దేవి నవరాత్రులు.. అమ్మవారికి ఎంతో ఇష్టమైన అల్లం గారెలు.. ఇలా చేస్తే రుచికరంగా
దేవి నవరాత్రుల్లో అమ్మవారికి ఎంతో ఇష్టమైన నైవేద్యాలు చేసి పెడతారు. వాటిలో అల్లం గారెలు కూడా ఒకటి. కేవలం పండగల నైవేద్యంగానే కాకుండా, సాధారణ రోజుల్లో కూడా అద్భుతమైన స్నాక్‌గా నిలుస్తాయి. సరైన పద్ధతిలో పిండిని రుబ్బి, చిట్కాలు పాటిస్తే, పొట్టు మినప్పప్పుతో చేసినట్లే క్రిస్పీగా, మెత్తగా అల్లం గారెలు వస్తాయి.
కావాల్సిన పదార్థాలు: పావుకిలో మినపప్పు, ఒక చిన్న అల్లం ముక్క, 5 పచ్చిమిర్చి, అర టేబుల్ స్పూన్ జీలకర్ర, కరివేపాకు: సన్నగా తరిగినది, రుచికి సరిపడా ఉప్పు, చిటికెడు వంట సోడా, నూనె: డీప్ ఫ్రై చేయడానికి సరిపడా నూనెను తీసుకోవాలి. ముందుగా, పావు కిలో మినప్పప్పును తగినన్ని నీళ్లు పోసి నాలుగైదు గంటల పాటు నానబెట్టాలి. పప్పు బాగా నానితేనే గారెలు మెత్తగా వస్తాయి. నానిన తర్వాత పప్పును రెండు మూడు సార్లు శుభ్రంగా కడగాలి. కడిగిన పప్పును నీళ్లు లేకుండా గ్రైండర్‌లో వేయాలి. గారెల పిండిని గట్టిగా రుబ్బుకోవాలి కాబట్టి, అవసరాన్ని బట్టి చాలా తక్కువ నీళ్లు పోస్తూ రుబ్బుకోవాలి. పిండి మరీ పల్చగా కాకుండా, ఇడ్లీ పిండి కంటే గట్టిగా ఉండాలి. గ్రైండర్‌లో పిండి రుబ్బుతున్నప్పుడు మధ్యమధ్యలో చేత్తో కలుపుతూ ఉండాలి, దీనివల్ల పప్పు సమానంగా నలిగి పిండి గుల్లగా వస్తుంది. సగం పైన నలిగిన తర్వాత, పిండికి సరిపడా ఉప్పు వేయాలి. ఉప్పు వేయడం వల్ల గారెలు గుల్లగా రావడమే కాకుండా, పిండి కాస్త పల్చబడుతుంది కాబట్టి నీటిని జాగ్రత్తగా పోయాలి. పిండి మరీ మెత్తని పేస్ట్ లా కాకుండా, కొద్దిగా పలుకులా ఉండాలి.
పిండి రుబ్బిన తర్వాత, వెంటనే గారెలు వేయకుండా, మూత పెట్టి ఆరు నుండి ఏడు నిమిషాల పాటు పక్కన ఉంచాలి. ఇది పప్పుకు అవసరం. ఒకవేళ మీరు పొట్టు మినప్పప్పు వాడితే, పిండిని వెంటనే ఉపయోగించవచ్చు. ఒక చిన్న మిక్సీ జార్‌లో అల్లం ముక్కలు, 5 పచ్చిమిర్చి ముక్కలు వేసి, నీళ్లు కలపకుండా మెత్తగా పేస్ట్ చేసుకోవాలి. ముక్కలుగా వేయడం కంటే ఇలా పేస్ట్ చేసి వేస్తే గారెలకు అద్భుతమైన రుచి వస్తుంది.
నానిన పిండిలో ముందుగా తయారు చేసుకున్న అల్లం కారం, సన్నగా తరిగిన కరివేపాకు, అర టీస్పూన్ జీలకర్ర వేసి కలపాలి. చాయ్ పప్పుతో గారెలు వేసేటప్పుడు కచ్చితంగా చిటికెడు వంట సోడా వేయాలి. వంట సోడా వేయడం వల్ల గారెలు క్రిస్పీగా, మెత్తగా ఉండి, ఎక్కువ సేపు గట్టి పడకుండా ఉంటాయి. వంట సోడా ఎక్కువ వేయకూడదు, చాలా కొద్దిగా సరిపోతుంది. అన్నింటినీ బాగా కలుపుకోవాలి.
గారెలు ఒత్తడానికి అరిటాకు గానీ, ప్లాస్టిక్ కవర్‌ను గానీ ఉపయోగించవచ్చు. చేతిని, ఆకును తడి చేసుకుని, పిండి ముద్దను తీసుకుని, పలుచగా కాకుండా కొద్దిగా మందంగా ఒత్తాలి. ఇంకా మధ్యలో చిల్లు పెట్టుకోవాలి. తడి చేసుకుంటూ ఒత్తడం వల్ల పిండి చేతికి అంటుకోకుండా గారెలు గుండ్రంగా, మంచిగా వస్తాయి.
డీప్ ఫ్రైకి సరిపడా నూనెను వేడి చేయాలి. నూనె బాగా వేడైన తర్వాత, మంటను మీడియం ఫ్లేమ్‌కు తగ్గించి, ఒత్తుకున్న గారెలను జాగ్రత్తగా నూనెలో వేయాలి. నూనె బాగా వేడిగా ఉంటేనే గారెలు నూనె పీల్చకుండా, ఎర్రగా వేగుతాయి. గారె వేసిన వెంటనే పైకి తేలితే పిండి సరిగా మంచిగా ఉన్నట్లు అర్థం. మునిగిపోతే పిండి గట్టిగా ఉన్నట్లు. వేసిన వెంటనే కదపకుండా, కొద్దిగా వేగాక అటూ ఇటూ తిప్పుతూ, రెండు వైపులా బంగారు రంగు వచ్చేవరకు వేయించుకోవాలి. నూనెలోని నురగ తగ్గిన తర్వాత గారెలను ప్లేట్లోకి తీసుకోవాలి. మిగిలిన పిండితో కూడా ఇదే విధంగా గారెలు చేసుకోవాలి