Kadambam: నవరాత్రుల్లో అమ్మవారికి నివేదించే కదంబం ప్రసాదం.. టెంపుల్ రుచి తో
హిందూ సంప్రదాయంలో నవరాత్రుల ఉత్సవాలప్పుడు అమ్మవారికి నివేదించే నైవేద్యాలలో 'కదంబం' అత్యంత విశిష్టమైనది. పెద్ద పెద్ద దేవాలయాలలో దేవికి సమర్పించే ఈ కదంబం సాధారణ సాంబార్ అన్నం కంటే ఎంతో భిన్నమైన, అమోఘమైన సువాసనతో ఉంటుంది. ఈ ప్రసాదంలో దాదాపు అన్ని రకాల కూరగాయలు, దుంపలు సమ్మిళితమై ఉండటం వల్ల దీనికి 'కదంబం' అనే పేరు వచ్చింది. ఇందులో ప్రధానమైన రహస్యం గుడిలో పూజారులు తయారుచేసే ప్రత్యేకమైన కదంబం మసాలా పొడి; మిరియాలు, లవంగాలు, యాలకులు, ఇంగువ, పప్పు దినుసులను దోరగా వేయించి నూరిన ఈ పొడి వల్ల అద్భుతమైన పరిమళం వస్తుంది.
కావలసిన పదార్థాలు: 1 కప్పు బియ్యం, అర కప్పు కందిపప్పు, అన్నం-పప్పు ఉడకడానికి 4 కప్పుల నీళ్లు, ముక్కల కోసం 1 లీటర్ నీళ్లు, పెద్ద నిమ్మకాయ సైజు అంత నానబెట్టి తీసిన చిక్కటి చింతపండు రసం, కొద్దిగా పసుపు, రుచికి సరిపడా ఉప్పు, అర టేబుల్ స్పూన్ బెల్లం తురుము, 2 నుండి 3 టేబుల్ స్పూన్ల స్వచ్ఛమైన నెయ్యి , 3 టేబుల్ స్పూన్లు కొత్తిమీర తరుగు, 2 రెమ్మల కరివేపాకు, తరిగిన కూరగాయ ముక్కలు, 2 కప్పుల గుమ్మడికాయ, 1 కప్పు సొరకాయ, 1 క్యారెట్, 1 ముల్లంగి , 1 పెద్ద మునక్కాయలు, 2 టమాటాలు, 1 బంగాళాదుంప, 6 పచ్చిమిరపకాయలు, 5 చిక్కుడుకాయలు, 1 మీడియం సైజు చిలకడదుంప, 1 అంగుళం ముక్క అల్లం,
ప్రత్యేక కదంబం మసాలా పొడి కోసం: 1 టీస్పూన్ మిరియాలు, 6 లవంగాలు, 4 యాలకులు, 5 ఎండు మిరపకాయలు, 1 టేబుల్ స్పూన్ పచ్చి శనగపప్పు , 1 టేబుల్ స్పూన్ మినప్పప్పు, 1 టీస్పూన్ జీలకర్ర, 1 టీస్పూన్ ఆవాలు, 2 టీస్పూన్ల ధనియాలు, పావు టీస్పూన్ మెంతులు, అర టీస్పూన్ ఇంగువ
తయారీ విధానం: కుక్కర్‌లో ఒక కప్పు బియ్యం, అర కప్పు కందిపప్పు వేసి శుభ్రంగా కడగాలి. ఇందులో 4 కప్పుల నీళ్లు, కొద్దిగా ఉప్పు, పసుపు వేసి మూతపెట్టి మీడియం మంటపై 3 నుండి 4 విజిల్స్ రానిచ్చి మెత్తగా ఉడికించి పక్కన ఉంచాలి. అలాగే పెద్ద నిమ్మకాయ సైజు చింతపండును నీళ్లలో నానబెట్టుకోవాలి. పాన్‌లో మిరియాలు, లవంగాలు, యాలకులు, ఎండుమిర్చి, శనగపప్పు, మినప్పప్పు, జీలకర్ర, ఆవాలు, ధనియాలు, మెంతులు వేసి నూనె లేకుండా లో ఫ్లేమ్‌పై దోరగా వేయించాలి. చల్లారిన తర్వాత మిక్సీ జార్‌లో వేసి అర టీస్పూన్ ఇంగువ చేర్చి మెత్తటి పొడిలా గ్రైండ్ చేసి పక్కన పెట్టుకోవాలి.
ఒక పెద్ద గిన్నెలో గుమ్మడి, సొరకాయ, ముల్లంగి, క్యారెట్, మునక్కాయ, చిక్కుడు, బంగాళాదుంప, టమాటా, చిలకడదుంప, పచ్చిమిర్చి మరియు అల్లం ముక్కలు వేయాలి. ఇందులో 2 టేబుల్ స్పూన్ల ఉప్పు, అర టీస్పూన్ పసుపు, 1 లీటర్ నీళ్లు పోసి హై ఫ్లేమ్‌పై సగం ఉడికించాలి. ముక్కలు సగం ఉడికాక నానబెట్టిన చింతపండు రసం పోసి పచ్చివాసన పోయేలా మరో 5-10 నిమిషాలు మరగనివ్వాలి.
ఇప్పుడు ఇందులో 2 రెమ్మల కరివేపాకు, గ్రైండ్ చేసుకున్న కదంబం పొడి మొత్తం, అర టేబుల్ స్పూన్ బెల్లం వేసి కలిపి 2-3 నిమిషాలు పొంగు రానివ్వాలి. ఆ తర్వాత ఉడికించిన అన్నం-పప్పును పొడిపొడిగా చేస్తూ వేసి ఉండలు లేకుండా కలపాలి. చివరగా 2-3 టేబుల్ స్పూన్ల స్వచ్ఛమైన నెయ్యి వేసి లో ఫ్లేమ్‌లో 5 నిమిషాలు మగ్గించి, కొత్తిమీర తరుగు చల్లి స్టవ్ ఆఫ్ చేయాలి. అంతే, దేవాలయాల తరహా సువాసనతో కూడిన 'కదంబం ప్రసాదం' సిద్ధం! నవరాత్రులలో అమ్మవారికి భక్తిశ్రద్ధలతో నివేదించి ఆ ప్రసాదాన్ని స్వీకరిస్తే ఆధ్యాత్మిక ఆనందం, అనిర్వచనీయమైన రుచి లభిస్తాయి!