IND vs ENG: ధోనీ అరుదైన ప్రపంచ రికార్డును సమం చేసిన గిల్ దోస్త్.. అదేంటంటే..?
Jos Buttler Matches MS Dhoni World Record: భారత క్రికెట్ గాడ్ ఫాదర్ ఎంఎస్ ధోనీ రికార్డును జోస్ బట్లర్ సమం చేయడం ప్రపంచ క్రికెట్లో ఒక అద్భుతమైన ఘట్టం. ప్రస్తుతం ఇద్దరూ సమానంగా ఉన్నప్పటికీ, బట్లర్ ఇంకా క్రికెట్ ఆడుతుండటంతో త్వరలోనే ధోనీ రికార్డును బద్దలు కొట్టి ఒంటరిగా అగ్రస్థానానికి దూసుకెళ్లే అవకాశం ఉంది. ఫామ్ కోల్పోయి ఇబ్బంది పడుతున్న బట్లర్కు ఈ ప్రపంచ రికార్డు కొత్త ఉత్సాహాన్ని ఇస్తుందని క్రికెట్ విశ్లేషకులు భావిస్తున్నారు.
Updated on: Jul 10, 2026 | 10:37 AM
Jos Buttler Matches MS Dhoni World Record: టీ20 క్రికెట్ చరిత్రలో సరికొత్త రికార్డు నమోదైంది. భారత మాజీ దిగ్గజ కెప్టెన్ మహేంద్ర సింగ్ ధోనీ పేరిట ఉన్న ఒక అరుదైన ప్రపంచ రికార్డును ఇంగ్లాండ్ స్టార్ వికెట్ కీపర్ బ్యాటర్ జోస్ బట్లర్ సమం చేశాడు. భారత్తో జరిగిన నాలుగో టీ20 మ్యాచ్లో బట్లర్ కేవలం ఒక సిక్సర్తో ఈ అద్భుతమైన మైలురాయిని అందుకోవడం విశేషం.
ధోనీ రికార్డుపై బట్లర్ పంజా..!
భారత్, ఇంగ్లాండ్ జట్ల మధ్య బ్రిస్టల్ వేదికగా జరిగిన నాలుగో టీ20 మ్యాచ్ ఇంగ్లాండ్ మాజీ కెప్టెన్, వికెట్ కీపర్ జోస్ బట్లర్కు ఒక మరపురాని మ్యాచ్గా నిలిచింది. ఈ మ్యాచ్లో బట్లర్ పెద్దగా పరుగులు చేయనప్పటికీ, అంతర్జాతీయ క్రికెట్లో ఒక వికెట్ కీపర్ బ్యాటర్గా అత్యధిక సిక్సర్లు బాదిన మహేంద్ర సింగ్ ధోనీ రికార్డును కైవసం చేసుకున్నాడు. ఈ మ్యాచ్కు ముందు ధోనీ కంటే ఒక సిక్స్ వెనుకబడి ఉన్న బట్లర్, భారత యువ బౌలర్ హర్ష్దీప్ సింగ్ వేసిన ఇన్నింగ్స్ మూడో ఓవర్లో లాంగ్ ఆన్ మీదుగా ఒక భారీ సిక్సర్ బాదాడు. ఈ ఒక్క సిక్సర్తో అంతర్జాతీయ క్రికెట్లో వికెట్ కీపర్గా బట్లర్ తన 359వ సిక్సర్ను పూర్తి చేసుకుని ధోనీ సరసన చేరాడు.
సిక్సర్ల వీరుల జాబితాలో అగ్రస్థానం..
అంతర్జాతీయ క్రికెట్లో వికెట్ కీపర్ బ్యాటర్లుగా అత్యధిక సిక్సర్లు కొట్టిన ఆటగాళ్ల జాబితాను పరిశీలిస్తే ఇప్పుడు జోస్ బట్లర్, ఎంఎస్ ధోనీ ఇద్దరూ 359 సిక్సర్లతో సంయుక్తంగా మొదటి స్థానంలో కొనసాగుతున్నారు. వీరి తర్వాత దక్షిణాఫ్రికా ధృవతార క్వింటన్ డి కాక్ 300 సిక్సర్లతో మూడో స్థానంలో ఉండగా, ఆస్ట్రేలియా దిగ్గజం ఆడమ్ గిల్క్రిస్ట్ 259 సిక్సర్లతో నాలుగో స్థానంలో, న్యూజిలాండ్ మాజీ రథసారథి బ్రెండన్ మెకల్లమ్ 208 సిక్సర్లతో ఐదో స్థానంలో ఉన్నారు. ప్రపంచ క్రికెట్లో ఎందరో దిగ్గజ కీపర్లు ఉన్నప్పటికీ ధోనీ, బట్లర్ మాత్రమే ఈ అగ్రస్థానాన్ని అధిరోహించడం విశేషం.
సిక్స్ కొట్టిన వెంటనే పెవిలియన్కు..
అయితే, బట్లర్ ఈ చారిత్రాత్మక రికార్డును అందుకున్న ఆనందం ఎంతో సేపు నిలవలేదు. సిక్సర్ బాదిన తర్వాతి బంతికే భారత బౌలర్ హర్ష్దీప్ సింగ్ కక్ష తీర్చుకున్నాడు. ఆఫ్ స్టంప్కు వెలుపలగా పడిన బంతిని డ్రైవ్ చేయబోయిన బట్లర్, ఇషాన్ కిషన్కు క్యాచ్ ఇచ్చి కేవలం 8 పరుగులకే వెనుదిరిగాడు. ప్రస్తుత సిరీస్లో బట్లర్ ఫామ్ ఆందోళనకరంగా మారింది. ఈ మ్యాచ్కు ముందు ఆడిన మూడు ఇన్నింగ్స్ల్లోనూ అతను కేవలం 44 పరుగులు మాత్రమే చేయగలిగాడు. అయినప్పటికీ ఈ మ్యాచ్లో సాధించిన రికార్డు అతని కెరీర్లో ఒక మైలురాయిగా నిలిచిపోతుంది.
పోరాడిన శ్రేయాస్ అయ్యర్..
అంతకుముందు టాస్ గెలిచి మొదట బ్యాటింగ్ చేసిన భారత జట్టు నిర్ణీత ఓవర్లలో 158 పరుగులు చేసింది. భారత యువ ఓపెనర్లు వైభవ్ సూర్యవంశీ, ఇషాన్ కిషన్, అభిషేక్ శర్మ తక్కువ పరుగులకే అవుట్ కావడంతో భారత్ తీవ్ర ఇబ్బందుల్లో పడింది. ఈ దశలో జట్టును ఆదుకునేందుకు వచ్చిన శివమ్ దూబే కూడా నిరాశపరిచాడు. అయితే కెప్టెన్ శ్రేయాస్ అయ్యర్ బాధ్యతాయుతమైన ఇన్నింగ్స్ ఆడాడు. కేవలం 49 బంతుల్లోనే 80 పరుగులు చేసి నాటౌట్గా నిలవడంతో భారత్ గౌరవప్రదమైన స్కోరు సాధించగలిగింది. అనంతరం ఇంగ్లాండ్ కెప్టెన్ హ్యారీ బ్రూక్ అద్భుత హాఫ్ సెంచరీతో ఇంగ్లాండ్ను విజయతీరాలకు చేర్చాడు.
మరిన్ని క్రీడా వార్తల కోసం ఇక్కడ క్లిక్ చేయండి..
