HSPA : స్కూల్స్ రీ ఓపెన్ చేయాలని తెలంగాణ ప్రభుత్వం తీసుకున్న నిర్ణయంపై హెచ్ఎస్పీఏ ఏమన్నదంటే..!
జూలై 1వ తేదీ నుంచి తెలంగాణలో అన్ని స్కూల్స్ రీ ఓపెన్ చేయాలని ఇవాళ్టి కేబినెట్ భేటీలో ప్రభుత్వం నిర్ణయం తీసుకున్న నేపథ్యంలో HSPA తన అభిప్రాయం
Schools Reopen in Telangana : జూలై 1వ తేదీ నుంచి తెలంగాణలో అన్ని స్కూల్స్ రీ ఓపెన్ చేయాలని ఇవాళ్టి కేబినెట్ భేటీలో ప్రభుత్వం నిర్ణయం తీసుకున్న నేపథ్యంలో HSPA తన అభిప్రాయం వెల్లడించింది. కరోనా కేసులు పూర్తిగా అదుపులోకి వచ్చిన ఈ పరిస్థితుల్లో తెలంగాణలో లాక్ డౌన్ ఎత్తివేయడం మంచి పరిణామమే అయినప్పటికీ, జూలై ఫస్ట్ నుంచి భౌతిక తరగతులను నిర్వహించాలని ప్రభుత్వం తీసుకునే నిర్ణయాన్ని హైదరాబాద్ స్కూల్ పేరెంట్స్ అసోసియేషన్ పూర్తిగా వ్యతిరేకిస్తుందని పేర్కొంది. “థర్డ్ వేవ్‌ ఆరు నుంచి ఎనిమిది వారాల్లో ప్రభావం చూపిస్తుందని వైద్యరంగ నిపుణులు హెచ్చరిస్తున్నారు.. ఈ పరిస్థితుల్లో భౌతిక తరగతులను నిర్వహించడం ఎంత మాత్రం మంచిది కాదని.. ఈ నిర్ణయాన్ని పునఃసమీక్షించాలని HSPA ప్రభుత్వానికి విజ్ఞప్తి చేస్తుంది.” అని ఒక ప్రకటన విడుదల చేసింది.
ఇప్పుడున్న పరిస్థితుల్లో ప్రైవేట్ స్కూల్స్ లో కానీ, ప్రభుత్వ పాఠశాలలో కానీ భౌతిక దూరాన్ని పాటించటం , శానిటేషన్ చేసుకోవడం, మాస్క్ ధరించడం వంటి నియమాలను పాటించటం సాధ్యం కాదు.. అందువల్ల భౌతిక తరగతులు నిర్వహించడానికి ప్రభుత్వం మరికొంత సమయాన్ని తీసుకుని పరిస్థితులను ఎప్పటికప్పుడు అంచనా వేస్తూ స్కూల్స్ రీ ఓపెన్ పై ఒక డిసిషన్ తీసుకోవాలని హెచ్ఎస్పీఏ ప్రతినిధి వెంకట్ సాయినాథ్ ఒక ప్రకటన విడుదల చేశారు.
పాఠశాలలు తెరిచే విషయమై ప్రభుత్వం తీసుకునే నిర్ణయానికి ముందు పేరెంట్స్ కమిటీలతో చర్చించాలని ఆయన ప్రభుత్వాన్ని కోరారు. తల్లిదండ్రులకు ఉన్నటువంటి భయాలను నివృత్తి చేయడానికి ప్రభుత్వం ప్రయత్నం చేయాలని హెచ్ఎస్పీఏ కోరుకుంటుందని సదరు ప్రకటనలో పేర్కొన్నారు.