LSG vs DC: తొలి పోరుకు సిద్ధమైన లక్నో, ఢిల్లీ.. అందరి కళ్లూ టీమిండియా స్పీడ్‌స్టర్ పైనే..!

IPL 2026 LSG vs DC Preview: పీఎల్ 2026 సీజన్‌లో మరో రసవత్తర పోరుకు ఏకనా స్టేడియం సిద్ధమైంది. లక్నో సూపర్ జెయింట్స్ (LSG), ఢిల్లీ క్యాపిటల్స్ (DC) తమ తొలి మ్యాచ్‌లో తలపడనున్నాయి. సీజన్ ఆరంభానికి ముందే రెండు జట్లూ కీలక ఆటగాళ్లను కోల్పోయాయి. లక్నో జట్టు రూ. 2 కోట్లకు కొనుగోలు చేసిన శ్రీలంక ఆల్ రౌండర్ వానిందు హసరంగ ఫిట్‌నెస్ సమస్యల వల్ల ఇంకా భారత్‌కు చేరుకోలేదు. మరోవైపు, ఢిల్లీ క్యాపిటల్స్ రూ. 11.75 కోట్లకు రిటైన్ చేసుకున్న స్టార్ పేసర్ మిచెల్ స్టార్క్ భుజం, మోచేతి గాయాల కారణంగా తొలి కొన్ని మ్యాచ్‌లకు దూరం కానున్నాడు. హసరంగ స్థానంలో లక్నో అన్రిచ్ నోర్ట్జేను బరిలోకి దించే అవకాశం ఉంది.

రిషబ్ పంత్ బ్యాటింగ్ పొజిషన్ ఏది?

లక్నో సూపర్ జెయింట్స్ కెప్టెన్ రిషబ్ పంత్ ఏ స్థానంలో బ్యాటింగ్‌కు వస్తాడనేది ఇప్పుడు పెద్ద చర్చగా మారింది. 2025 సీజన్ చివరి మ్యాచ్‌లో పంత్ నంబర్ 3లో వచ్చి అద్భుత సెంచరీ బాదాడు. అయితే, నికోలస్ పూరన్ కూడా అదే స్థానంలో రాణించగలడు. పంత్ గత కొంతకాలంగా టీ20లు ఆడకపోవడం లక్నోకు స్వల్ప ఆందోళన కలిగించే అంశం. ఇండియన్ బ్యాటర్లపై అతిగా ఆధారపడకుండా మిచెల్ మార్ష్, మార్క్రామ్ వంటి విదేశీ ఆటగాళ్లు రాణించాలని లక్నో కోరుకుంటోంది.

ఢిల్లీ టాప్ ఆర్డర్ వ్యూహాలు..

ఢిల్లీ క్యాపిటల్స్ తమ టాప్ ఆర్డర్‌ను పటిష్టం చేసుకునే పనిలో ఉంది. కేఎల్ రాహుల్‌తో కలిసి శ్రీలంక ఓపెనర్ పాతుమ్ నిస్సంక ఇన్నింగ్స్ ప్రారంభించే అవకాశం ఉంది. సయ్యద్ ముస్తాక్ అలీ ట్రోఫీలో అత్యధిక పరుగులు చేసిన నితీష్ రాణా నంబర్ 3లో బ్యాటింగ్‌కు వచ్చే ఛాన్స్ ఉంది. అక్షర్ పటేల్ సారథ్యంలోని ఢిల్లీ జట్టులో ట్రిస్టన్ స్టబ్స్, డేవిడ్ మిల్లర్ వంటి పటిష్టమైన మిడిల్ ఆర్డర్ ఉండటం వారికి కలిసొచ్చే అంశం. జమ్మూ కాశ్మీర్ యువ సంచలనం ఆకిబ్ నబీ ఈ మ్యాచ్‌తో ఐపీఎల్ అరంగేట్రం చేసే అవకాశం ఉంది.

మయాంక్ యాదవ్ vs నితీష్ రాణా..

గత ఐపీఎల్‌లో 150 కిలోమీటర్ల వేగంతో బంతులు విసిరి సంచలనం సృష్టించిన మయాంక్ యాదవ్, గాయాల కారణంగా దాదాపు రెండేళ్లుగా ఆటకు దూరంగా ఉన్నాడు. ఇప్పుడు పూర్తి ఫిట్‌నెస్‌తో ఉన్నాడని కోచ్ జస్టిన్ లాంగర్ ధృవీకరించారు. మరోవైపు, తన మూడవ ఐపీఎల్ జట్టుకు ప్రాతినిధ్యం వహిస్తున్న నితీష్ రాణా, డొమెస్టిక్ ఫామ్‌ను ఇక్కడ కూడా కొనసాగించాలని పట్టుదలతో ఉన్నాడు.

ఏకనా స్టేడియం పిచ్, గణాంకాలు..

లక్నోలోని ఏకనా స్టేడియం పిచ్ నంబర్ 4పై ఈ మ్యాచ్ జరగనుంది. గత మూడు సీజన్లలో ఇక్కడ రన్ రేట్ క్రమంగా పెరుగుతూ వస్తోంది (7.36 నుండి 9.83 వరకు). సగటున మొదటి ఇన్నింగ్స్ స్కోరు 187 పరుగులుగా నమోదవుతోంది. ఇక్కడ వర్ష సూచన లేదు, వాతావరణం 28 డిగ్రీల సెల్సియస్ వద్ద ఆహ్లాదకరంగా ఉండనుంది. గణాంకాల ప్రకారం ఢిల్లీకి లక్నోపై 4-0 రికార్డు ఉంది, దీనిని తిరగరాయాలని లక్నో భావిస్తోంది.