U19 Womens T20 World Cup 2027: అండర్-19 మహిళల ప్రపంచకప్ షెడ్యూల్ వచ్చేసింది.. భారత్ మ్యాచ్‌లు ఎప్పుడంటే?
U19 Womens T20 World Cup 2027: ఐసీసీ అండర్-19 మహిళల టీ20 ప్రపంచకప్ 2027 షెడ్యూల్ విడుదలైంది. జనవరి 21 నుంచి ఫిబ్రవరి 6 వరకు బంగ్లాదేశ్, నేపాల్‌లో 16 జట్లు పోటీ పడనున్నాయి. భారత్ జనవరి 22న వెస్టిండీస్‌తో తొలి మ్యాచ్ ఆడుతుంది. జనవరి 24న నేపాల్‌తో, జనవరి 26న ఐర్లాండ్‌తో తలపడుతుంది. వరుసగా మూడోసారి టైటిల్ గెలవడమే భారత యువ జట్టు లక్ష్యం.
U19 Womens T20 World Cup 2027: అండర్-19 మహిళల టీ20 ప్రపంచకప్ 2027 షెడ్యూల్‌ను అంతర్జాతీయ క్రికెట్ మండలి (ఐసీసీ) ప్రకటించింది. ఈ టోర్నీ జనవరి 21 నుంచి ఫిబ్రవరి 6 వరకు బంగ్లాదేశ్, నేపాల్ వేదికలుగా జరగనుంది. మొత్తం 16 జట్లు 41 మ్యాచ్‌ల్లో తలపడనున్నాయి. గత రెండు ఎడిషన్లలోనూ ఛాంపియన్‌గా నిలిచిన భారత యువ మహిళల జట్టు ఈసారి కూడా టైటిల్ నిలబెట్టుకోవడమే లక్ష్యంగా బరిలోకి దిగనుంది. 2023లో తొలి టైటిల్ సాధించిన భారత్, 2025లోనూ విజేతగా నిలిచింది. ఇప్పుడు వరుసగా మూడోసారి ట్రోఫీ గెలిస్తే మరో ఘనత సాధించినట్లవుతుంది.
జనవరి 22న వెస్టిండీస్‌తో తొలి మ్యాచ్
భారత జట్టు గ్రూప్-ఏలో ఉంది. ఈ గ్రూపులో వెస్టిండీస్, ఐర్లాండ్, ఆతిథ్య నేపాల్ జట్లు కూడా ఉన్నాయి. భారత్ తన తొలి మ్యాచ్‌ను జనవరి 22న వెస్టిండీస్‌తో ఆడనుంది. ఈ పోరు నేపాల్ రాజధాని ఖాట్మండు సమీపంలోని కిర్తిపూర్‌లో ఉన్న టీయూ ఇంటర్నేషనల్ క్రికెట్ స్టేడియంలో జరగనుంది. ఆ తర్వాత జనవరి 24న నేపాల్‌తో, జనవరి 26న ఐర్లాండ్‌తో భారత జట్టు తలపడుతుంది. గ్రూప్ దశలో ఈ మూడు మ్యాచ్‌లు భారత్‌కు కీలకం కానున్నాయి. మంచి ప్రదర్శనతో సూపర్ సిక్స్ దశకు చేరుకోవడంపై జట్టు దృష్టి పెట్టనుంది.
నాలుగు గ్రూపుల్లో 16 జట్లు
టోర్నీలో పాల్గొనే జట్లను నాలుగు గ్రూపులుగా విభజించారు. గ్రూప్-ఏలో భారత్, ఐర్లాండ్, వెస్టిండీస్, నేపాల్ ఉన్నాయి. గ్రూప్-బీలో సౌతాఫ్రికా, న్యూజిలాండ్, పాకిస్థాన్, సమోవా తలపడతాయి. గ్రూప్-సీలో ఆస్ట్రేలియా, బంగ్లాదేశ్, నైజీరియా, యూఏఈ ఉన్నాయి. గ్రూప్-డీలో ఇంగ్లండ్, శ్రీలంక, అమెరికా, స్కాట్లాండ్ పోటీ పడతాయి. గ్రూప్ దశ జనవరి 26తో ముగుస్తుంది. ప్రతి గ్రూపులో తొలి మూడు స్థానాల్లో నిలిచిన జట్లు సూపర్ సిక్స్ దశకు అర్హత సాధిస్తాయి. అక్కడి నుంచి సెమీఫైనల్‌కు వెళ్లేందుకు పోటీ మరింత ఉత్కంఠగా మారనుంది.
బంగ్లాదేశ్, నేపాల్‌లో మ్యాచ్‌లు
ఈ ప్రపంచకప్ మ్యాచ్‌లు బంగ్లాదేశ్‌లోని చట్టోగ్రామ్, సిల్హెట్‌తో పాటు నేపాల్‌లోని ఖాట్మండులో నిర్వహించనున్నారు. మొత్తం నాలుగు మైదానాలను ఎంపిక చేశారు. జనవరి 21న నాలుగు మ్యాచ్‌లతో టోర్నీ ప్రారంభమవుతుంది. తొలి రోజే ఆతిథ్య బంగ్లాదేశ్ జట్టు యూఏఈతో తలపడనుంది. యువ క్రికెటర్లకు అంతర్జాతీయ స్థాయిలో తమ ప్రతిభ చూపించేందుకు ఈ టోర్నీ మంచి వేదికగా నిలవనుంది.
ఫిబ్రవరి 6న ఫైనల్
సూపర్ సిక్స్ దశ ముగిసిన తర్వాత ఫిబ్రవరి 4న సెమీఫైనల్ మ్యాచ్‌లు జరగనున్నాయి. వర్షం లేదా ఇతర కారణాలతో మ్యాచ్‌లు జరగకపోతే ఫిబ్రవరి 5ను రిజర్వ్ డేగా కేటాయించారు. ఫైనల్ ఫిబ్రవరి 6న చట్టోగ్రామ్‌లో జరగనుంది. ఆ మ్యాచ్‌కు కూడా ఫిబ్రవరి 7ను రిజర్వ్ డేగా నిర్ణయించారు. గత రెండు టోర్నీల్లోనూ ఆధిపత్యం చూపిన భారత యువ జట్టు ఈసారి ఎలాంటి ప్రదర్శన చేస్తుందో చూడాలి. వరుసగా మూడో టైటిల్ గెలిస్తే అండర్-19 మహిళల క్రికెట్‌లో భారత్ తన ఆధిపత్యాన్ని మరోసారి చాటినట్లవుతుంది.
మరిన్ని క్రీడా వార్తల కోసం ఇక్కడ క్లిక్ చేయండి..