చితిపై పెట్టే చివరి క్షణాల్లో ఆమె నాడి కొట్టుకుంటున్నట్లు అనిపించింది.. ఆస్పత్రికి తీసుకెళ్లగా..
కరీంనగర్ జిల్లా హుజూరాబాద్‌లో సరిత అనే మహిళ మరణించినట్లు ప్రకటించారు. అంత్యక్రియలకు సిద్ధమవుతున్న సమయంలో, ఆమె నాడి కొట్టుకుంటున్నట్లు గుర్తించడంతో ఆసుపత్రికి తరలించారు. అయితే, వైద్యులు మరోసారి పరీక్షించి ఆమె మృతి చెందినట్లు ధ్రువీకరించారు. పూర్తి వివరాలు కథనం లోపల ...
కరీంనగర్ జిల్లా హుజూరాబాద్‌లో ఒక హృదయ విదారక ఘటన చోటుచేసుకుంది. ఏకలవ్య కాలనీకి చెందిన సరిత అనే మహిళ అనారోగ్య కారణాలతో మరణించినట్లు కుటుంబ సభ్యులు తెలిపారు. ఆమె మృతితో విషాదంలో మునిగిపోయిన కుటుంబం అంత్యక్రియలకు సన్నాహాలు ప్రారంభించింది. సరిత అంతిమయాత్రకు సిద్ధమై, చితిపై పెట్టే చివరి క్షణాల్లో, అక్కడే ఉన్న ఓ బంధువుకు ఆమె నాడి కొట్టుకుంటున్నట్లు అనిపించింది. ఈ అనూహ్య పరిణామంతో అప్పటివరకు దుఃఖసాగరంలో మునిగిన కుటుంబ సభ్యుల్లో ఒక్కసారిగా ఆశ చిగురించింది. తమ మనిషి ఇంకా బతికే ఉందేమోనన్న ఆరాటంతో, క్షణం కూడా ఆలస్యం చేయకుండా కన్నీళ్లు పెట్టుకుంటూ వెంటనే అంబులెన్స్ లో ఆసుపత్రికి తరలించారు.
ఆశతో నిండిన హృదయాలతో వైద్యులు తమ ప్రియమైన వారిని కాపాడతారని ఆశించారు. అయితే, ఆసుపత్రిలో వైద్యులు మరోసారి సరితను పరీక్షించి, ఆమె అప్పటికే మరణించినట్లు ధ్రువీకరించారు. చివరి క్షణం వరకు ఆశతో, ఆరాటంతో ఎదురుచూసిన కుటుంబ సభ్యుల వేదన, ఆ క్షణంలో అక్కడున్న వారందరినీ కలిచివేసింది. ఈ ఘటన స్థానికంగా తీవ్ర విషాదాన్ని నింపింది.