GT vs CSK : 89 పరుగుల తేడాతో గుజరాత్ చేతిలో చెన్నై ఘోర ఓటమి. ప్లేఆఫ్స్ రేసు నుంచి అవుట్
GT vs CSK : ఐపీఎల్ 2026 సీజన్ లీగ్ దశ ముగింపు మ్యాచ్ లో చెన్నై సూపర్ కింగ్స్ ఘోరంగా విఫలమైంది. అహ్మదాబాద్లోని నరేంద్ర మోదీ స్టేడియంలో గుజరాత్ టైటాన్స్తో జరిగిన కీలక పోరులో చెన్నై జట్టు ఓటమి పాలైంది.
GT vs CSK : ఐపీఎల్ 2026 సీజన్ లీగ్ దశ ముగింపు మ్యాచ్లో చెన్నై సూపర్ కింగ్స్ (CSK) అభిమానులకు కోలుకోలేని గుండెకోత మిగిలింది. నరేంద్ర మోదీ స్టేడియంలో గుజరాత్ టైటాన్స్తో జరిగిన చావో రేవో తేల్చుకోవాల్సిన పోరులో చెన్నై జట్టు 89 పరుగుల భారీ తేడాతో ఘోర పరాజయాన్ని చవిచూసింది. గుజరాత్ విధించిన 230 పరుగుల భారీ లక్ష్య ఛేదనలో చేతులెత్తేసిన రుతురాజ్ ఆర్మీ నిర్ణీత 20 ఓవర్లలో 8 వికెట్లు కోల్పోయి కేవలం 141 పరుగులు మాత్రమే చేయగలిగింది. ఈ ఘోర ఓటమితో చెన్నై సూపర్ కింగ్స్ ఐపీఎల్ 2026 టోర్నమెంట్ నుండి అధికారికంగా నిష్క్రమించగా, గుజరాత్ టైటాన్స్ పాయింట్ల పట్టికలో టాప్-2 స్థానాన్ని సుస్థిరం చేసుకుంది.
హిమాలయమంత భారీ లక్ష్యాన్ని ఛేదించడానికి బరిలోకి దిగిన చెన్నై సూపర్ కింగ్స్కు ప్రారంభంలోనే గట్టి షాక్లు తగిలాయి. ఇన్నింగ్స్ మొదటి ఓవర్లోనే గాయపడి ఆ తర్వాత బ్యాటింగ్కు వచ్చిన స్టార్ వికెట్ కీపర్ బ్యాటర్ సంజూ శాంసన్ ఎదుర్కొన్న మొదటి బంతికే ఖాతా తెరవకుండానే మహ్మద్ సిరాజ్ బౌలింగ్లో అవుటయ్యాడు. ఆ వెంటనే కెప్టెన్ రుతురాజ్ గైక్వాడ్ సైతం 16 పరుగులకే సిరాజ్ వేసిన అద్భుతమైన బంతికి క్లీన్ బౌల్డ్ అయ్యాడు. పవర్ప్లే 6 ఓవర్లు ముగిసేసరికి చెన్నై జట్టు కేవలం 4 వికెట్లు కోల్పోయి పీకల్లోతు కష్టాల్లో మునిగిపోయింది. ఉర్విల్ పటేల్ సున్నా పరుగులకే వెనుతిరగగా, భారీ ఆశలు పెట్టుకున్న మ్యాథ్యూ షార్ట్ 24 పరుగులు చేసి పెవిలియన్ చేరాడు.
టాప్ ఆర్డర్ మొత్తం కుప్పకూలిన వేళ క్రీజులోకి వచ్చిన స్టార్ ఆల్రౌండర్ శివమ్ దూబే గుజరాత్ బౌలర్లపై ఒంటరి పోరాటం చేశాడు. మైదానం నలుమూలలా సిక్సర్లు, ఫోర్ల వర్షం కురిపిస్తూ కేవలం 17 బంతుల్లోనే 47 పరుగులతో చెన్నై అభిమానుల్లో ఆశలు రేకెత్తించాడు. అయితే, రషీద్ ఖాన్ వేసిన నెమ్మదిపాటి బంతిని భారీ షాట్ ఆడబోయిన దూబే.. గుజరాత్ కెప్టెన్ శుభ్మన్ గిల్ పట్టిన అద్భుతమైన డైవింగ్ క్యాచ్కు బలయ్యాడు. దూబే అవుటైన తర్వాత చెన్నై జట్టు పూర్తిగా మ్యాచ్పై ఆశలు వదిలేసుకుంది. మిడిల్ ఆర్డర్లో కార్తీక్ శర్మ 19 పరుగులకే రనౌట్ కావడం జట్టును మరింత దెబ్బతీసింది.
ఇన్నింగ్స్ 13వ ఓవర్ వేసిన గుజరాత్ స్పిన్ మాంత్రికుడు రషీద్ ఖాన్ ఒకే ఓవర్లో రెండు వికెట్లు తీసి చెన్నై పతనాన్ని శాసించాడు. క్రీజులో సెట్ అవ్వడానికి ప్రయత్నిస్తున్న డెవాల్డ్ బ్రెవిస్ (6 పరుగులు)ను క్లీన్ బౌల్డ్ చేయడంతో పాటు అన్షుల్ కాంబోజ్ను కూడా అదే ఓవర్లో పెవిలియన్ పంపాడు. మిస్టర్ 360 వెర్షన్ లాగా ఆడుతాడనుకున్న బ్రెవిస్ బ్యాట్ నుంచి ఈ మ్యాచ్లో ఆశించిన స్థాయిలో పరుగులు రాకపోవడం చెన్నై ఫ్యాన్స్ను తీవ్రంగా నిరాశపరిచింది. 13.4 ఓవర్లు ముగిసేసరికి చెన్నై స్కోరు 8 వికెట్ల నష్టానికి 140 పరుగులు మాత్రమే చేయగలిగింది.
టాస్ ఓడి మొదట బ్యాటింగ్ చేసిన గుజరాత్ టైటాన్స్ నిర్ణీత 20 ఓవర్లలో 4 వికెట్లు కోల్పోయి 229 పరుగుల భారీ స్కోరు సాధించింది. ఓపెనర్లు శుభ్మన్ గిల్ (64 రన్స్), సాయి సుదర్శన్ (84 రన్స్) తొలి వికెట్కు 125 పరుగుల భారీ భాగస్వామ్యాన్ని నెలకొల్పారు. ఆ తర్వాత వచ్చిన జోస్ బట్లర్ సైతం కేవలం 23 బంతుల్లోనే 57 పరుగులతో చెన్నై బౌలర్లను ఊచకోత కోశాడు. చెన్నై బౌలర్లలో ముఖేష్ చౌదరి, అన్షుల్ కాంబోజ్ చెరో వికెట్ తీసినప్పటికీ పరుగుల ప్రవాహాన్ని అడ్డుకోలేకపోయారు. లీగ్ దశలో ఆడిన 13 మ్యాచ్ల్లో 7 ఓటములతో చెన్నై టోర్నీ నుంచి వైదొలిగింది.