అమ్మమ్మ చేతి రుచిని గుర్తు చేసే పచ్చి కొబ్బరి బెల్లం తాలికలు.. గణేశుడు పూజకు పర్ఫెక్ట్ నైవేద్యం!
పచ్చి కొబ్బరి బెల్లం పాలతాలికలు తెలుగు రాష్ట్రాలలో ఎంతోమంది ఇష్టపడే సాంప్రదాయక తీపి వంటకం. పండుగలకు, శుభకార్యాలకు తరచుగా చేసే ఈ ప్రసాదం, సరైన పద్ధతిలో చేస్తే అద్భుతమైన రుచి, మంచి ఫ్లేవర్, క్రీమీ టెక్చర్ తో తయారవుతుంది. గణేశుడు పూజకు పర్ఫెక్ట్ నైవేద్యం కూడా. పాలు విరిగిపోకుండా, తాలికలు చిక్కగా, పొడవుగా ఉండేలా కొన్ని కీలకమైన రహస్యాలను తెలుసుకుందాం.
ముందుగా స్టవ్ మీద ఒక కడాయి పెట్టి, 3 టేబుల్స్పూన్ల పంచదార లేదా పటికబెల్లం పొడి వేసి, ఒక కప్పు నీళ్లు పోసి బాగా మరగనివ్వాలి. నీళ్లు మరగడం మొదలుపెట్టిన తర్వాత, ముప్పావు కప్పు పొడి బియ్యంపిండిని నెమ్మదిగా వేస్తూ ఉండలు లేకుండా బాగా కలపాలి. పాలతాలికలకు మంచి ఫ్లేవర్ రావాలంటే, మంచి సువాసన గల బాస్మతి రైస్ని పిండి పట్టించి వాడటం ఒక ముఖ్యమైన చిట్కా. ఇలా కలిపిన పిండిపై మూత పెట్టి కొద్దిసేపు పక్కన ఉంచాలి. కొద్దిగా వేడి తగ్గిన తర్వాత, చేత్తో తాకగలిగే వేడిలో ఉన్నప్పుడు పిండిని మెత్తగా అయ్యే వరకు బాగా మర్దనా చేయాలి. అవసరమైతే, కొద్దిగా వేడి నీళ్లు కలుపుకోవచ్చు.
మరొక గిన్నెలో ముప్పావు కప్పు తురిమిన బెల్లం, ఒక కప్పు నీళ్లు పోసి స్టవ్ ఆన్ చేసి, మంటను లో ఫ్లేమ్లో ఉంచి బాగా మరగనివ్వాలి. పాలు విరిగిపోకుండా ఉండాలంటే, ఉప్పు లేకుండా నాణ్యమైన బెల్లం వాడాలి. అలాగే, బెల్లం నీళ్లను ఎక్కువసేపు మరిగించి, స్టవ్ ఆఫ్ చేసి పూర్తిగా చల్లారే వరకు పక్కన పెట్టుకోవాలి. ఈ చిట్కా పాయసం పాడవకుండా చేస్తుంది.
మెత్తగా కలిపిన బియ్యం పిండిని చిన్న చిన్న ముద్దలుగా తీసుకొని, చేత్తో చిన్న తాలికల్లా చేసుకోవాలి. తాలికలు ఒకదానికొకటి అతుక్కోకుండా ఉండేందుకు, ఒక ప్లేట్లో కొద్దిగా పొడి బియ్యంపిండి చల్లి, దానిపై సిద్ధం చేసిన తాలికలను ఉంచాలి. ఇవి మరీ సన్నగా గాని, మరీ లావుగా గాని కాకుండా మధ్యస్తంగా ఉండాలి. సమయం లేనట్లయితే జంతికల మౌల్డ్లో వేసి కూడా చేసుకోవచ్చు. చివర్లో కొద్దిగా పిండి ముద్దను ఉంచి, అందులో నీళ్లు కలిపి మెత్తటి క్రీమ్లా చేసుకోవాలి. ఇది పాయసం చిక్కబడటానికి సహాయపడుతుంది.
అడుగు మందంగా ఉన్న గిన్నెలో లీటరు చిక్కటి పాలను తీసుకొని, మంటను లో ఫ్లేమ్లో ఉంచి నెమ్మదిగా కాగనివ్వాలి. పాలు బాగా మరిగేటప్పుడు గంటపాటు నానబెట్టిన 3 టేబుల్స్పూన్ల లావు సగ్గుబియ్యం వేసి ఒకసారి కలపాలి. వెంటనే మనం సిద్ధం చేసుకున్న తాలికలను ఇందులో వేయాలి. తాలికలు విరిగిపోకుండా ఉండాలంటే, వేసిన వెంటనే కదపకుండా కొద్దిసేపు అలాగే వదిలేయాలి. మంటను మీడియం ఫ్లేమ్లో ఉంచి, అడుగు పట్టకుండా మధ్యమధ్యలో కలుపుతూ 10-15 నిమిషాల పాటు ఉడికించాలి. ఈ సమయంలో తాలికలు, సగ్గుబియ్యం సరిగ్గా ఉడికిపోతాయి.
తాలికలు ఉడికిన తర్వాత స్టవ్ ఆఫ్ చేసి, పాయసం కొంచెం వేడి తగ్గే వరకు పక్కన ఉంచాలి. మరీ మరిగే పాలలో బెల్లం పాకం వేస్తే పాలు విరిగిపోయే అవకాశం ఉంది. కొద్దిగా వేడి తగ్గిన తర్వాత, పావు టీస్పూన్ యాలకుల పొడి వేయాలి. ఇప్పుడు పూర్తిగా చల్లారిన బెల్లం పాకాన్ని వడకట్టి పాయసంలో పోసి చక్కగా కలుపుకోవాలి. ఈ పాయసం చల్లారేకొద్దీ మరింత చిక్కబడుతుంది. మరింత రుచి కోసం, ఒక కడాయిలో 2 స్పూన్ల నెయ్యి వేసి, ఎండుకొబ్బరి ముక్కలు, జీడిపప్పు, కిస్మిస్ వేయించుకొని పాయసంలో కలుపుకోవచ్చు. మంచి ఫ్లేవర్, టెక్చర్ తో ఉండే ఈ రుచికరమైన బెల్లం పాలతాలికలు సిద్ధం. ఈ చిట్కాలను పాటిస్తే ఎవరైనా సరే, విరిగిపోని, పాలు విరగని, అద్భుతమైన ఫ్లేవర్, క్రీమీ టెక్చర్ తో కూడిన పాలతాలికలను సులభంగా తయారుచేయవచ్చు.