Video: వృద్ధ వీరాభిమాని రిక్వెస్ట్.. పెద్ద మనసు చాటుకున్న రోహిత్, కోహ్లీ.. వీడియో వైరల్
Team India Viral Video: న్యూజిలాండ్‌లోని మౌంట్ మాంగనుయ్‌లో టీమిండియా ప్రాక్టీస్ సందర్భంగా ఓ వృద్ధ అభిమాని చేసిన అరుదైన ఫొటో రిక్వెస్ట్‌కు రోహిత్ శర్మ, విరాట్ కోహ్లీ, కెప్టెన్ శ్రేయస్ అయ్యర్ సహా యావత్ జట్టు సంతోషంగా అంగీకరించింది. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
Team India Viral Video: క్రికెట్ మైదానంలో పరుగులు, వికెట్లకే కాదు.. అభిమానానికి, ఆప్యాయతకు కూడా చోటుందని టీమిండియా మరోసారి నిరూపించింది. న్యూజిలాండ్ పర్యటనలో భాగంగా నాలుగో వన్డేకు ముందు మౌంట్ మాంగనుయ్‌లో ప్రాక్టీస్ చేస్తున్న భారత జట్టును ఓ వృద్ధ స్థానిక అభిమాని కలిశారు. ఆయన చేసిన ఓ ఆసక్తికరమైన ఫొటో రిక్వెస్ట్ ఇప్పుడు యావత్ క్రికెట్ ప్రపంచాన్ని కదిలిస్తోంది.
ప్రాక్టీస్ సెషన్ ముగిసిన తర్వాత ఆ పెద్దాయన జట్టును సమీపించి.. “మీ అందరితో కలిసి ఒక గ్రూప్ ఫొటో దిగాలనుకుంటున్నాను. అయితే అందులో రోహిత్ శర్మ, విరాట్ కోహ్లీ, కెప్టెన్ శ్రేయస్ అయ్యర్ నా పక్కన ముందు వరుసలో ఉండాలి” అని సున్నితంగా కోరారు.
ఏడేళ్ల నాటి జ్ఞాపకం..
ఆయన కోరిక వెనుక ఉన్న కారణం తెలిస్తే ఎవరైనా భావోద్వేగానికి గురికాక తప్పదు. “సుమారు ఏడేళ్ల క్రితం రోహిత్ శర్మ ముందు వరుసలో ఉండగా ఇలాగే ఒక ఫొటో దిగాను. ఇప్పుడు మళ్లీ రోహిత్ ముందు ఉండగా, ప్రస్తుత కెప్టెన్‌తో కలిసి మరో జ్ఞాపకాన్ని దాచుకోవాలనుకుంటున్నాను” అని ఆ వృద్ధ అభిమాని చెప్పారు.
ఆ మాటలు విన్న వెంటనే రోహిత్ శర్మ చిరునవ్వుతో అంగీకరించారు. విరాట్ కోహ్లీ, శ్రేయస్ అయ్యర్ కూడా ఎంతో ఆప్యాయంగా ముందుకు వచ్చారు.
కోరిక తీర్చిన టీమిండియా..
అభిమాని కోరినట్లుగానే రోహిత్ శర్మ, విరాట్ కోహ్లీ, కెప్టెన్ శ్రేయస్ అయ్యర్ ముందు వరుసలో నిలబడగా, మిగతా ఆటగాళ్లు, సిబ్బంది వెనుక వరుసలో నిలబడి ఫొటోకు పోజిచ్చారు. ఆ సమయంలో మైదానంలో నెలకొన్న ఆత్మీయ వాతావరణం చూపరులను కట్టిపడేసింది. విదేశీ గడ్డపై ఓ వృద్ధుడి పట్ల భారత ఆటగాళ్లు చూపిన గౌరవం, వినయం అక్కడున్న వారందరినీ ఆకట్టుకుంది.
కాగా, టెస్టు సిరీస్ సన్నద్ధత కోసం శుభ్‌మన్ గిల్ తప్పుకోవడంతో నాలుగో వన్డేలో శ్రేయస్ అయ్యర్ జట్టును నడిపించనున్న సంగతి తెలిసిందే. ఈ నేపథ్యంలో జట్టు ప్రాక్టీస్‌లో బిజీగా ఉన్నప్పటికీ అభిమాని కోసం సమయం కేటాయించడం విశేషంగా నిలిచింది.
సోషల్ మీడియాలో ప్రశంసల వెల్లువ..
ఈ ఘటనకు సంబంధించిన వీడియో ప్రస్తుతం సోషల్ మీడియాలో విస్తృతంగా వైరల్ అవుతోంది. “డౌన్ టు ఎర్త్ టీమిండియా”, “అభిమానులే నిజమైన బలం” అంటూ నెటిజన్లు భారత ఆటగాళ్లపై ప్రశంసల వర్షం కురిపిస్తున్నారు. క్రికెట్ అంటే కేవలం గెలుపోటములు మాత్రమే కాదు.. అది మనుషులను కలిపే అనుబంధమని ఈ ఒక్క ఫొటో మరోసారి రుజువు చేసిందని అభిమానులు వ్యాఖ్యానిస్తున్నారు.