Andhra: ఏపీలో వేసవి సెలవుల పొడిగింపుపై స్పష్టత ఇచ్చిన విద్యాశాఖ
ఏపీలో వేసవి సెలవుల పొడిగింపుపై సోషల్ మీడియాలో జరుగుతున్న ప్రచారానికి విద్యాశాఖ చెక్ పెట్టింది. ముందుగా ప్రకటించిన షెడ్యూల్ ప్రకారమే జూన్ 12 నుంచి రాష్ట్రంలోని అన్ని ప్రభుత్వ, ప్రైవేట్ పాఠశాలలు ప్రారంభమవుతాయని స్పష్టం చేసింది. పూర్తి వివరాలు కథనం లోపల ..
ఆంధ్రప్రదేశ్లో పాఠశాలల పునఃప్రారంభ తేదీపై సామాజిక మాధ్యమాల్లో జరుగుతున్న ప్రచారానికి విద్యాశాఖ అధికారులు చెక్ పెట్టారు. వేసవి సెలవులను పొడిగిస్తున్నారంటూ వస్తున్న వార్తల్లో ఎలాంటి నిజం లేదని స్పష్టం చేశారు. విద్యా క్యాలెండర్లో ముందుగా ప్రకటించిన షెడ్యూల్ ప్రకారమే రాష్ట్రంలోని అన్ని ప్రభుత్వ, ప్రైవేట్ పాఠశాలలు జూన్ 12, 2026 (శుక్రవారం) నుంచి యథావిధిగా పునఃప్రారంభం కానున్నట్లు వెల్లడించారు. పాఠశాలల ప్రారంభ తేదీలో ఎలాంటి మార్పులు లేవని, విద్యార్థులు, తల్లిదండ్రులు గందరగోళానికి గురి అవ్వాల్సిన అవసరం లేదని పేర్కొన్నారు.
ఇటీవల తెలంగాణలో పాఠశాలల ప్రారంభ తేదీ మార్పు నేపథ్యంలో ఆంధ్రప్రదేశ్లో కూడా సెలవులు పొడిగిస్తారనే ప్రచారం సోషల్ మీడియాలో విస్తృతంగా సాగుతోంది. అయితే తెలంగాణలో జూన్ 13 రెండో శనివారం, జూన్ 14 ఆదివారం కావడంతో అక్కడి ప్రభుత్వం పాఠశాలల ప్రారంభాన్ని జూన్ 15కు వాయిదా వేసింది. కానీ ఆంధ్రప్రదేశ్లో మాత్రం అలాంటి నిర్ణయం ఏదీ తీసుకోలేదని అధికారులు స్పష్టం చేశారు. ముందుగా ప్రకటించిన విధంగానే జూన్ 12 నుంచే తరగతులు ప్రారంభమవుతాయని తెలిపారు.
సామాజిక మాధ్యమాల్లో వస్తున్న అసత్య ప్రచారాలను నమ్మవద్దని, అధికారిక ప్రకటనలను మాత్రమే పరిగణనలోకి తీసుకోవాలని విద్యాశాఖ విద్యార్థులు, తల్లిదండ్రులు, ఉపాధ్యాయులకు సూచించింది. సో.. పిల్లలూ ఇక బ్యాగులు తగిలించుకునేందుకు రెడీ అవ్వొచ్చు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..