Video: భారత హాకీ జట్టుకు ఘన స్వాగతం.. అడుగుపెట్టగానే మోగిన డప్పుల మోత.. వైరల్ వీడియో

India Hockey Team

India Hockey Team: పారిస్ ఒలింపిక్స్‌లో కాంస్య పతకాన్ని సాధించి స్వదేశానికి చేరుకున్న భారత హాకీ జట్టుకు ఘన స్వాగతం లభించింది. పారిస్ నుంచి న్యూఢిల్లీలోని ఇందిరాగాంధీ అంతర్జాతీయ విమానాశ్రయంలో దిగిన భారత హాకీ జట్టుకు పూల మాలలు వేసి స్వాగతం పలికారు. క్రీడాకారులు విమానాశ్రయం నుంచి బయటకు రాగానే డ్రమ్‌ బీట్‌ మోగడంతో పాటు కొందరు క్రీడాకారులు భాంగ్రా నృత్యంతో సంబరాలు చేసుకున్నారు. అదే సమయంలో, విమానాశ్రయం సమీపంలో గుమిగూడిన ప్రేక్షకులు కూడా భారత ఆటగాళ్లను ఉత్సాహపరిచారు. ఇప్పుడు ఈ వేడుకకు సంబంధించిన వీడియో సోషల్ మీడియాలో వైరల్‌గా మారింది.

పారిస్ ఒలింపిక్స్‌లో అద్భుత ప్రదర్శన చేసిన భారత హాకీ జట్టు 2-1 తేడాతో స్పెయిన్ జట్టును ఓడించి కాంస్య పతకాన్ని కైవసం చేసుకుంది. విశేషమేమిటంటే ఒలింపిక్స్‌లో భారత హాకీ జట్టుకు ఇది 13వ పతకం. అలాగే, 1972 తర్వాత తొలిసారిగా ఒలింపిక్స్‌లో భారత హాకీ జట్టు వరుసగా రెండో పతకాన్ని కైవసం చేసుకుంది.

భారత హాకీ జట్టు 1928లో తొలిసారి ఒలింపిక్స్‌లో పతకం సాధించింది. అక్కడి నుంచి మొదలైన పతకాల వేట ఇప్పుడు పారిస్ ఒలింపిక్స్ వరకు చేరింది. ముఖ్యంగా గతసారి కాంస్య పతకాన్ని కైవసం చేసుకున్న టీమిండియా ఈసారి కూడా మూడో స్థానాన్ని నిలబెట్టుకోగలిగింది. దీంతో వరుసగా కాంస్య పతకాలను గెలుచుకుంది.

ఒలింపిక్స్‌లో భారత హాకీ జట్టు సాధించిన విజయాలు:

గోల్డ్ – పురుషుల హాకీ – ఆమ్‌స్టర్‌డామ్ 1928

గోల్డ్ – పురుషుల హాకీ – లాస్ ఏంజిల్స్ 1932

గోల్డ్ – పురుషుల హాకీ – బెర్లిన్ 1936

గోల్డ్ – పురుషుల హాకీ – లండన్ 1948

గోల్డ్ – పురుషుల హాకీ – హెల్సింకి 1952

గోల్డ్ – పురుషుల హాకీ – మెల్బోర్న్ 1956

సిల్వర్ – పురుషుల హాకీ – రోమ్ 1960

గోల్డ్ – పురుషుల హాకీ – టోక్యో 1964

కాంస్యం – పురుషుల హాకీ – మెక్సికో సిటీ 1968

కాంస్యం – పురుషుల హాకీ – మ్యూనిచ్ 1972

గోల్డ్ – పురుషుల హాకీ – మాస్కో 1980

కాంస్యం – పురుషుల హాకీ – టోక్యో 2020

కాంస్యం – పురుషుల హాకీ – పారిస్ 2024.

మరిన్ని క్రీడా వార్తల కోసం ఇక్కడ క్లిక్ చేయండి..