Vastu Tips: ఇంట్లో బీరువా ఈ దిక్కున పెడితే.. వద్దన్నా డబ్బు మీ ఇంటికి వస్తుంది
వాస్తు శాస్త్రం ప్రకారం, బీరువాను పడకగదిలోని నైరుతి మూల(నైరుతి దిశ)లో ఉంచడం శ్రేయస్కరం. బీరువా తలుపులు ఉత్తరం వైపు తెరుచుకునేలా ఉండాలి, తద్వారా మీరు దక్షిణం వైపు చూస్తూ ఉంటారు. ఇలా చేయడం వల్ల ఇంట్లో లక్ష్మీ కటాక్షం, ధనాభివృద్ధి కలుగుతుందని, నిరృతి ప్రభావం తగ్గుతుందని చెబుతుంటారు.
ఇంటి నిర్మాణం, అలంకరణ విషయంలో వాస్తు శాస్త్రాన్ని పాటించడం మన సంస్కృతిలో భాగం. ఇంట్లో బీరువాను ఎక్కడ ఉంచాలనేది అనేకమందికి తరచుగా తలెత్తే ప్రశ్న. దీనిపై వాస్తు శాస్త్రం స్పష్టమైన సూచనలను అందిస్తుంది. బీరువా ఎప్పుడూ పడకగదిలో ఉండాలని, ముఖ్యంగా నైరుతి మూల (నైరుతి దిశ) లో ఉంచాలని శాస్త్రాలు పేర్కొంటాయి.
వాస్తు ప్రకారం, తూర్పు దిక్కున సూర్యునికి ఎదురుగా నిలబడినప్పుడు, మన కుడి చేతి వైపు దక్షిణం, ఎడమ చేతి వైపు ఉత్తరం, వెనుక భాగం పడమర అవుతుంది. దక్షిణానికి, పడమరకి మధ్యలో ఉండే దిక్కును నైరుతి అంటారు. నైరుతికి అధిపతి నిరృతి అనే రాక్షసుడని శాస్త్రాలు చెబుతాయి. ఈ దిక్కును తేలికగా వదిలేస్తే, నిరృతి మేల్కొని ఇంట్లో ఆహార కొరత, గొడవలు, డబ్బు నిలబడకపోవడం వంటి సమస్యలను సృష్టిస్తాడని నమ్ముతారు.
అందుకని, నిరృతిపై బరువు ఉంచడం ద్వారా ఆయన ప్రభావాన్ని తగ్గించవచ్చని వాస్తు సూచిస్తుంది. బీరువా వంటి బరువైన వస్తువులను నైరుతి మూలలో ఉంచడం ద్వారా నిరృతిని అదుపులో ఉంచినట్లు అవుతుంది, తద్వారా ఇంట్లో శాంతి, ఐశ్వర్యం వెల్లివిరుస్తాయి. ఇంటి యజమాని మాస్టర్ బెడ్రూమ్ కూడా నైరుతి దిక్కున ఉండాలని చెబుతున్నారు. బీరువాను నైరుతి మూలలో ఉంచడంతో పాటు, దాని తలుపుల దిశ కూడా ముఖ్యమైనది. బీరువా తెరిచినప్పుడు దాని తలుపులు ఉత్తరం వైపు చూస్తూ ఉండాలి. అంటే, మీరు బీరువా ఎదురుగా నిలబడి వస్తువులు సర్దుతున్నప్పుడు దక్షిణం వైపు చూస్తూ ఉంటారు. ఈ స్థితి లక్ష్మీప్రదమని, ధనాన్ని ఆకర్షిస్తుందని వాస్తు శాస్త్రం చెబుతుంది. ఇది ఇంట్లో ధనాభివృద్ధికి, సంపద స్థిరంగా ఉండటానికి సహాయపడుతుంది.
వాస్తు శాస్త్రంలో ఇతర దిక్కులకు కూడా ప్రాముఖ్యత ఉంది. తూర్పు, దక్షిణానికి మధ్య ఆగ్నేయ మూల ఉంటుంది. దీనికి అధిపతి అగ్ని దేవుడు, కాబట్టి వంటగది ఎప్పుడూ ఆగ్నేయంలోనే ఉండాలి. ఉత్తరానికి, తూర్పుకు మధ్య ఈశాన్య మూల ఉంటుంది. ఈశాన్యం వైపు దేవుడి గది మాత్రమే ఉండాలి. ఈశాన్యంలో ఎక్కువ బరువులు పెట్టకూడదు, ఇది తేలికగా ఉండాలి. నైరుతిలో బరువు ఎక్కువగా ఉండాలి, ఈశాన్యంలో బరువు తక్కువగా ఉండాలి అనే ఈ రెండు సూత్రాలను పాటించడం ఐశ్వర్యాన్ని ప్రసాదిస్తుంది. ఈశాన్యంలో ఉండే పూజ గది, నైరుతిలో ఉంచిన బీరువా రెండూ ఐశ్వర్యాన్ని అందిస్తాయని వాస్తు పండితులు చెబుతారు. అందుకని, ఈ సూచనలను జాగ్రత్తగా పాటించి బీరువాను ఏర్పాటు చేసుకోవడం శ్రేయస్కరమని జ్యోతిష్యులు చెబుతున్నారు.
Disclaimer: ఈ వార్తలోని సమాచారం వాస్తు శాస్త్రం, జ్యోతిష్యం, మత సంబంధమైన అంశాలపై ఆధారపడి ఉంది. దీనిని టీవీ9 తెలుగు ధృవీకరించదు.