వెన్యూ, క్రెటా మధ్యలో మరో SUV..! CNG, AI ఫీచర్లతో మతిపోగొట్టేస్తున్న Bayon డిజైన్
భారత SUV మార్కెట్లో పోటీ మరింత పెరగనుంది. ప్రముఖ కార్ల తయారీ సంస్థ Hyundai Motor India నుంచి కొత్త Hyundai Bayon SUV రానున్నట్లు సమాచారం. ఆకర్షణీయమైన డిజైన్, పెద్ద డిస్‌ప్లేలు, AI వాయిస్ అసిస్టెంట్‌, పెట్రోల్‌తో పాటు CNG ఆప్షన్‌ ఈ కారుపై ఆసక్తిని పెంచుతున్నాయి. బుకింగ్‌ మొత్తం, ఇంజన్‌ వివరాలు, ఫీచర్లు ఎలా ఉన్నాయంటే..
కొత్త కారు కొనాలనుకునే వారికి Hyundai నుంచి మరో SUV అందుబాటులోకి రానున్నట్లు ప్రచారం జరుగుతోంది. Hyundai Bayon పేరుతో వస్తున్న ఈ మోడల్‌లో ఆధునిక టెక్నాలజీ, ప్రీమియం ఇంటీరియర్‌, కనెక్టెడ్ కార్ ఫీచర్లకు ప్రాధాన్యత ఇచ్చినట్లు తెలుస్తోంది. అక్టోబర్ 26న విడుదల కానుందని చెబుతున్న ఈ SUV గురించి మరిన్ని వివరాలు తెలుసుకుందాం.
‘ఆర్ట్ ఆఫ్ స్టీల్’ డిజైన్‌తో ఆకట్టుకునే లుక్‌
Hyundai Bayon SUVని కంపెనీ కొత్త డిజైన్ లాంగ్వేజ్‌తో రూపొందించింది. ముందు భాగంలో స్ప్లిట్ హెడ్‌ల్యాంప్ సెటప్‌, బోనెట్ అంచున H ఆకారంలో కనిపించే LED DRLలు ప్రత్యేక ఆకర్షణగా నిలుస్తాయి. బ్లాక్‌, సిల్వర్ క్లాడింగ్‌తో కూడిన బంపర్‌, ఫ్లేర్డ్ వీల్ ఆర్చ్‌లు, స్టైలిష్ అల్లాయ్ వీల్స్‌ స్పోర్టీ లుక్‌ను అందిస్తాయి. వెనుకవైపు సన్నని టెయిల్‌ల్యాంప్ డిజైన్, రూఫ్ స్పాయిలర్‌, డ్యూయల్ టోన్ బంపర్‌ ఉన్నాయి.
ఇంటీరియర్‌లో టెక్నాలజీకి పెద్దపీట వేశారు. ఇందులో 12.3 అంగుళాల రెండు కర్వ్డ్ డిస్‌ప్లేలు ఉన్నాయి. ఒకటి ఇన్ఫోటైన్‌మెంట్ కోసం, మరొకటి డిజిటల్ ఇన్‌స్ట్రుమెంట్ క్లస్టర్‌గా పనిచేస్తుంది. జనరేటివ్ AI వాయిస్ అసిస్టెంట్‌, NVIDIA ఆధారిత కనెక్టెడ్ కార్ నావిగేషన్‌, ఓవర్-ది-ఎయిర్ (OTA) సాఫ్ట్‌వేర్ అప్‌డేట్స్‌, 70కి పైగా Hyundai Bluelink కనెక్టెడ్ ఫీచర్లు ఇందులో ఉన్నాయి. ఇంగ్లిష్‌, హిందీతో పాటు తెలుగు సహా పలు భాషల్లో వాయిస్ కమాండ్స్‌ ద్వారా కొన్ని ఫంక్షన్లను నియంత్రించవచ్చు.
1.5 లీటర్ పెట్రోల్ ఇంజన్‌..
Hyundai Bayonలో 1.5 లీటర్, నాలుగు సిలిండర్ల MPi పెట్రోల్ ఇంజన్‌ అందించనున్నారు. ఇది 115 PS పవర్‌, 144 Nm టార్క్‌ను ఉత్పత్తి చేస్తుంది. 6-స్పీడ్ మాన్యువల్‌, IVT ఆటోమేటిక్ గేర్‌బాక్స్‌ ఆప్షన్లు ఉంటాయి. బుకింగ్స్ ఇప్పటికే ప్రారంభమయ్యాయి. ఆసక్తి ఉన్నవారు రూ.11,000 టోకెన్ అమౌంట్‌తో Hyundai అధికారిక వెబ్‌సైట్‌లో బుక్ చేసుకోవచ్చు. 2026 అక్టోబర్ 26న అధికారికంగా విడుదల కానుండగా, పండుగ సీజన్‌లో డెలివరీలు ప్రారంభమయ్యే అవకాశం ఉంది.