తెలంగాణ ప్రజలకు గుడ్‌ న్యూస్‌.. ప్రభుత్వాసుపత్రిలో ఈసీజీ, 2డీతో పాటు మరెన్నో పరీక్షలు. పూర్తి ఉచితంగా..

Telangana Diagnostics

ప్రజలకు తెలంగాణ ప్రభుత్వం శుభవార్త తెలిపింది. వేలల్లో ఖర్చయ్యే వైద్య పరీక్షలను ఉచితంగా అందిస్తోంది. టీ డయాగ్నొస్టిక్‌ పేరుతో తెలంగాణ ప్రభుత్వం ఇప్పటికే ప్రభుత్వాసుపత్రుల్లో పలు పరీక్షలను ఉచితంగా నిర్వహించుకునే అవకాశం కల్పించిన విషయం తెలిసిందే. తాజాగా ఈ సేవలను రాష్ట్ర వ్యాప్తంగా విస్తరించారు. ఈ విషయాన్ని మంత్రి కేటీఆర్‌ ట్విట్టర్‌ వేదికగా అధికారికంగా ప్రకటించారు. ప్రస్తుతం అందుబాటులో ఉన్న పరీక్షలకు అదనంగా మరికొన్నింటిని జోడించినట్లు మంత్రి తెలిపారు. పేదలకు వైద్య పరీక్షలు భారం కాకూడదనే ఉద్దేశంతోనే తెలంగాణ డయాగ్నొస్టిక్‌ సేవలు అందిస్తున్నట్లు మంత్రి పేర్కొన్నారు.

2018లో హైదరాబాద్‌లో టీ డయాగ్నస్టిక్‌ సేవలు ప్రారంభించామని, ఇప్పుడు ఈ సేవలను రాష్ట్ర వ్యాప్తంగా విస్తరించామని మంత్రి తెలిపారు. ప్రాథమిక ఆరోగ్య కేంద్రం, బస్తీ దవాఖాలల్లోనూ ఈ సేవలను అందిస్తున్న మంత్రి తెలిపారు. పాతలాజికల్‌ సేవల్లో భాగంగా రక్త పరీక్షలు, మూత్ర పరీక్షలు, ఇమేజింగ్‌ సేవల్లో భాగంగా ఎక్స్‌ రే, యూఎస్‌జీ, ఈసీజీ, 2డీ, ఎకో, మెమోగ్రామ్‌ అందిస్తున్నట్లు మంత్రి వివరించారు.

ఇక టీ డయాగ్నస్టిక్‌ సేవలు అందుబాటులోకి వచ్చినప్పటి నుంచి ఇప్పటి వరకు 57.68లక్షల మంది పరీక్షలు చేయించుకున్నట్లు మంత్రి తెలిపారు. దీని ద్వారా ప్రజలకు రూ. 10.40 కోట్ల భారం తగ్గిందని మంత్రి వివరించారు. ఈ సెంటర్స్‌లో చేసే పరీక్షలను 134కి పెంచినట్లు మంత్రి పేర్కొన్నారు. టీ డయాగ్నస్టిక్‌ సేవలను నీతి ఆయోగ్‌ సైతం ప్రశంసించిందని మంత్రి తెలిపారు. ఈ సేవలను విజయంతంగా నడిపించడంలో కృషి చేస్తున్న మంత్రి హరీష్‌ రావుతో పాటు వారి బందానిన్ని కేటీఆర్‌ అభినందిస్తూ ట్వీట్ చేశారు.

మరిన్ని తెలంగాణ వార్తల కోసం క్లిక్ చేయండి..