చంద్రబాబుపై ఏపీ పోలీస్ సంఘం ఫైర్.. ఘాటు సమాధానం

పోలీసులను బెదిరించడం టీడీపీ నేతలకు పరిపాటిగా మారిందని ఏపీ పోలీస్ అధికారుల సంఘం ఆగ్రహం వ్యక్తం చేసింది. పోలీసులను ఉద్దేశించి ఏపీ ప్రతిపక్షనేత చంద్రబాబు, ఎమ్మెల్సీ నారా లోకేష్‌లు చేసిన వ్యాఖ్యలను ఖండించిన పోలీస్ సంఘం రాష్ట్రాధ్యక్షుడు జనుకుల శ్రీనివాసరావు.. బెదిరింపులు మానుకోవాలని హితవు పలికారు. అయితే గురువారం విశాఖ పర్యటనకు వెళ్లిన చంద్రబాబును అక్కడి వైసీపీ కార్యకర్తలు అడ్డుకున్నారు. చంద్రబాబు గో బ్యాక్ అంటూ నినాదాలు చేశారు. ఈ క్రమంలో వారి తీరును నిరసిస్తూ చంద్రబాబు రోడ్డుపై బైఠాయించారు. అదే సమయంలో భద్రత దృష్ట్యా చంద్రబాబు తిరిగి వెళ్లాలని పోలీసులు కోరారు. అయితే పోలీసుల తీరుపై చంద్రబాబు ఆగ్రహం వ్యక్తం చేశారు. విశాఖ ఎయిర్‌పోర్ట్‌లో పోలీసులు గాడిదలు కాస్తున్నారా..? అంటూ మండిపడ్డారు.

ఈ వ్యాఖ్యలను ఖండించిన జనకుల శ్రీనివాసరావు.. పోలీసులు కాస్తున్నది శాంతి భద్రతలను.. గాడిదలను కాదని పేర్కొన్నారు. చంద్రబాబు భద్రత కోసమే పోలీసులు చట్టపరమైన చర్యలు చేపట్టారని అన్నారు. అయినా పోలీసులను బెదిరించడం టీడీపీ నేతలకు పరిపాటిగా మారిందని.. పోలీసులపై చేసిన వ్యాఖ్యలను చంద్రబాబు, లోకేష్ ఉపసంహరించుకోవాలని డిమాండ్ చేశారు. పోలీసులను బెదిరించడం మానుకోవాలి.