Telangana : కరవు దెబ్బకు కుదేలైన పశుపోషణ.. మేత లేక సగం ధరకే అమ్మేసుకుంటున్న రైతులు!

ఎల్‌నీనో.. ఈ మాయదారి ప్రభావం కేవలం పంటలకే పరిమితం కావడం లేదు.. వ్యవసాయానికి వెన్నుదన్నుగా నిలిచే పశుపోషణనూ సంక్షోభంలోకి నెడుతోంది. వర్షాభావ పరిస్థితులు, తీవ్రమవుతున్న మేత, నీటి కొరతతో ఎన్నో ఏళ్లుగా కుటుంబ సభ్యుల్లా పెంచుకున్న మూగజీవాలను అన్నదాతలు అమ్ముకుంటున్నారు. పోషించే స్థోమత లేక లక్షల రూపాయల విలువైన పశువులను సైతం సగం ధరకే విక్రయిస్తూ కన్నీటి పర్యంతమవుతున్నారు. ఈ దుస్థితి నుంచి బయటపడేందుకు పశుగ్రాస కేంద్రాలు ఏర్పాటు చేయడంతో పాటు ఆర్థిక సాయం అందించాలని ప్రభుత్వాన్ని వేడుకుంటున్నారు.

Telangana : కరవు దెబ్బకు కుదేలైన పశుపోషణ.. మేత లేక సగం ధరకే అమ్మేసుకుంటున్న రైతులు!
Cattle Sales Soar In Narayankhed Due To Drought

Edited By:

Updated on: Nov 20, 2026 | 9:29 PM

నారాయణఖేడ్ సంతకు పశువుల రాక ఒక్కసారిగా పెరిగింది. కొనుగోళ్ల కోసం వచ్చే వ్యాపారుల కంటే తమ పశువులను విక్రయించేందుకు వస్తున్న రైతులే ఎక్కువగా కనిపిస్తున్నారు. మేతకు డబ్బుల్లేక, నీటిని అందించలేక అన్నదాతలు తమకు ఎంతోకాలంగా అండగా ఉన్న మూగజీవాలను వదులుకుంటున్నారు. ఒకప్పుడు లక్ష రూపాయలకు పైగా ధర పలికే కోడెల జతను ఇప్పుడు రూ.50 వేలకే అమ్ముకోవాల్సి వస్తోంది. పశువులను అమ్ముకోవడం ఇష్టం లేకపోయినా.. పోషించలేని పరిస్థితి రైతులను ఈ నిర్ణయం తీసుకునేలా చేస్తోంది.

వ్యవసాయంలో నష్టాలు ఎదుర్కొంటున్న రైతులకు పశుపోషణ మరో ఆదాయ వనరుగా ఉండేది. పాలు, పశువుల సంతానం ద్వారా కొంత ఆదాయం సమకూరడంతో పాటు వ్యవసాయానికి అవసరమైన సేంద్రియ ఎరువు కూడా లభించేది. కానీ వాతావరణ పరిస్థితులు ఈ సమీకరణాన్ని మార్చేశాయి. ఎల్‌నినో ప్రభావంతో ఏర్పడిన వర్షాభావ పరిస్థితులు పంటల సాగును దెబ్బతీయడంతో పాటు పశువుల మనుగడను ప్రశ్నార్థకం చేస్తున్నాయి. వరి సాగు తగ్గడంతో పశువులకు ప్రధాన ఆహారమైన వరిగడ్డి కొరత ఏర్పడింది. పొలాల్లో పచ్చిక లేకపోవడం, చెరువులు, వాగులు ఎండిపోవడంతో మేత, నీటి కోసం రైతులు ఇబ్బందులు పడుతున్నారు.

సంగారెడ్డి జిల్లాలోని నారాయణఖేడ్ వారాంతపు సంత ఈ సంక్షోభానికి ప్రత్యక్ష ఉదాహరణగా మారింది. ప్రతి మంగళవారం జరిగే ఈ సంతకు తెలంగాణతోపాటు మహారాష్ట్ర, కర్ణాటక ప్రాంతాల నుంచి కూడా రైతులు, వ్యాపారులు వస్తుంటారు. సాధారణంగా ఇక్కడికి సుమారు 2 వేల పశువులు రాగా.. ప్రస్తుతం ఆ సంఖ్య 5 వేలకు చేరింది. నారాయణఖేడ్, మానూర్, నాగలిగిద్ద, కంగ్టి, సిర్గాపూర్, కల్హేర్, నిజాంపేట్, పెద్ద శంకరంపేట్ మండలాల నుంచి రైతులు పశువులను విక్రయానికి తీసుకొస్తున్నారు. ఎద్దులు, గేదెలతోపాటు గొర్రెలు, మేకల అమ్మకాలు కూడా పెరిగాయి.

పశువులను అమ్మేందుకు రైతులు తొందరపడుతుండటంతో కొనుగోలుదారులు తమకు అనుకూలమైన ధరలకే బేరాలు సాగిస్తున్నారని అన్నదాతలు వాపోతున్నారు. లక్ష రూపాయలకు పైగా విలువ చేసే కోడెల జతను సైతం రూ.50 వేలకే విక్రయించాల్సి వస్తోంది. మహారాష్ట్ర, కర్ణాటక నుంచి వచ్చే వ్యాపారులు తక్కువ ధరలకు పశువులను కొనుగోలు చేస్తున్నారు. మేత కొనుగోలు చేసే స్థోమత లేక, ఉన్న పశువులను పోషించలేక రైతులు అడిగిన ధరకు అమ్ముకోవాల్సిన పరిస్థితి నెలకొంది.

పశువులను సంతకు తీసుకొచ్చే రైతుల వెనుక ఎన్నో ఏళ్ల అనుబంధం ఉంది. వ్యవసాయ పనుల్లో తమతో పాటు శ్రమించిన ఎద్దులను అమ్ముకోవాల్సి రావడం వారిని మానసికంగా కుంగదీస్తోంది. ఇంకా పదేళ్లపాటు పనిచేయగల సామర్థ్యం ఉన్న కాడెద్దులను కూడా విక్రయిస్తున్నారు. ఆకలితో అలమటిస్తూ కళ్ల ముందే చనిపోవడం చూడలేక.. వచ్చిన ధరకు అమ్ముకుంటున్నామని రైతులు ఆవేదన వ్యక్తం చేస్తున్నారు. పశువులను కొనుగోలు చేసేవారు ముందుకు రాకపోయినా, వాటిని ఇంటికి తీసుకెళ్లి పోషించే పరిస్థితి లేకపోవడంతో తప్పనిసరిగా అమ్మకానికి పెడుతున్నారు.

పశువుల విక్రయాలు ఇలాగే కొనసాగితే గ్రామీణ ప్రాంతాల్లో పశుసంపద బాగా తగ్గిపోయే ప్రమాదం ఉందని రైతులు ఆందోళన చెందుతున్నారు. పశువులు తగ్గితే వ్యవసాయానికి అవసరమైన సేంద్రియ ఎరువుల లభ్యతపైనా ప్రభావం పడుతుంది. ఈ నేపథ్యంలో కరవు ప్రభావిత ప్రాంతాల్లో పశుగ్రాస కేంద్రాలు ఏర్పాటు చేయాలని, రైతులకు సబ్సిడీపై ఎండుగడ్డి అందించాలని కోరుతున్నారు. పశువుల తాగునీటి కోసం ప్రత్యేక ఏర్పాట్లు చేయడంతోపాటు పశుపోషకులకు ఆర్థికంగా అండగా నిలవాలని ప్రభుత్వాన్ని విజ్ఞప్తి చేస్తున్నారు. పంటలను కాపాడటంతోపాటు పశుసంపదను సంరక్షించేందుకు కూడా ప్రభుత్వం ప్రత్యేక చర్యలు చేపట్టాలని అన్నదాతలు కోరుతున్నారు.

మరిన్ని తెలంగాణ వార్తల కోసం ఇక్కడ క్లిక్ చేయండి.

Loading...
Unable to load recommendations.
Follow Us