Virat Kohli: 37 మ్యాచ్‌లు.. 1,795 పరుగులు.. సచిన్ ఆల్‌టైమ్ రికార్డుకు అడుగు దూరంలో కోహ్లీ

Virat Kohli: అంతర్జాతీయ క్రికెట్‌లో ఇప్పటికే ఎన్నో అసాధ్యమైన రికార్డులను బద్దలు కొట్టిన టీమిండియా దిగ్గజ బ్యాటర్ విరాట్ కోహ్లీ, ఇప్పుడు మరో సంచలన రికార్డుపై కన్నేశారు. వన్డే ప్రపంచ కప్ చరిత్రలో మాస్టర్ బ్లాస్టర్ సచిన్ టెండూల్కర్ పేరిట ఉన్న ఆల్‌టైమ్ అత్యధిక పరుగుల రికార్డును బద్దలు కొట్టేందుకు కోహ్లీ అతి సమీపంలో ఉన్నారు. వచ్చే వన్డే వరల్డ్ కప్‌లో విరాట్ కోహ్లీ మరో 483 పరుగులు సాధిస్తే ప్రపంచ కప్ చరిత్రలోనే అత్యధిక పరుగులు చేసిన బ్యాటర్‌గా సచిన్ టెండూల్కర్‌ను వెనక్కి నెట్టి అగ్రస్థానానికి చేరుకుంటారు.

వరల్డ్ కప్‌లో సచిన్ టెండూల్కర్ రికార్డులు

వన్డే ప్రపంచ కప్ చరిత్రలో అత్యధిక పరుగులు చేసిన ఆటగాడిగా సచిన్ టెండూల్కర్ రికార్డుల్లో నిలిచారు. సచిన్ తన కెరీర్‌లో 1992 నుంచి 2011 వరకు మొత్తం 6 వరల్డ్ కప్‌లలో పాల్గొన్నారు. ఆయన ఆడిన 45 మ్యాచ్‌లలోని 44 ఇన్నింగ్స్‌లలో 56.95 అద్భుతమైన సగటుతో 2,278 పరుగులు సాధించారు. ప్రపంచ కప్‌లో సచిన్ ఖాతాలో 6 సెంచరీలు, 15 హాఫ్ సెంచరీలు ఉన్నాయి. వీటితో పాటు 241 ఫోర్లు, 27 సిక్సర్లు కూడా బాదారు. 2011లో భారత జట్టు ప్రపంచ కప్ ట్రోఫీని గెలుచుకున్న టోర్నీయే సచిన్‌కు చివరి వరల్డ్ కప్ కావడం విశేషం.

37 మ్యాచ్‌ల్లో 1795 పరుగులు చేసిన విరాట్ కోహ్లీ

వరల్డ్ కప్ రికార్డుల విషయంలో విరాట్ కోహ్లీ సచిన్‌కు పెద్దగా దూరంలో లేరు. కోహ్లీ ఇప్పటివరకు 37 ప్రపంచ కప్ మ్యాచ్‌ల్లో ఆడి 37 ఇన్నింగ్స్‌లలో 1,795 పరుగులు చేశారు. విరాట్ కోహ్లీ బ్యాటింగ్ యావరేజ్ 59.83గా ఉంది, ఇది సచిన్ టెండూల్కర్ సగటు (56.95) కంటే మెరుగ్గా ఉండటం గమనార్హం. వరల్డ్ కప్‌లో కోహ్లీ ఇప్పటివరకు 5 సెంచరీలు, 12 హాఫ్ సెంచరీలు సాధించడంతో పాటు 159 ఫోర్లు, 14 సిక్సర్లు కొట్టారు. ప్రస్తుతం సచిన్ (2,278), కోహ్లీ (1,795) మధ్య వ్యత్యాసం కేవలం 483 పరుగులు మాత్రమే.

2023 వన్డే వరల్డ్ కప్‌లో విరాట్ కోహ్లీ విధ్వంసం

2023లో భారతదేశంలో జరిగిన వన్డే వరల్డ్ కప్‌లో విరాట్ కోహ్లీ అద్భుతమైన ఫామ్‌ను ప్రదర్శించారు. ఆ టోర్నీలో 11 మ్యాచ్‌లు ఆడిన కోహ్లీ ఏకంగా 765 పరుగులు చేసి ఒకే ప్రపంచ కప్ టోర్నమెంట్‌లో అత్యధిక పరుగులు చేసిన బ్యాటర్‌గా కొత్త రికార్డు సృష్టించారు. ఒకవేళ కోహ్లీ రాబోయే వన్డే ప్రపంచ కప్‌లో ఆడి మరో 483 పరుగులు చేస్తే, సచిన్ టెండూల్కర్ పేరిట ఉన్న ఆల్‌టైమ్ వరల్డ్ కప్ రికార్డు బద్దలవడం ఖాయం. ప్రస్తుతం ప్రపంచ కప్ పరుగుల వేటలో సచిన్ టెండూల్కర్ ప్రథమ స్థానంలో ఉండగా, విరాట్ కోహ్లీ రెండో స్థానంలో ఉన్నారు.

మరిన్ని క్రీడా వార్తల కోసం ఇక్కడ క్లిక్ చేయండి..