Fact Check: బొత్స కరెంట్ బిల్లులపై నెట్టింట్లో వైరలవుతోన్న ట్వీట్‌.. వివరణ ఇచ్చిన సీఎండీ..
ఏపీలో విద్యుత్ సరఫరా, నీళ్లు లేవని, రహదారులు అధ్వానంగా ఉన్నాయంటూ తెలంగాణ మంత్రి కేటీఆర్ (KTR) చేసిన వ్యాఖ్యలు రెండు రాష్ట్రాల్లో పెద్ద దుమారాన్నే లేపాయి
ఏపీలో విద్యుత్ సరఫరా, నీళ్లు లేవని, రహదారులు అధ్వానంగా ఉన్నాయంటూ తెలంగాణ మంత్రి కేటీఆర్ (KTR) చేసిన వ్యాఖ్యలు రెండు రాష్ట్రాల్లో పెద్ద దుమారాన్నే లేపాయి. వీటిపై ఇరు రాష్ట్రాల మంత్రుల కౌంటర్లతో రాజకీయ వాతావరణం వేడెక్కింది. కాగా కేటీఆర్ వ్యాఖ్యలను ఏపీ విద్యా శాఖమంత్రి బొత్స సత్యనారాయణ (Botsa Satyanarayana) కూడా ఖండించారు. హైదరాబాద్‌లో కూడా విద్యుత్ కోతలు ఉన్నాయని.. తాము జనరేటర్లు వేసుకుని ఉన్నామంటూ మంత్రి పేర్కొన్నారు. ఇక వీటికి కౌంటర్‌గా టీఆర్‌ఎస్‌ ఎంపీ రంజిత్‌ రెడ్డి బొత్స హైదరాబాద్‌లో కరెంట్ బిల్లు కట్టలేదేమో.. అందుకే కట్ చేసి ఉంటారని ఎద్దేవా చేశారు. ఈక్రమంలోనే నిన్నటి నుంచి బొత్సకు సంబంధించిన ఒక వార్త సామాజిక మాధ్యమాల్లో బాగా హల్‌చల్‌ చేస్తోంది. ఏపీ మంత్రి హైదరాబాద్‌లోని తన నివాసానికి 15 నెలలుగా కరెంటు బిల్లులు చెల్లించలేదని, అందుకే విద్యుత్ సరఫరా నిలిపివేసినట్లు దక్షిణ తెలంగాణ విద్యుత్ పంపిణీ సంస్థ( TSSPDCL) తన ట్విట్టర్ ఖాతాలో పేర్కొన్నట్టుగా చెప్పే పోస్ట్‌ ఒకటి నెట్టింట్లో చక్కర్లు కొడుతోంది.
వారిపై కఠిన చర్యలు..
తాజాగా ఈ ట్వీట్‌పై డిస్కం సీఎండీ రఘుమారెడ్డి స్పందించారు. బొత్సకు సంబంధించి సామాజిక మాధ్యమాల్లో చక్కర్లు కొడుతున్న ట్వీట్‌ బోగస్‌ అని ఆయన ఒక ప్రకటనలో తెలిపారు. మంత్రికి సంబంధించిన ఎలాంటి సమాచారాన్ని విద్యుత్ పంపిణీ సంస్థ తన అధికారిక ట్విటర్‌ ఖాతాలో షేర్‌ చేయలేదని సీఎండీ స్పష్టం చేశారు. తమ సంస్థ పేరు మీద ఇలాంటి తప్పుడు సమాచారాన్ని వ్యాప్తి చేసేవారిపై చట్ట ప్రకారం కఠిన చర్యలు తీసుకుంటామని రఘురామిరెడ్డి హెచ్చరించారు.
మరిన్ని తెలంగాణ వార్తల కోసం క్లిక్ చేయండి..