IPL 2026 : ఇది బ్యాటింగ్ కాదు విధ్వంసం.. 200+ స్ట్రైక్ రేట్‌తో బౌలర్లను ఉతికేసిన టాప్ 5 బ్యాటర్లు వీళ్లే

IPL 2026 : క్రికెట్ లవర్స్‎ను గత కొన్ని వారాలుగా ఉర్రూతలూగించిన ఐపీఎల్ 2026 ముగింపు దశకు చేరుకుంది. మే 31న జరగబోయే గ్రాండ్ ఫైనల్ పోరుతో ఈ సీజన్‌కు తెరపడనుంది. అయితే ఈ ఏడాది ఐపీఎల్‌లో మునుపెన్నడూ లేని విధంగా బ్యాటర్లు బౌలర్లపై విరుచుకుపడ్డారు. టీ20 క్రికెట్ అంటేనే బౌండరీల వర్షం.. అలాంటిది ఈ సీజన్‌లో కొందరు బ్యాటర్లు అసలు సిసలైన టీ20 మోడ్ చూపిస్తూ ఏకంగా 200 కంటే ఎక్కువ స్ట్రైక్ రేట్‌తో బ్యాటింగ్ చేసి ప్రత్యర్థి జట్లకు చుక్కలు చూపించారు. ఈ ఐపీఎల్ 19వ సీజన్ మొత్తంలో 200 ప్లస్ స్ట్రైక్ రేట్‌ను మైంటైన్ చేసిన ఆ ఐదుగురు బ్యాటర్లు ఎవరో తెలుసుకుందాం.

నంబర్ 1 స్థానంలో వైభవ్ సూర్యవంశీ

ఈ సీజన్‌లో అందరికంటే అత్యధిక స్ట్రైక్ రేట్‌తో బ్యాటింగ్ చేసి మొదటి స్థానంలో నిలిచాడు రాజస్థాన్ రాయల్స్ యువ ఓపెనర్ వైభవ్ సూర్యవంశీ. ఈ లెఫ్ట్ హ్యాండ్ విద్వంసక ప్లేయర్ క్రీజులోకి వస్తే చాలు స్టేడియం నలుమూలలా సిక్సర్ల వర్షం కురిపించాడు. ఐపీఎల్ 2026లో వైభవ్ మొత్తం 16 ఇన్నింగ్స్‌లు ఆడి ఏకంగా 237.31 మైండ్ బ్లాకింగ్ స్ట్రైక్ రేట్‌తో 776 పరుగులు సాధించాడు. ఈ క్రమంలో అతని బ్యాటింగ్ యావరేజ్ 48.50గా నమోదైంది. ఈ ఏడాది ఆరెంజ్ క్యాప్ రేసులోనూ తన పవర్‌ను చూపించి అందరి దృష్టిని ఆకర్షించాడీ కుర్రాడు.

రెండో స్థానంలో కేకేఆర్ పవర్ హిట్టర్ ఫిన్ అలెన్

కోల్‌కతా నైట్ రైడర్స్ (KKR) తరఫున ఆడిన ఫిన్ అలెన్ ఈ జాబితాలో రెండో స్థానాన్ని కైవసం చేసుకున్నాడు. లోయర్ ఆర్డర్, మిడిల్ ఆర్డర్‌లో వచ్చి బౌలర్లపై కౌంటర్ ఎటాక్ చేయడంలో అలెన్ సరికొత్త బెంచ్‌మార్క్ సెట్ చేశాడు. ఈ సీజన్‌లో మొత్తం 11 ఇన్నింగ్స్‌లు ఆడిన ఫిన్ అలెన్.. 214.11 స్ట్రైక్ రేట్‌తో రికార్డు స్థాయిలో 349 పరుగులు రాబట్టాడు. ఈ పవర్ హిట్టింగ్ ఇన్నింగ్స్‌లలో అతని సగటు బ్యాటింగ్ యావరేజ్ 34.90 గా ఉంది.

మూడో స్థానంలో పంజాబ్ కింగ్స్ ఓపెనర్ ప్రియాన్ష్ ఆర్య

ఈ అరుదైన లిస్ట్‌లో మూడో స్థానంలో నిలిచాడు పంజాబ్ కింగ్స్ లెఫ్ట్ హ్యాండ్ ఓపెనింగ్ బ్యాటర్ ప్రియాన్ష్ ఆర్య. పవర్‌ప్లేను పూర్తిగా వాడుకుంటూ పంజాబ్ జట్టుకు ప్రతి మ్యాచ్‌లోనూ మెరుపు ఆరంభాలను ఇచ్చాడు. ఈ ఐపీఎల్ సీజన్లో ప్రియాన్ష్ మొత్తం 13 ఇన్నింగ్స్‌లలో బ్యాటింగ్ చేసి 211.63 లీథల్ స్ట్రైక్ రేట్‌తో 364 పరుగులు చేశాడు. ఈ పరుగులను అతను 28 సగటు యావరేజ్‌తో స్కోర్ చేయడం విశేషం.

నాలుగో స్థానంలో ఎస్ఆర్‌హెచ్ సిక్సర్ల కింగ్ అభిషేక్ శర్మ

సన్‌రైజర్స్ హైదరాబాద్ (SRH) స్టార్ ఓపెనర్, సిక్సర్ల కింగ్ అభిషేక్ శర్మ ఈ సీజన్‌లోనూ తన క్లాస్ అండ్ మాస్ బ్యాటింగ్‌ను కొనసాగించి నాలుగో స్థానంలో నిలిచాడు. బంతి ఏదైనా సరే స్టేడియం బయట పడేయడమే లక్ష్యంగా ఆడే అభిషేక్.. ఈ సీజన్‌లో మొత్తం 15 ఇన్నింగ్స్‌లు ఆడాడు. అందులో 40.21 బ్యాటింగ్ యావరేజ్‌తో, 204.73 అద్భుతమైన స్ట్రైక్ రేట్‌తో మొత్తం 563 పరుగులు తన ఖాతాలో వేసుకున్నాడు. ఎస్ఆర్‌హెచ్ భారీ స్కోర్లు సాధించడంలో ఇతని పాత్ర ఎంతో కీలకంగా మారింది.

ఐదో స్థానంలో సీఎస్‌కే బ్యాటర్ ఉర్విల్ పటేల్

చెన్నై సూపర్ కింగ్స్ (CSK) బ్యాటర్ ఉర్విల్ పటేల్ ఈ ఐపీఎల్‌లో 200 ప్లస్ స్ట్రైక్ రేట్ సాధించిన టాప్ 5 బ్యాటర్ల జాబితాలో ఆఖరి ప్లేస్‌ను దక్కించుకున్నాడు. ఈ సీజన్లో ఇతనికి ఎక్కువ మ్యాచ్‌లలో ఆడే అవకాశం రాకపోయినప్పటికీ, వచ్చిన అవకాశాలను రెండు చేతులా వాడుకున్నాడు. కేవలం 7 ఇన్నింగ్స్‌ల్లోనే బ్యాటింగ్ చేసిన ఉర్విల్ పటేల్.. 201.56 స్ట్రైక్ రేట్‌తో 129 పరుగులు చేశాడు. ఈ మెరుపు ఇన్నింగ్స్‌లలో అతని యావరేజ్ 18.43 గా నమోదైంది.

ఛాన్స్ మిస్ చేసుకున్న ఆర్సీబీ కెప్టెన్ రజత్ పాటిదార్

ఈ ఐపీఎల్ 2026 సీజన్ మొత్తంలో పైన పేర్కొన్న వైభవ్, ఫిన్ అలెన్, ప్రియాన్ష్, అభిషేక్, ఉర్విల్ పటేల్ మినహా మరే బ్యాటర్ కూడా 200 కంటే ఎక్కువ స్ట్రైక్ రేట్ మార్కును అందుకోలేకపోయారు. నిజానికి రాయల్ ఛాలెంజర్స్ బెంగళూరు (RCB) కెప్టెన్ రజత్ పాటిదార్ కూడా చాలా రోజుల పాటు ఈ ఎలైట్ లిస్ట్‌లో కొనసాగాడు. కానీ మిడిల్ ఆర్డర్‌లో బ్యాటింగ్‌కు రావడం, జట్టును గెలిపించాల్సిన కెప్టెన్సీ బాధ్యతలు పెరగడం వల్ల చివరి మ్యాచ్‌ల్లో కాస్త ఆచితూచి ఆడాల్సి వచ్చింది. దాంతో రజత్ పాటిదార్ స్ట్రైక్ రేట్ చివరికి 196.67 వద్ద ముగియడంతో ఈ లిస్ట్‌లో చోటు కోల్పోయాడు.