Video: నమన్ ధీర్ ఔట్‌పై వివాదం.. టిమ్ సీఫర్ట్ క్యాచ్‌పై దుమారం.. అసలేం జరిగిందంటే..?
Tim Seifert Catch Controversy: భారత్, న్యూజిలాండ్ మధ్య జరిగిన రెండో వన్డేలో ఓ వికెట్ తీవ్ర చర్చకు దారితీసింది. టీమిండియా యువ ఆటగాడు నామన్ ధీర్ క్యాచ్ పట్టి ఔట్ చేసిన విధానంపై అభిమానులు అనుమానాలు వ్యక్తం చేస్తున్నారు. బౌండరీ రోప్‌ను వెనక్కి జరిపారంటూ సోషల్ మీడియాలో విమర్శలు వెల్లువెత్తుతున్నాయి. అసలు మైదానంలో ఏం జరిగిందంటే?
Updated on: Nov 08, 2026 | 8:00 AM
Naman Dhir Dismissal: భారత్, న్యూజిలాండ్ (IND vs NZ) మధ్య జరిగిన రెండో వన్డే ఉత్కంఠభరితంగా సాగింది. తొలుత బ్యాటింగ్ చేసిన మిచెల్ సాంట్నర్ (Mitchell Santner) నేతృత్వంలోని న్యూజిలాండ్ జట్టు 134 పరుగులకే ఆలౌట్ అయింది. స్వల్ప లక్ష్యమే అయినప్పటికీ భారత జట్టుకు ఛేదన అంత సులభంగా సాగలేదు. క్రమం తప్పకుండా వికెట్లు కోల్పోవడంతో టీమిండియా 112 పరుగులకే ఏడు వికెట్లు కోల్పోయి కష్టాల్లో పడింది. ఈ క్రమంలో యువ ఆటగాడు నామన్ ధీర్ (Naman Dhir) ఔటైన తీరు వివాదానికి కారణమైంది.
టిమ్ సీఫర్ట్ క్యాచ్‌తో వివాదం!
రెండో ఇన్నింగ్స్‌లో 25వ ఓవర్ నాలుగో బంతికి నామన్ ధీర్ బ్యాక్ ఆఫ్ లెంగ్త్ బంతిని పుల్ షాట్ ఆడాడు. బంతి భారీ సిక్సర్‌గా వెళ్లేలా కనిపించింది. అయితే బౌండరీ దగ్గర ఉన్న న్యూజిలాండ్ ఓపెనర్ టిమ్ సీఫర్ట్ (Tim Seifert) అద్భుతంగా క్యాచ్ అందుకున్నాడు. దీంతో ధీర్ పెవిలియన్ చేరాల్సి వచ్చింది.
అయితే ఈ క్యాచ్‌పై మైదానంలో అనుమానాలు వ్యక్తమయ్యాయి. బౌండరీ రోప్‌కు సీఫర్ట్ చాలా దగ్గరగా ఉండటంతో థర్డ్ అంపైర్ పలుమార్లు రీప్లేలు పరిశీలించాడు. వివిధ కెమెరా కోణాల్లో క్యాచ్‌ను తనిఖీ చేసినప్పటికీ, అతడి పాదం బౌండరీ రోప్‌ను తాకినట్లు నిర్ధారించే స్పష్టమైన ఆధారం కనిపించలేదు. దీంతో నామన్ ధీర్‌ను ఔట్‌గా ప్రకటించారు.
బౌండరీ రోప్‌ను వెనక్కి జరిపారా?
అంపైర్ నిర్ణయంతో అభిమానులు సంతృప్తి చెందలేదు. ముఖ్యంగా బౌండరీ కుషన్ ఒకచోట మిగతా ప్రాంతాలతో పోలిస్తే కొంచెం వెనక్కి జరిపినట్లు కనిపించిందని కొందరు ఆరోపించారు. ఆ విషయాన్ని థర్డ్ అంపైర్ సరిగ్గా పరిశీలించలేదని విమర్శించారు.
ఒక అభిమాని స్పందిస్తూ.. ఫీల్డర్ కాలు ఉన్న ప్రాంతంలో బౌండరీ కుషన్ మిగతా వాటికంటే కొంత వెనక్కి జరిపినట్లు కనిపించిందని పేర్కొన్నాడు. దీంతో నామన్ ధీర్‌కు అన్యాయం జరిగిందంటూ పలువురు సోషల్ మీడియాలో తమ అభిప్రాయాలు వ్యక్తం చేశారు. అయితే క్యాచ్ విషయంలో ఎలాంటి ఉద్దేశపూర్వక తప్పిదం జరిగినట్లు అధికారికంగా నిర్ధారణ కాలేదు.
నామన్ ధీర్ ఫామ్ ఎలా ఉందంటే?
ఈ సిరీస్‌లో నామన్ ధీర్‌కు ఇప్పటివరకు పెద్దగా కలిసిరాలేదు. తొలి రెండు వన్డేల్లో కలిపి 17 పరుగులు మాత్రమే చేశాడు. మరోవైపు న్యూజిలాండ్‌తో జరిగిన టీ20 సిరీస్‌లో ఐదు ఇన్నింగ్స్‌ల్లో 138 పరుగులు సాధించాడు. టీ20ల్లో బౌలింగ్ చేసే అవకాశం దక్కినా, వన్డేల్లో మాత్రం ఇప్పటివరకు బంతిని అందుకునే అవకాశం రాలేదు.
అంతర్జాతీయ క్రికెట్‌లో తొలి భారీ ఇన్నింగ్స్ కోసం ఎదురుచూస్తున్న నామన్ ధీర్‌కు ఈ వివాదాస్పద ఔట్ మరో నిరాశగా మిగిలింది.
మరిన్ని క్రీడా వార్తల కోసం ఇక్కడ క్లిక్ చేయండి..
