IND vs SL: భారత్ – శ్రీలంక తొలి వన్డే అక్కడ జరగదా.. బీసీసీఐకి ఊహించని షాక్..?
India vs Sri Lanka ODI: భారత్, శ్రీలంక వన్డే సిరీస్కు ముందే కీలక మార్పు చోటుచేసుకునే పరిస్థితి కనిపిస్తోంది. డిసెంబర్ 13న ఢిల్లీలో జరగాల్సిన తొలి వన్డేకు అరుణ్ జైట్లీ స్టేడియం అందుబాటులో ఉండదని ఢిల్లీ క్రికెట్ సంఘం బీసీసీఐకి తెలిపింది. స్టేడియంలో భారీ ఆధునికీకరణ పనులు చేపట్టనున్న నేపథ్యంలో మ్యాచ్ వేదిక మారే అవకాశం ఉంది.
Updated on: Sep 27, 2026 | 7:39 PM
India vs Sri Lanka ODI: భారత క్రికెట్ జట్టు (Team India), శ్రీలంక (Sri Lanka) మధ్య డిసెంబర్లో జరిగే వన్డే సిరీస్కు సంబంధించి కీలక మార్పు అవసరమయ్యే పరిస్థితి ఏర్పడింది. మూడు వన్డేల సిరీస్లో తొలి మ్యాచ్ డిసెంబర్ 13న ఢిల్లీలోని అరుణ్ జైట్లీ స్టేడియంలో జరగాల్సి ఉంది. కానీ ఆ తేదీన అంతర్జాతీయ మ్యాచ్ నిర్వహించేందుకు వేదిక అందుబాటులో ఉండదని ఢిల్లీ అండ్ డిస్ట్రిక్ట్ క్రికెట్ అసోసియేషన్ (DDCA) బీసీసీఐకి సమాచారం ఇచ్చింది. స్టేడియంలో పిచ్, ఔట్ఫీల్డ్ పునరుద్ధరణ పనులు చేపట్టాలని నిర్ణయించడమే ఇందుకు కారణంగా తెలుస్తోంది. అలాగే కొత్త డ్రైనేజీ వ్యవస్థ ఏర్పాటు, మౌలిక సదుపాయాల అభివృద్ధి పనులు కూడా ప్రణాళికలో ఉన్నాయి. ఈ పరిస్థితుల్లో భారత్-శ్రీలంక తొలి వన్డేను ఢిల్లీకి బదులుగా మరో వేదికలో నిర్వహించాల్సి రావొచ్చు.
శ్రీలంక జట్టు డిసెంబర్లో భారత్లో పర్యటించనుంది. ఈ టూర్లో మూడు వన్డేలు, మూడు టీ20లు జరగనున్నాయి. ముఖ్యంగా వన్డే సిరీస్కు ప్రాధాన్యం ఉంది. 2027 వన్డే ప్రపంచకప్ను దృష్టిలో పెట్టుకుని ఇరు జట్లు సన్నాహక దశలో ఉన్నాయి. అందుకే ఈ సిరీస్లోని మ్యాచ్లు కీలకంగా మారనున్నాయి.
అరుణ్ జైట్లీ స్టేడియం (Arun Jaitley Stadium)లో త్వరలో పునరుద్ధరణ పనులు చేపట్టాలని ఢిల్లీ క్రికెట్ సంఘం నిర్ణయించినట్లు సమాచారం. పిచ్, మైదానం రూపురేఖల మెరుగుదలతో పాటు ఆధునిక డ్రైనేజీ వ్యవస్థ ఏర్పాటు చేయనున్నారు. స్టేడియం మొత్తం మౌలిక వసతులను కూడా అప్గ్రేడ్ చేయాలని ప్రణాళిక సిద్ధమైంది.
ఈ కారణంగా భారత్-శ్రీలంక తొలి వన్డేకు ఢిల్లీ ఆతిథ్యం ఇవ్వడం సాధ్యం కాకపోవచ్చు. కేవలం అంతర్జాతీయ మ్యాచ్ మాత్రమే ప్రభావితం కావడం లేదు. గుజరాత్, సర్వీసెస్, మహారాష్ట్ర జట్లతో జరగాల్సిన రంజీ ట్రోఫీ మ్యాచ్లకు కూడా అరుణ్ జైట్లీ స్టేడియం అందుబాటులో ఉండదు.
మహిళల క్రికెట్, జూనియర్ విభాగాల మ్యాచ్లపై కూడా ఈ మార్పు ప్రభావం చూపనుంది. దేశవాళీ మ్యాచ్లకు అంతరాయం కలగకుండా పాలం, జామియా మిలియా వేదికలను ప్రత్యామ్నాయ మైదానాలుగా ఢిల్లీ క్రికెట్ సంఘం గుర్తించింది.
తొలి వన్డేకు కొత్త వేదిక ఏదనేది ఇంకా స్పష్టంగా తెలియాల్సి ఉంది. ప్రస్తుత షెడ్యూల్ ప్రకారం డిసెంబర్ 13న మ్యాచ్ జరగాల్సి ఉన్నా, ఢిల్లీ స్టేడియం పరిస్థితి కారణంగా వేదిక మార్పు అనివార్యమయ్యే అవకాశం ఉంది. బీసీసీఐ, సంబంధిత క్రికెట్ సంఘాల నిర్ణయంతో ఈ వ్యవహారంపై స్పష్టత వచ్చే అవకాశం ఉంది.
మరిన్ని క్రీడా వార్తల కోసం ఇక్కడ క్లిక్ చేయండి..!
