బంగ్లాపై ఇజ్జత్ పాయే.. కట్చేస్తే.. టీమిండియాతో పోరుకు వైభవ్ జిరాక్స్ను దింపుతోన్న ఆసీస్
Border Gavaskar Trophy: సొంతగడ్డపై బంగ్లాదేశ్ చేతిలో ఘోర పరాజయం ఆస్ట్రేలియా క్రికెట్ జట్టును తీవ్ర ఆలోచనలో పడేసింది. త్వరలో భారత్తో జరగనున్న ప్రతిష్టాత్మక బోర్డర్-గావస్కర్ ట్రోఫీ కోసం కంగారూలు ముందస్తు వ్యూహాలు రచిస్తున్నారు. ఇందులో భాగంగా ఒక 19 ఏళ్ల యువ బ్యాటర్ను సర్ప్రైజ్ వెపన్గా సిద్ధం చేస్తుండటం ఇప్పుడు క్రీడా వర్గాల్లో తీవ్ర ఆసక్తి రేపుతోంది.
Updated on: Aug 18, 2026 | 2:34 PM
Border Gavaskar Trophy: డార్విన్ వేదికగా జరిగిన మ్యాచ్లో బంగ్లాదేశ్ చేతిలో 9 వికెట్ల తేడాతో చిత్తుగా ఓడిపోవడం పాట్ కమిన్స్ సేనను ఉలిక్కిపడేలా చేసింది. సొంతగడ్డపై ఆ జట్టుకు బంగ్లా చేతిలో ఎదురైన తొలి పరాజయం ఇదే కావడం విశేషం. నంబర్ వన్ టెస్టు జట్టుగా కొనసాగుతున్న ఆస్ట్రేలియాకు బ్యాటింగ్ విభాగం అతిపెద్ద బలహీనతగా మారింది. స్టీవ్ స్మిత్, కామెరూన్ గ్రీన్ లాంటి స్టార్లు కాస్త రాణించినప్పటికీ జట్టును పటిష్ట స్థితిలో నిలపలేకపోయారు. ఈ అనూహ్య పరాజయంతో జాతీయ సెలెక్టర్లు వెంటనే అప్రమత్తమయ్యారు. రాబోయే ముఖ్యమైన సిరీస్లను దృష్టిలో ఉంచుకుని టెస్టు జట్టులో భారీ మార్పులు చేసేందుకు సిద్ధమయ్యారు. ముఖ్యంగా భారత్తో జరగనున్న సిరీస్ కోసం ఏమాత్రం రాజీ పడకూడదని ఆసీస్ మేనేజ్మెంట్ గట్టి పట్టుదలతో ఉంది. కొత్త కుర్రాళ్లకు అవకాశం ఇవ్వడం ద్వారా జట్టులో నూతన ఉత్సాహం నింపాలని క్రికెట్ ఆస్ట్రేలియా బోర్డు బలంగా విశ్వసిస్తోంది.
తెరపైకి ఆలివర్ పీక్.. లబుషేన్కు చెక్..!
బ్యాటింగ్ లైనప్ను బలోపేతం చేసే క్రమంలో సెలెక్టర్ల కన్ను 19 ఏళ్ల ఆలివర్ పీక్ పై పడింది. విక్టోరియాకు చెందిన ఈ యువ ఆటగాడికి ఫస్ట్-క్లాస్ క్రికెట్లో పెద్దగా అనుభవం లేకపోయినా, అతడి అపారమైన ప్రతిభ సెలెక్టర్లను విపరీతంగా ఆకర్షించింది. ఇప్పటికే నాలుగు వన్డేలు ఆడిన ఈ కుర్రాడు.. త్వరలో జింబాబ్వే పర్యటనకు వెళ్లనున్నాడు. ఆ తర్వాత దక్షిణాఫ్రికాతో జరిగే సిరీస్కు దూరంగా ఉంటూ, ఆస్ట్రేలియా-ఏ జట్టు తరఫున అనధికారిక టెస్టులు ఆడేందుకు నేరుగా భారత్కు రానున్నాడు. ఆలివర్ను టెస్టు జట్టు భవిష్యత్ ఆశాకిరణంగా బోర్డు తీర్చిదిద్దుతోంది.
మరోవైపు స్టార్ బ్యాటర్ మార్నస్ లబుషేన్ స్థానం తీవ్ర ప్రమాదంలో పడింది. 2023 జులై నుంచి అతడు టెస్టుల్లో ఒక్క సెంచరీ కూడా నమోదు చేయలేదు. అప్పటి నుంచి కేవలం 25.1 సగటుతో మాత్రమే పరుగులు రాబట్టాడు. అతడి పేలవ ఫామ్ జట్టును కలవరపెడుతోంది. మూడో స్థానంలో ఆడుతున్న అతడికి ప్రత్యామ్నాయంగా కర్టిస్ ప్యాటర్సన్, నాథన్ మెక్స్వీనీలను సిద్ధం చేసే పనిలో క్రికెట్ ఆస్ట్రేలియా నిమగ్నమైంది.
రెన్షా రీఎంట్రీ.. బౌలింగ్ విభాగంలోనూ కొత్త రక్తం..
క్రీజులో ఏమాత్రం ప్రభావం చూపలేకపోతున్న ఆటగాళ్లపై సెలెక్టర్లు వేటు వేస్తున్నారు. మకాయ్ వేదికగా జరిగే రెండో టెస్టు కోసం జట్టులో కీలక మార్పులు చేశారు. తొలి మ్యాచ్లో వరుసగా 23, 0 పరుగులతో దారుణంగా విఫలమైన జేక్ వెదరాల్డ్ను పక్కనపెట్టి, అతడి స్థానంలో మాట్ రెన్షాను వెనక్కి పిలిపించారు. ఇటీవల ముగిసిన షెఫీల్డ్ షీల్డ్ టోర్నీలో రెన్షా 10 ఇన్నింగ్స్లలో ఏకంగా 3 సెంచరీలతో 499 పరుగులు సాధించి అద్భుతమైన ఫామ్లో ఉన్నాడు. తన కెరీర్లో ఇప్పటివరకు 14 టెస్టులు ఆడిన ఈ లెఫ్ట్ హ్యాండ్ బ్యాటర్.. 29.31 సగటుతో 645 పరుగులు చేశాడు. 2023లో ఢిల్లీ వేదికగా టీమిండియాపైనే అతడు తన చివరి టెస్టు మ్యాచ్ ఆడటం మరో ఆసక్తికరమైన అంశం.
బ్యాటింగ్తో పాటు బౌలింగ్ విభాగంపై కూడా ఆస్ట్రేలియా బోర్డు ప్రత్యేక దృష్టి సారించింది. ప్రస్తుతం టీంలో ఉన్న పేస్ త్రయం మిచెల్ స్టార్క్, పాట్ కమిన్స్, జోష్ హేజిల్వుడ్ వయసు 30ఏళ్లు దాటింది. రిజర్వ్ బెంచ్పై ఉన్న స్కాట్ బోలాండ్ వయసు సైతం 37 ఏళ్లు. ఈ క్రమంలో భవిష్యత్తు అవసరాల కోసం కొత్త పేసర్ల వేట మొదలైంది. 31 ఏళ్ల బిల్లీ స్టాన్లేక్, 29 ఏళ్ల లియామ్ హాచర్ తో పాటు లెఫ్ట్ ఆర్మ్ పేసర్ బెన్ ద్వార్షుయిస్ పేర్లను బోర్డు నిశితంగా పరిశీలిస్తోంది. ఫ్యూచర్ స్టార్గా భావిస్తున్న 20 ఏళ్ల కల్లమ్ విడ్లర్ పేరు వినిపించినా, అతడు వెన్నెముక గాయంతో ఇబ్బంది పడుతున్నాడు.
పేసర్ల సంగతి పక్కనబెడితే, స్పిన్ దిగ్గజం నాథన్ లియోన్ కెరీర్ కూడా దాదాపు చివరి దశకు చేరుకుంది. భారత్లో జరిగే బోర్డర్-గావస్కర్ ట్రోఫీ నాటికి అతడికి సరైన వారసుడిని సిద్ధం చేయాల్సిన బాధ్యత బోర్డుపై ఉంది. ఉపఖండపు పిచ్లపై స్పిన్నర్ల పాత్ర అత్యంత కీలకం కాబట్టి టాడ్ మర్ఫీ, కోరీ రొచిసియోలీ లాంటి యువ స్పిన్నర్లకు ఎక్కువ అవకాశాలు ఇచ్చి సానపట్టాలని సెలెక్టర్లు వ్యూహరచన చేస్తున్నారు.
ఎక్కువమంది చదివినది: హార్దిక్ పాండ్యా అంత తోపుగాడా.. బీసీసీఐపై గవాస్కర్ సంచలన వ్యాఖ్యలు!
అనూహ్య ఓటమి నేర్పిన గుణపాఠంతో ఆస్ట్రేలియా జట్టు ప్రక్షాళన దిశగా వేగంగా అడుగులు వేస్తోంది. ప్రతిభావంతులైన యువ ఆటగాళ్లను జట్టులోకి తీసుకురావడం ద్వారా రాబోయే బోర్డర్-గావస్కర్ ట్రోఫీకి పూర్తిస్థాయిలో సన్నద్ధం కావాలని భావిస్తోంది. టీమిండియా లాంటి బలమైన ప్రత్యర్థిని సొంతగడ్డపై నిలువరించాలంటే కంగారూలు తీసుకుంటున్న ఈ కీలక మార్పులు అత్యంత ప్రభావితం చేయనున్నాయి.
మరిన్ని క్రికెట్ వార్తల కోసం ఇక్కడ క్లిక్ చేయండి..
