Sophie Devine : సోఫీ డివైన్ అద్భుత సెంచరీ వృథా.. 28 ఏళ్ల తర్వాత ప్రపంచ కప్లో అరుదైన రికార్డు
మహిళల వన్డే ప్రపంచ కప్ 2025లో రెండో మ్యాచ్లో న్యూజిలాండ్ జట్టు ఆస్ట్రేలియాను ఎదుర్కొంది. ఈ ఉత్కంఠభరిత పోరులో ఆస్ట్రేలియా న్యూజిలాండ్కు 327 పరుగుల భారీ లక్ష్యాన్ని నిర్దేశించింది. లక్ష్య ఛేదనలో కివీస్ జట్టుకు ప్రారంభం ఏమాత్రం బాగా లేదు, ఖాతా తెరవకుండానే రెండు కీలక వికెట్లను కోల్పోయింది.
Sophie Devine : మహిళల వన్డే ప్రపంచ కప్ 2025లో రెండో మ్యాచ్లో న్యూజిలాండ్ జట్టు ఆస్ట్రేలియాను ఎదుర్కొంది. ఈ ఉత్కంఠభరిత పోరులో ఆస్ట్రేలియా న్యూజిలాండ్కు 327 పరుగుల భారీ లక్ష్యాన్ని నిర్దేశించింది. లక్ష్య ఛేదనలో కివీస్ జట్టుకు ఓపెనింగ్ ఏమాత్రం బాగాలేదు. ఖాతా తెరవకుండానే రెండు కీలక వికెట్లను కోల్పోయింది. ఈ క్లిష్ట సమయంలో కెప్టెన్ సోఫీ డివైన్ క్రీజ్లోకి వచ్చి, కెప్టెన్గా నిలబడి అద్భుతమైన సెంచరీ సాధించింది. అయితే, ఈ మ్యాచ్లో న్యూజిలాండ్కు ఓటమి తప్పలేదు. ఆమె సెంచరీ సాధించినా, జట్టును గెలిపించలేకపోయింది.
సోఫీ డివైన్ క్రీజ్లోకి వచ్చినప్పుడు జట్టు తీవ్ర ఒత్తిడిలో ఉంది. ఆమె మొదట ఇన్నింగ్స్ను నిలబెట్టే ప్రయత్నం చేసింది, చాలా జాగ్రత్తగా పరుగులు రాబట్టింది. క్రీజ్లో కుదురుకున్నాక, ఆమె భారీ షాట్లతో స్కోరు బోర్డును ముందుకు నడిపింది. సోఫీ డివైన్ తన హాఫ్ సెంచరీని 69 బంతుల్లో (5 ఫోర్లు, 1 సిక్స్) పూర్తి చేసింది. ఆ తర్వాత మరింత వేగంగా ఆడి, 107 బంతుల్లో తన సెంచరీని అందుకుంది. ఆమె మొత్తం 112 బంతుల్లో 12 ఫోర్లు, 3 సిక్సర్లతో 111 పరుగులు చేసింది.
ఈ ఇన్నింగ్స్ సందర్భంగా 36వ ఓవర్లో ఆమె వరుసగా 4 ఫోర్లు కొట్టి అద్భుతం సృష్టించింది. ఇది ఆమె వన్డే కెరీర్లో 9వ సెంచరీ, అంతర్జాతీయ క్రికెట్లో ఆమె సాధించిన 10వ సెంచరీ. ఈ టోర్నమెంట్ సోఫీ డివైన్కు చాలా ప్రత్యేకం. ఎందుకంటే, కొన్ని నెలల క్రితమే ఆమె వన్డే ప్రపంచ కప్ తర్వాత ఈ ఫార్మాట్ నుండి రిటైర్ అవుతానని ప్రకటించింది. ఇలా సెంచరీతో టోర్నమెంట్ను ప్రారంభించడం ద్వారా, ఆమె ఈ టోర్నమెంట్ను మరింత ప్రత్యేకంగా మార్చుకోబోతున్నానని చెప్పకనే చెప్పింది.
సోఫీ డివైన్ మహిళల ప్రపంచ కప్లో సెంచరీ సాధించిన మూడవ అత్యంత వయసున్న క్రీడాకారిణిగా నిలిచింది. ఆమె 36 సంవత్సరాల 30 రోజుల వయసులో ఈ సెంచరీని సాధించింది. ఆమె కంటే ముందు, 1997లో, అంటే 28 సంవత్సరాల క్రితం జానెట్ బ్రిట్టిన్ 38 సంవత్సరాల 161 రోజుల వయసులో సెంచరీ చేసింది. బార్బ్ బెవేజ్ ఈ జాబితాలో అగ్రస్థానంలో ఉంది, ఆమె 39 సంవత్సరాల 48 రోజుల వయసులో ఈ ఘనత సాధించింది.
సోఫీ డివైన్ కెప్టెన్ ఇన్నింగ్స్ ఆడినా, మిగిలిన బ్యాట్స్మెన్ల నుండి ఆమెకు సరైన మద్దతు లభించలేదు. దీంతో న్యూజిలాండ్ జట్టు 327 పరుగుల లక్ష్యానికి సమాధానంగా 237 పరుగులు మాత్రమే చేసి ఆల్ అవుట్ అయింది. ఫలితంగా, ఆస్ట్రేలియా చేతిలో న్యూజిలాండ్కు ఓటమి తప్పలేదు.
మరిన్ని క్రీడా వార్తల కోసం ఇక్కడ క్లిక్ చేయండి..