Sankranti: కోనసీమలో ముందే మొదలైన సంక్రాంతి సంబరాలు.. నేటి తరానికి సాంప్రదాయ వంటలు, వేడుకలను పరిచయం చేస్తూ..

Sankranti 2024

హిందువులు జరుపుకునే పండగల్లో పెద్ద పండగ సంక్రాంతి. ఈ పండగ పేరు చెబితే చాలు ముందుగా అందరి మదిలో మెదిలేది గోదావరి జిల్లాలు. నెల రోజుల ముందు నుంచే పల్లెల్లో సంక్రాంతి సంబరాలు మొదలవుతాయి. ముంగిట ముత్యాల ముగ్గులు, ముగ్గుల్లో గొబ్బెమ్మలు.. హరిదారు కీర్తనలు, గంగి రెద్దు ఆటలు.. కొత్త అల్లుళ్ళు, కోడి పందాలతో సంక్రాంతి సంబరాలు నిండిపోతాయి. అయితే కాలంలో వచ్చిన మార్పుల్లో భాగంగా పల్లెలు పట్నాల బాట పట్టాయి. ఎంత బిజీ బిజీ లైఫ్ తో ఉన్నా సరే.. సంక్రాంతి వస్తే చాలు నగర వాసులు తమ సొంతూళ్లకు పయనం అవుతారు. తమ ఫ్యామిలీ సభ్యులతో స్నేహితులతో సరదాగా గడపడానికి ఈ పండగే ఒక వేదికగా మలచుకుంటున్నారు.

సంక్రాంతిని గోదావరి జిల్లా వాసులు నాలుగు రోజుల పాటు జరుపుకుంటారు. బోగి, మకర సంక్రాంతి,  కనుమ, ముక్కనుమ గా జరుపుకుంటారు. ఈ సంబరాలను నేటి తరం కూడా మరచిపోకుండా కొన్ని పాఠశాలలు తమ విద్యార్థులతో ముందుగానే జరుపుకుంటున్నారు. ఈ సంక్రాంతి వేడుకల్లో పెద్దలను పిల్లలను ఏకం చేస్తున్నారు. తాజాగా కోనసీమ జిల్లాలో ముందుగానే సంక్రాంతి సందడి మొదలైంది.

రాజోలు నియోజకవర్గ వ్యాప్తంగా  పలు ప్రభుత్వ, ప్రైవేటు స్కూళ్లలో సంక్రాంతి సంబరాలు ముందుగానే జరుపుకున్నారు. నేటి యువతరంలో కనుమరుకుతున్న సంస్కృతి సంప్రదాయాలను విద్యార్థిని విద్యార్థులకు తెలియజేసే ఉద్దేశంతో స్కూల్ యాజమాన్యం సంబరాలను నిర్వహించారు.

సంక్రాంతికి చేసే సాంప్రదాయ పిండి వంటలు, ముగ్గులు, గొబ్బెమ్మలు, హరిదాసులు, గంగిరెద్దులు భోగి మంటలు, బుడబుక్కల వేషాలు వంటి వేషధారణలు పిల్లలతో ధరింపజేశారు. మన సంస్కృతి సంప్రదాయాలు ఉట్టు పడే విధంగా సంక్రాంతి పాటలతో అలరింప చేశారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..