రెండోసారి కరోనా సోకే అవకాశాలు ఎంతంటే
ప్రపంచవ్యాప్తంగా కరోనాపై పోరు కొనసాగుతుండగా.. కోలుకున్న వారికి మళ్లీ పాజిటివ్‌గా నిర్ధారణ అవ్వడం ఇప్పుడు ఆందోళనను కలిగిస్తోంది
Coronavirus re-infection news: ప్రపంచవ్యాప్తంగా కరోనాపై పోరు కొనసాగుతుండగా.. కోలుకున్న వారికి మళ్లీ పాజిటివ్‌గా నిర్ధారణ అవ్వడం ఇప్పుడు ఆందోళనను కలిగిస్తోంది. ఈ కేసులు ఇప్పుడు పలు దేశాల్లో నమోదవుతున్నాయి. దీంతో కరోనా మళ్లీ మళ్లీ వస్తుందా..? మళ్లీ సోకితే కోలుకోవడం కష్టమా..? అన్న అనుమానాలు వ్యక్తమవుతున్నాయి. ఈ నేపథ్యంలో కరోనా రెండోసారి సోకే విషయంపై ప్రపంచ ఆరోగ్య సంస్థ(డబ్ల్యూహెచ్‌ఓ) ఖతార్ దేశ విభాగం స్పందించింది. దీనిపై ఖతార్ ప్రజారోగ్య శాఖ, ఖతార్ కార్నెల్‌ యూనివర్సిటీతో కలిసి పరిశోధన చేసిన డబ్ల్యూహెచ్‌ఓ.. రెండోసారి కరోనా వచ్చే అవకాశాలు 0.04శాతం మాత్రమేనని వెల్లడించింది. ప్రతి 10వేల మందిలో నలుగురికి మాత్రమే కరోనా మళ్లీ సోకే అవకాశాలు ఉన్నాయని వివరించింది.
అధ్యయనంలో భాగంగా కరోనా సోకి కోలుకున్న 1,33,266 మందిపై పరిశోధన చేశారు. 45 రోజుల తరువాత వారికి ఆర్‌టీ–పీసీఆర్‌ చేశాక, అందులో 54 మందికి తిరిగి పాజిటివ్‌గా నిర్ధారణ అయ్యిందని అధ్యయనంలో తేలింది. వారిలో 41 శాతం మందికి మాత్రమే కొద్దిపాటి లక్షణాలున్నాయని.. మరో 58 శాతం మందికి ఏ లక్షణాలు లేవని వివరించింది. ఒక శాతం మాత్రం ఆసుపత్రిలో చికిత్స పొందుతున్నట్లు తెలిపింది. అయితే దీనిపై తదుపరి పరిశోధనలు కొనసాగుతున్నాయని, వైరస్ మరోసారి రావడానికి గల కారణాలను సమగ్రంగా విశ్లేషించవచ్చని తెలిపింది.
Read More:
