణాలు, జీవిత బీమా పాలసీలు లేదా ప్రభుత్వ సెక్యూరిటీల వంటి పూచీకత్తుపై రుణాలు అందుబాటులో ఉంటాయి. ఇది ఇప్పటికే ఈ బ్యాంకులతో అనుబంధం ఉన్న వినియోగదారులకు అత్యవసర రుణాలు పొందడాన్ని మరింత సులభతరం చేస్తుంది.