AC Tips: ఏసీ విషయంలో అందరూ చేసే తప్పు ఇదే.. వీటిని లైట్ తీసుకుంటే జేబుకు చిల్లే..
ఎండాకాలమంతా ఎడతెరిపి లేకుండా గదిని కూల్‌గా ఉంచిన ఏసీకి వర్షాకాలం, చలికాలంలో కొంత రెస్ట్ దొరుకుతుంది. కానీ సరైన నిర్వహణ లేకుండా ఎక్కువ కాలం ఉపయోగించకపోతే లోపలి భాగాలు దెబ్బతింటాయి. ఈ మండే ఎండల్లో ఏసీ సూపర్ కూలింగ్ ఇవ్వాలన్నా, కరెంట్ బిల్లులు మోత మోగకుండా ఉండాలన్నా ఈ చిన్నపాటి మెయింటెనెన్స్ టిప్స్ తప్పనిసరిగా పాటించాలి. అవేంటో తెలుసుకుందాం..
వర్షాకాలం, చలికాలం రాగానే చాలా ఇళ్లలో ఏసీల వాడకం దాదాపుగా తగ్గిపోతుంది. అయితే ఇప్పుడు ఎండలు మండిపోతుండడంతో మళ్లీ వాటి వాడకం పెరిగిపోతుంది. అయితే చలికాలంలో చాలామంది చేసే పొరపాటు ఏంటంటే.. రిమోట్‌తో ఏసీ ఆఫ్ చేసి నెలల తరబడి దాన్ని పట్టించుకోకుండా వదిలేయడం. ఇలా సరైన సంరక్షణ లేకుండా వదిలేస్తే, వచ్చే ఏసీ ఆన్ చేసినప్పుడు కూలింగ్ రాకపోవడం, కాయిల్ లీకేజీలు, గ్యాస్ సమస్యలు, విద్యుత్ షార్ట్ సర్క్యూట్‌లు వంటి ఖరీదైన రిపేర్లు ఎదురవుతాయి. కొద్దిపాటి శ్రద్ధ, సరైన నిర్వహణ ఉంటే ఏసీ ఆయుష్షు పెరగడమే కాకుండా వేసవిలో మెరుగైన కూలింగ్ లభిస్తుంది.
ఫిల్టర్లను క్షుణ్ణంగా శుభ్రం చేయండి
ఏసీని ఎక్కువ కాలం ఆపి ఉంచే ముందు ఇండోర్ యూనిట్ ఫ్రంట్ ప్యానెల్ తెరిచి ఎయిర్ ఫిల్టర్లను జాగ్రత్తగా బయటకు తీయాలి. సీజన్ మొత్తం వాడటం వల్ల వాటిపై దుమ్ము, ధూళి భారీగా పేరుకుపోతాయి. ఫిల్టర్లను మంచి నీటితో కడిగి, నీడలో పూర్తిగా ఆరనివ్వాలి. తడి ఆరిన తర్వాతే తిరిగి అమర్చాలి. మురికితో కూడిన ఫిల్టర్లను అలాగే వదిలేస్తే లోపలి భాగాలు దెబ్బతినడమే కాకుండా, బ్యాక్టీరియా చేరే అవకాశం ఉంటుంది.
డ్రై మోడ్ లేదా ఫ్యాన్ మోడ్ ఉపయోగించండి
ఫిల్టర్లు క్లీన్ చేసిన తర్వాత ఏసీ లోపల ఎలాంటి తేమ లేకుండా చూసుకోవడం ముఖ్యం. ఏసీని పూర్తిగా ఆఫ్ చేయడానికి ముందు కనీసం 30 నుంచి 45 నిమిషాల పాటు ఫ్యాన్ మోడ్ లేదా డ్రై మోడ్‌లో రన్ చేయాలి. దీనివల్ల కూలింగ్ కాయిల్స్‌పై పేరుకున్న తేమ పూర్తిగా ఆవిరైపోతుంది. తడి అలాగే ఉంటే చలికాలంలో లోపల బూజు పట్టి, వచ్చే సీజన్‌లో ఆన్ చేసినప్పుడు తీవ్రమైన దుర్వాసన వస్తుంది.
మెయిన్ స్విచ్ ఆఫ్ చేసి ప్లగ్ తొలగించండి..
చాలామంది కేవలం రిమోట్‌తో మాత్రమే ఏసీని ఆఫ్ చేస్తుంటారు. కానీ మెయిన్ స్విచ్ ఆన్‌లో ఉంటే స్టాండ్‌బై పవర్ ఖర్చవుతూనే ఉంటుంది. అంతేకాకుండా చలికాలంలో వోల్టేజ్ హెచ్చుతగ్గులు లేదా మెరుపుల వల్ల పీసీబీ సర్క్యూట్ బోర్డు దెబ్బతినే ప్రమాదం ఉంది. అందుకే మెయిన్ పవర్ స్విచ్‌ను ఆఫ్ చేసి, వీలైతే ప్లగ్‌ను సాకెట్ నుండి తీసివేయాలి. అదేవిధంగా రిమోట్ కంట్రోలర్‌లో ఎక్కువ కాలం బ్యాటరీలు అలాగే ఉంటే అవి లీకై రిమోట్ పాడయ్యే ప్రమాదం ఉంది కాబట్టి బ్యాటరీలను తీసి భద్రపరచాలి.
అవుట్‌డోర్ యూనిట్ రక్షణ.. గాలి ప్రసరణ ముఖ్యం
స్ప్లిట్ ఏసీలోని అవుట్‌డోర్ యూనిట్ ఎండ, వాన, దుమ్ముకు గురవుతుంది. చలికాలంలో దానిపై రాలిన ఎండుటాకులు, చెత్తాచెదారం పేరుకుపోతాయి. అవుట్‌డోర్ యూనిట్ చుట్టూ ఉన్న ప్రదేశాన్ని శుభ్రం చేయాలి. యూనిట్‌ను కప్పేందుకు ప్లాస్టిక్ కవర్లను వాడకూడదు. ప్లాస్టిక్ వల్ల లోపల తేమ నిలిచిపోయి తుప్పు పడుతుంది. గాలి ఆడేలా ఉండే ప్రత్యేక ఏసీ కవర్లను మాత్రమే ఉపయోగించాలి. అలాగే అవుట్‌డోర్ యూనిట్‌పై బరువైన వస్తువులు లేదా పూలకుండీలు పెట్టడం మానుకోవాలి.
పైపులు, డ్రైనేజీ లీకేజీల తనిఖీ
ఏసీని లాంగ్ గ్యాప్‌లో ఉంచే ముందు కాపర్ పైపులపై ఉండే ఇన్సులేషన్ కవర్ పాడైందేమో చూడాలి. పక్షులు లేదా ఎలుకలు వైరింగ్‌ను, డ్రెయిన్ పైపులను కొరికేసే ప్రమాదం ఉంటుంది. ఏవైనా వైర్లు తెగిపోయినా, వాటర్ డ్రైనేజీ పైపుల్లో బ్లాక్‌లు ఉన్నా వెంటనే గుర్తించి సరిచేసుకోవాలి.
వచ్చే వేసవికి ముందు మాస్టర్ సర్వీసింగ్
కొన్ని నెలల విశ్రాంతి తర్వాత వేసవి ప్రారంభంలో ఏసీని ఒక్కసారిగా నేరుగా ఆన్ చేయకూడదు. సీజన్ మొదలయ్యే ముందే నైపుణ్యం కలిగిన టెక్నీషియన్‌తో ప్రీ సీజన్ సర్వీసింగ్ చేయించాలి. కాయిల్స్ కండిషన్, గ్యాస్ ప్రెజర్, వైరింగ్, కెపాసిటర్ వంటి ముఖ్యమైన భాగాలను క్షుణ్ణంగా తనిఖీ చేయించిన తర్వాతే ఏసీని వాడటం మొదలుపెట్టాలి. ఈ చిన్నపాటి జాగ్రత్తలు పాటిస్తే మీ ఏసీ విద్యుత్ బిల్లును తక్కువ చేయడంతో పాటు మండు వేసవిలో సూపర్ కూలింగ్ ఇస్తుంది.