Video : విరాట్ కోహ్లీ ముసలోడు.. నేను ఇంకా యంగ్.. ఐపీఎల్ ఫైనల్కు ముందు భువి షాకింగ్ కామెంట్స్
Bhuvneshwar Kumar : ఐపీఎల్ ఫైనల్ మహాసంగ్రామానికి ముందు భువనేశ్వర్ కుమార్ తన తోటి ఆటగాడు, రన్ మెషిన్ విరాట్ కోహ్లీని ఉద్దేశించి చేసిన కొన్ని సరదా వ్యాఖ్యలు ఇప్పుడు సోషల్ మీడియాలో తెగ హల్చల్ చేస్తున్నాయి. కోహ్లీని ముసలోడు అంటూ భువి కామెంట్ చేయడంతో ఈ వీడియో కాస్తా నెట్టింట వైరల్గా మారింది.
Video : ఐపీఎల్ 2026 సీజన్ ముగింపునకు వస్తున్న వేళ, రాయల్ ఛాలెంజర్స్ బెంగళూరు (RCB) జట్టు వరుసగా రెండోసారి ఫైనల్లోకి దూసుకెళ్లింది. ఆర్సీబీ ఈ రేంజ్ సక్సెస్ సాధించడంలో బ్యాటర్లతో పాటు బౌలర్లు కూడా ప్రాణం పెట్టి ఆడారు. ముఖ్యంగా టీమిండియా సీనియర్ స్వింగ్ కింగ్ భువనేశ్వర్ కుమార్ ఈ సీజన్లో ఆర్సీబీ తరఫున నిప్పులు చెరిగే బౌలింగ్తో ప్రత్యర్థి జట్లను వణికించాడు. అయితే, ఐపీఎల్ ఫైనల్ మహాసంగ్రామానికి ముందు భువనేశ్వర్ కుమార్ తన తోటి ఆటగాడు, రన్ మెషిన్ విరాట్ కోహ్లీని ఉద్దేశించి చేసిన కొన్ని సరదా వ్యాఖ్యలు ఇప్పుడు సోషల్ మీడియాలో తెగ హల్చల్ చేస్తున్నాయి. కోహ్లీని ముసలోడు అంటూ భువి కామెంట్ చేయడంతో ఈ వీడియో కాస్తా నెట్టింట వైరల్గా మారింది.
ఆర్సీబీ సోషల్ మీడియా హ్యాండిల్ విడుదల చేసిన ఒక ప్రత్యేక ఇంటర్వ్యూ వీడియోలో భువనేశ్వర్ కుమార్ ఈ ఆసక్తికర వ్యాఖ్యలు చేశాడు. ఆ టాక్ షోలో యాంకర్ భువిని ఒక ఫన్నీ ప్రశ్న అడిగాడు. “భువి.. అందరూ ఈ వయసులో కూడా నువ్వు చాలా అద్భుతంగా బౌలింగ్ చేస్తున్నావని పొగుడుతున్నారు కదా.. నీకేమైనా ముసలితనం వచ్చేసినట్లు అనిపిస్తోందా?” అని యాంకర్ ప్రశ్నించాడు. దానికి భువి నవ్వుతూ “అస్సలు లేదు.. నేను ఇంకా ముసలాడిని కాలేదు” అని సమాధానమిచ్చాడు.
యాంకర్ అంతటితో వదలకుండా.. “కానీ నువ్వు, విరాట్ కోహ్లీ ఒకే వయసు వాళ్లు కదా భయ్యా?” అంటూ మరో ప్రశ్న వేశాడు. దానికి భువనేశ్వర్ కుమార్ కౌంటర్ ఇస్తూ.. “అవును, మేమిద్దరం ఒకే వయసు వాళ్లమే.. కానీ బహుశా విరాట్ కోహ్లీకి ముసలితనం వచ్చేసిందేమో, నాకైతే ఇంకా రాలేదు!” అని చాలా సరదాగా నవ్వుతూ జవాబిచ్చాడు. ఈ ఇద్దరు సీనియర్ క్రికెటర్ల మధ్య ఉన్న మంచి అనుబంధం వల్లే భువి అంత సరదాగా కామెంట్ చేయగలిగాడు. దాంతో ఆర్సీబీ ఫ్యాన్స్ ఈ వీడియోను తెగ షేర్ చేస్తున్నారు.
WTF!! Bro Bhuvneshwar Kumar you should hesitate sometimes💀
Only Bhuvi can take a dig on Virat Kohli!! pic.twitter.com/WxrOl7gmCw
— Gagan Choudhary (@trigguuuu) May 28, 2026
ఐపీఎల్ 2026 లో భువనేశ్వర్ కుమార్ బౌలింగ్ పాత రోజులను గుర్తు చేస్తోంది. కొత్త బంతితో స్వింగ్ చేస్తూ, పాత బంతితో యార్కర్లు వేస్తూ వికెట్ల పండగ చేసుకుంటున్నాడు. ఈ సీజన్లో ఇప్పటివరకు ఆడిన 15 మ్యాచ్ల్లో భువి ఏకంగా 26 వికెట్లు పడగొట్టి సంచలనం సృష్టించాడు. అది కూడా కేవలం 8 ఎకానమీ రేటుతో మాత్రమే పరుగులు ఇవ్వడం అతని కంట్రోల్కు నిదర్శనం.
ప్రస్తుతం అత్యధిక వికెట్లతో భువనేశ్వర్ కుమార్ టోర్నమెంట్లో పర్పుల్ క్యాప్ రేస్లో మొదటి స్థానంలో ఉన్నాడు. ఫైనల్ మ్యాచ్లో కూడా ఒకటి రెండు వికెట్లు తీస్తే ఈ సీజన్ పర్పుల్ క్యాప్ విజేతగా భువి చరిత్ర సృష్టించడం ఖాయం. ఒకవైపు భువి బౌలింగ్లో అదరగొడుతుంటే.. మరోవైపు విరాట్ కోహ్లీ తన బ్యాటింగ్తో సరికొత్త రికార్డులను బద్దలు కొడుతున్నాడు. ఈ ఐపీఎల్ సీజన్లో కూడా కోహ్లీ 600 పరుగుల మైలురాయిని చాలా ఈజీగా దాటేశాడు. ఐపీఎల్ చరిత్రలోనే నాలుగు వేర్వేరు సీజన్లలో 600 కంటే ఎక్కువ పరుగులు చేసిన ఏకైక బ్యాటర్గా కోహ్లీ సరికొత్త రికార్డు లిఖించాడు.
ఈ సీజన్లో ఆడిన 15 మ్యాచ్ల్లో కోహ్లీ 50 సగటుతో, 160 కి పైగా స్ట్రైక్ రేట్తో సరిగ్గా 600 పరుగులు చేశాడు. ఇందులో ఒక సెంచరీ, నాలుగు హాఫ్ సెంచరీలు ఉన్నాయి. ఇప్పుడు జరగబోయే ఫైనల్ మ్యాచ్లో విరాట్ కోహ్లీ బ్యాట్, భువనేశ్వర్ కుమార్ బౌలింగ్ గనుక క్లిక్ అయితే ఆర్సీబీ వరుసగా రెండోసారి ఐపీఎల్ ట్రోఫీని ముద్దాడటం ఖాయమని ఫ్యాన్స్ ధీమాగా ఉన్నారు.
మరిన్ని క్రీడా వార్తల కోసం ఇక్కడ క్లిక్ చేయండి..