PAK vs WI : సర్ గార్ఫీల్డ్ సోబర్స్కి బర్త్డే గిఫ్ట్ ఇచ్చిన వెస్టిండీస్.. తొలి టెస్టులో పాకిస్తాన్ ఘోర ఓటమి
PAK vs WI : వెస్టిండీస్తో తొలి టెస్టులో పాకిస్తాన్ 90 పరుగుల తేడాతో ఘోరంగా ఓడిపోయింది. బాబర్ ఆజమ్ అర్ధసెంచరీతో పోరాడినా ఫలితం లేకపోయింది. జస్టిన్ గ్రీవ్స్, జేడెన్ సీల్స్ అద్భుత ప్రదర్శనతో విండీస్ సిరీస్లో 1-0 ఆధిక్యం సాధించింది.
Updated on: Jul 29, 2026 | 7:35 AM
PAK vs WI : షాన్ మసూద్ సారథ్యంలో పాకిస్తాన్ టెస్టు జట్టు ఘోర ప్రదర్శన చేయడంతో బోర్డు మళ్లీ బాబర్ ఆజమ్కు టెస్ట్ కెప్టెన్సీ బాధ్యతలను అప్పగించింది. బాబర్ రీ ఎంట్రీతో వెస్టిండీస్ పర్యటనలో జట్టు పుంజుకుంటుందని భావించినా ఆశించిన ఫలితం దక్కలేదు. ట్రినిడాడ్ వేదికగా జరిగిన రెండు టెస్టుల సిరీస్లోని తొలి మ్యాచ్లో పాకిస్తాన్ ఆతిథ్య కరేబియన్ జట్టు ముందు తేలిపోయింది. ఈ మ్యాచ్లో ఆల్ రౌండ్ ప్రదర్శనతో అదరగొట్టిన జస్టిన్ గ్రీవ్స్ మ్యాచ్లో మొత్తం 7 వికెట్లు (తొలి ఇన్నింగ్స్లో 5, రెండో ఇన్నింగ్స్లో 2) తీసి ప్లేయర్ ఆఫ్ ది మ్యాచ్ అవార్డును సొంతం చేసుకున్నాడు.
బాబర్ ఆజమ్ ఒంటరి పోరాటం వృథా
వెస్టిండీస్ నిర్దేశించిన 211 పరుగుల లక్ష్యంతో బరిలోకి దిగిన పాకిస్తాన్కు ఛేజింగ్ చాలా కష్టంగా మారింది. కెప్టెన్ బాబర్ ఆజమ్ 107 బంతుల్లో 58 పరుగులు చేసి నాటౌట్గా నిలిచి పోరాడాడు. చివర్లో అట్టడుగున వచ్చిన మహమ్మద్ అబ్బాస్ 23 పరుగులు, మహమ్మద్ రిజ్వాన్ 11 పరుగులు చేశారు. వీరు ముగ్గురు మినహా పాకిస్తాన్ జట్టులోని ఏ ఒక్క బ్యాటర్ కూడా రెండంకెల స్కోరు చేయలేకపోయారు. దీంతో పాకిస్తాన్ కేవలం 120 పరుగులకే కుప్పకూలి 90 పరుగుల తేడాతో మ్యాచ్ను చేజార్చుకుంది. ఈ విజయం సిరీస్లో వెస్టిండీస్ 1-0 ఆధిక్యంలో నిలవడానికి సహాయపడింది.
తొలి ఇన్నింగ్స్లో విండీస్, పాక్ ప్రదర్శన
ఈ మ్యాచ్లో వెస్టిండీస్ తాత్కాలిక కెప్టెన్ రోస్టన్ ఛేజ్ టాస్ గెలిచి మొదట బ్యాటింగ్ ఎంచుకున్నాడు. తొలి ఇన్నింగ్స్లో షాయ్ హోప్ (92), కేవన్ హాడ్జ్ (84) పరుగుల రాణించడంతో వెస్టిండీస్ 311 పరుగులు చేసింది. పాక్ బౌలర్లలో మహమ్మద్ అలీ 4 వికెట్లు, మహమ్మద్ అబ్బాస్ 3 వికెట్లు పడగొట్టారు. అనంతరం తమ మొదటి ఇన్నింగ్స్ ప్రారంభించిన పాకిస్తాన్ 282 పరుగులు చేసింది. షాన్ మసూద్ సెంచరీ సాధించగా, ఇమామ్ ఉల్ హక్ హాఫ్ సెంచరీ చేశాడు. విండీస్ బౌలర్ జస్టిన్ గ్రీవ్స్ 5 వికెట్లతో చెలరేగాడు.
జేడెన్ సీల్స్ ధాటికి పాక్ పతనం
29 పరుగుల స్వల్ప ఆధిక్యంతో రెండో ఇన్నింగ్స్ ప్రారంభించిన వెస్టిండీస్ జట్టును పాక్ బౌలర్ మహమ్మద్ అబ్బాస్ (5 వికెట్లు) దెబ్బ తీశాడు. దీంతో విండీస్ రెండో ఇన్నింగ్స్లో 181 పరుగులకే ఆలౌట్ అయింది. ఫలితంగా పాకిస్తాన్కు 211 పరుగుల టార్గెట్ లభించింది. లక్ష్యం చిన్నదే అయినా వెస్టిండీస్ పేసర్ జేడెన్ సీల్స్ (5 వికెట్లు) వినాశకర బౌలింగ్తో పాక్ బ్యాటింగ్ లైనప్ను ధ్వంసం చేశాడు. కనీసం పోటీ కూడా ఇవ్వలేక పాక్ చేతులెత్తేసింది. దిగ్గజ ఆటగాడు సర్ గార్ఫీల్డ్ సోబర్స్ 90వ పుట్టినరోజు వేళ వెస్టిండీస్ ఈ చారిత్రాత్మక విజయాన్ని సాధించడం విశేషం.
