WTC Final: జూన్‌లో డబ్ల్యూటీసీ ఫైనల్.. ప్రకటించిన ఐసీసీ.. ట్రోఫీ పోరులో భారత్ వర్సెస్ ఆస్ట్రేలియా?

india vs australia test series

అంతర్జాతీయ క్రికెట్ కౌన్సిల్ (ICC) ఫిబ్రవరి 8, బుధవారం ప్రపంచ టెస్ట్ ఛాంపియన్‌షిప్ ఫైనల్ (WTC Final) తేదీలను ప్రకటించింది. 2021-23 ప్రపంచ టెస్ట్ ఛాంపియన్‌షిప్ చివరి మ్యాచ్ లండన్‌లోని ఓవల్‌ మైదానంలో జూన్ 7 నుంచి 11 వరకు జరుగుతుందని పేర్కొంది. ఫైనల్ మ్యాచ్‌కు జూన్ 12ని రిజర్వ్ డేగా ఉంచారు. ప్రపంచ టెస్ట్ ఛాంపియన్‌షిప్ మొదటి ఎడిషన్ చివరి మ్యాచ్ సౌతాంప్టన్‌లో భారత్ వర్సెస్ న్యూజిలాండ్ మధ్య జరిగింది. ఇందులో న్యూజిలాండ్ 8 వికెట్ల తేడాతో భారత్‌ను ఓడించింది.

ఫైనల్‌ మ్యాచ్‌లో భారత్‌ వర్సెస్ ఆస్ట్రేలియా?

ఈసారి ప్రపంచ టెస్టు ఛాంపియన్‌షిప్‌లో చివరి మ్యాచ్‌ భారత్‌, ఆస్ట్రేలియా మధ్య జరగనుంది. ప్రపంచ టెస్ట్ ఛాంపియన్‌షిప్ ర్యాంకింగ్స్‌లో ఆస్ట్రేలియా 75.56 విజయాల శాతంతో నంబర్ వన్ స్థానంలో ఉంది. అదే సమయంలో భారత జట్టు 58.93 విజయాల శాతంతో రెండవ స్థానంలో ఉంది. ఇలాంటి పరిస్థితుల్లో ఈ రెండు జట్ల మధ్యే ఫైనల్ ఉండే అవకాశాలు పుష్కలంగా ఉన్నాయి.

బోర్డర్-గవాస్కర్ ట్రోఫీ తర్వాత నిర్ణయం..

ఫిబ్రవరి 9 నుంచి భారత్ వర్సెస్ ఆస్ట్రేలియా మధ్య జరిగే బోర్డర్-గవాస్కర్ ట్రోఫీ ద్వారా ఫైనలిస్ట్ జట్లను నిర్ణయించనున్నారు. ప్రపంచ టెస్ట్ ఛాంపియన్‌షిప్‌లో ఫైనల్ ఆడాలంటే, బోర్డర్-గవాస్కర్ సిరీస్‌లో టీమిండియా కనీసం 3-1తో ఆస్ట్రేలియాను ఓడించాలి. లేకుంటే జట్టు ఫైనల్‌కు చేరుకోవడానికి ఇతర జట్ల ఫలితాలపై ఆధారపడాల్సి ఉంటుంది. ప్రపంచ టెస్ట్ ఛాంపియన్‌షిప్ ర్యాంకింగ్స్‌లో శ్రీలంక 53.33 విజయ శాతంతో మూడో స్థానంలో నిలిచింది. మార్చి 9 నుంచి న్యూజిలాండ్, శ్రీలంక మధ్య రెండు టెస్టుల సిరీస్ జరగనుంది.

బోర్డర్ గవాస్కర్ సిరీస్ ఫుల్ షెడ్యూల్..

ఇండియా వర్సెస్ ఆస్ట్రేలియా (1వ టెస్ట్) – నాగ్‌పూర్, ఇండియా, ఫిబ్రవరి 9-13.

ఇండియా వర్సెస్ ఆస్ట్రేలియా (2వ టెస్ట్) – ఢిల్లీ, ఇండియా, ఫిబ్రవరి 17-21.

భారత్ వర్సెస్ ఆస్ట్రేలియా (3వ టెస్టు) – ధర్మశాల, ఇండియా, మార్చి 1-5.

భారత్ వర్సెస్ ఆస్ట్రేలియా (4వ టెస్టు) – అహ్మదాబాద్, ఇండియా, మార్చి 9-13.

మరిన్ని క్రీడా వార్తల కోసం ఇక్కడ క్లిక్ చేయండి..