వరల్డ్ కప్ 2027 స్వ్కాడ్‌లో వైభవ్ సూర్యవంశీకి ఛాన్స్.. బీసీసీఐ మాస్టర్ ప్లాన్ ఇదేనా..?
Vaibhav Sooryavanshi World Cup 2027 India Squad Chances: భారత క్రికెట్‌లో ప్రస్తుతం అత్యంత మారుమోగుతున్న పేరు బిహార్‌కు చెందిన 15 ఏళ్ల అద్భుతం వైభవ్ సూర్యవంశీ. రంజీ ట్రోఫీ నుంచి అండర్-19, ఐపీఎల్ వరకు సంచలనం సృష్టించిన ఈ వండర్ కిడ్ 2027 వన్డే వరల్డ్ కప్‌లో కనిపిస్తాడా? అభిమానుల ఆశలకు, వాస్తవానికి మధ్య ఉన్న అంతరాన్ని విశ్లేషిస్తే వచ్చే స్పష్టమైన సమాధానం ఒక్కటే.
Vaibhav Sooryavanshi World Cup 2027 India Squad Chances: భారత క్రికెట్‌లో అరుదుగా వస్తాయి ఇలాంటి పేర్లు. బ్యాట్ పట్టి నడవడం కూడా కష్టమైన వయసులో బౌలర్లకు ముచ్చెమటలు పట్టిస్తున్నాడు వైభవ్ సూర్యవంశీ. 15 ఏళ్లకే రంజీ ట్రోఫీలో అరంగేట్రం, ఇండియా అండర్-19లో విధ్వంసం, ఐపీఎల్ వేలంలో చరిత్ర సృష్టించడం.. ఇవన్నీ చూసిన అభిమాని హృదయం ఆశపడటంలో ఆశ్చర్యం లేదు. ‘వచ్చే వన్డే వరల్డ్ కప్‌లో నీలి జెర్సీలో వైభవ్ కనిపిస్తాడా?’ అంటూ ప్రశ్నల వర్షం సోషల్ మీడియాలో కురిపిస్తున్న సంగతి తెలిసిందే.
టీ20 మెరుపులు వేరు, 50 ఓవర్ల పరీక్ష వేరు..: వైభవ్ గాడ్ గిఫ్టెడ్ టాలెంట్ అనడంలో ఎలాంటి సందేహం లేదు. కానీ టీ20ల్లో చూపే దూకుడుకు, వన్డే వరల్డ్ కప్ ఒత్తిడికి నక్కకు నాగలోకానికి ఉన్నంత తేడా ఉంది. వన్డే క్రికెట్ అంటే కేవలం ఫోర్లు, సిక్సర్ల మోత కాదు. ఇన్నింగ్స్‌ను నిర్మించడం, స్ట్రైక్ రొటేట్ చేయడం, పరిస్థితులకు తగ్గట్టు గేర్లు మార్చడం, మ్యాచ్ నాడిని పట్టుకోవడం లాంటివి కావాలి.
అంతకంటే ముఖ్యం వేదిక. 2027 వన్డే వరల్డ్ కప్ దక్షిణాఫ్రికా, జింబాబ్వే, నమీబియా గడ్డపై జరగనుంది. అక్కడి వేగం, బౌన్స్ ఉన్న పిచ్‌లపై ప్రపంచంలోని అత్యంత ప్రమాదకర పేసర్లను 16 ఏళ్ల కుర్రాడితో ఎదుర్కోవాలనుకోవడం ఆచరణాత్మకం కాదు, ఆ కుర్రాడి కెరీర్‌కు శ్రేయస్కరం కాదు. అంత చిన్న వయసులో అలాంటి భట్టీలో పడేస్తే సహజ ప్రతిభ దెబ్బతినే ప్రమాదముందని టీమ్ మేనేజ్‌మెంట్ కూడా భావిస్తోంది.
ఓపెనింగ్ స్లాట్‌లో ఇప్పటికే దిగ్గజాల క్యూ..: బ్యాకప్‌గానైనా తీసుకుందామన్నా టీమిండియా ఓపెనింగ్ క్యూ చూస్తే ఆ ఆశ కూడా సన్నగిల్లుతుంది. ప్రస్తుతం శుభ్‌మన్ గిల్, యశస్వి జైస్వాల్ యువ జోడీ ఆ స్థానాలకు సెట్ అయినట్లే కనిపిస్తోంది. రోహిత్ శర్మ 2027 వరకు కొనసాగితే ఒక స్థానం అప్పటికే ప్యాక్ అయినట్లే.
వీరే కాకుండా ఋతురాజ్ గైక్వాడ్, ఇషాన్ కిషన్, అభిషేక్ శర్మ, సాయి సుదర్శన్ వంటి నిరూపితమైన ఆటగాళ్లు దేశవాళీ క్రికెట్, అంతర్జాతీయ వేదికలపై నిరంతరం తలుపు తడుతున్నారు. ఇంత కఠిన పోటీలో 15-16 ఏళ్ల కుర్రాడు నేరుగా వరల్డ్ కప్ స్క్వాడ్‌లోకి దూసుకురావడం దాదాపు అసాధ్యం.
బీసీసీఐ అసలు ప్లాన్ ఏంటి? బీసీసీఐ, చీఫ్ సెలెక్టర్లు ఈ వజ్రం విలువను గుర్తించలేదని కాదు. కానీ దాన్ని సరైన పద్ధతిలో సానబెట్టాలని చూస్తున్నారు. వైభవ్‌కు ఇప్పుడు అత్యంత అవసరం రంజీ ట్రోఫీ, విజయ్ హజారే, సయ్యద్ ముష్తాక్ అలీ వంటి దేశవాళీ టోర్నీల్లో నిరంతరం ఆడి అన్ని పరిస్థితులకు అలవాటు పడటం.
ఆ తర్వాత ఇండియా ‘ఎ’ పర్యటనలు ఉంటాయి. విదేశీ పరిస్థితుల్లో అతడి టెక్నిక్, సహనానికి అక్కడే అసలు పరీక్ష ఎదురవుతుంది. 2027 వరల్డ్ కప్ అతడికి చాలా దూరం, అతి తొందరపాటు వ్యవహారం. కానీ నేల విడిచి సాము చేయకుండా, ఫిట్‌నెస్, టెక్నిక్‌పై దృష్టి పెడితే 2031 వరల్డ్ కప్ కాదు, అంతకంటే ముందే వన్డే టీమిండియా తలుపులు అతడి కోసం తప్పక తెరుచుకుంటాయి. సచిన్ టెండూల్కర్ 16 ఏళ్లకే అరంగేట్రం చేశాడని గుర్తుచేయవచ్చు. కానీ సచిన్ కూడా వరల్డ్ ఛాంపియన్ కావడానికి 22 ఏళ్లు పట్టింది. వైభవ్‌ను వచ్చే వరల్డ్ కప్ హీరోగా ఊహించుకుని ఒత్తిడి పెంచడం కంటే, భారత క్రికెట్ భవిష్యత్తుగా కాపాడుకోవడమే ఇప్పుడు అందరి బాధ్యత.