Summer Vegetable: సొరకాయ vs బీరకాయ: సమ్మర్లో బాడీని కూల్ చేయడానికి ఏది బెస్ట్!
ఎండలు మండిపోతున్న వేసవి కాలంలో మార్కెట్లో ఎక్కువగా కనిపించే కూరగాయలు సొరకాయ, బీరకాయ. చాలామంది వీటిని చప్పగా ఉంటాయని, బోరింగ్ కూరగాయలు అని పక్కన పెడుతుంటారు. కానీ, వేసవి తాపానికి గురయ్యే మన శరీరానికి అత్యంత అవసరమైన పోషకాలు, తేమను అందించడంలో ఇవి అద్భుతంగా పనిచేస్తాయని నిపుణులు చెబుతున్నారు. కాబట్టి ఈ రెండు కూరగాయల వల్ల కలిగే ఆరోగ్య ప్రయోజనాలు, సమ్మర్తో తినడానికి రెండింటిలో ఏది మంచిదో చూద్దాం.
సొరకాయలో నీటి శాతం చాలా ఎక్కువ. ఇది సులభంగా జీర్ణమవడమే కాకుండా శరీరానికి తక్షణ చల్లదనాన్ని ఇస్తుంది. బరువు తగ్గాలనుకునే వారికి, అసిడిటీ సమస్యలతో బాధపడేవారికి ఇది ఒక మంచి ఔషధంలా పనిచేస్తుంది. 100 గ్రాముల సొరకాయలో 14-15 క్యాలరీలు, 90-96 శాతం నీరు , 4 గ్రాములు కార్బోహైడ్రేట్లు, 1.2 గ్రాములు ఫైబర్ , ప్రోటీన్: 0.5-0.7 గ్రాములు, కొవ్వు: 0.1 గ్రాము , విటమిన్ సి: 10-12 మిల్లీగ్రాములు , పొటాషియం: 150-170 మిల్లీగ్రాములు ,20-25 మిల్లీగ్రాములు కాల్సియం ఉంటుంది.
సోరకాయ ప్రయోజనాలు: సొరకాయలో ఫైబర్, ఆల్కలీన్ గుణాలు ఎక్కువగా ఉండటం వల్ల ఇది అసిడిటీని తగ్గిస్తుంది. అంతేకాకుండా, మానసిక ఒత్తిడిని తగ్గించడానికి, మంచి నిద్ర పట్టడానికి, బరువు నియంత్రణకు, చిన్న వయసులోనే జుట్టు తెల్లబడకుండా నివారించడానికి ఇది సహాయపడుతుందని అధ్యయనాలు చెబుతున్నాయి. దీనిని సూప్లు, కూరలు, జ్యూస్ల రూపంలో సులభంగా తీసుకోవచ్చు.
బిరకాయలోని పోషకాలు: మరో వేసవి కూరగాయ బీరకాయలో ఫైబర్, విటమిన్ సి పుష్కలంగా ఉంటాయి. ఇది తిన్న తర్వాత కడుపు నిండిన అనుభూతిని ఇస్తుంది, తద్వారా అతిగా తినడాన్ని నియంత్రిస్తుంది. 100 గ్రాముల బీరకాయలో క్యాలరీలు: 18-20 , నీటి శాతం: 93-95% , కార్బోహైడ్రేట్లు: 3.5 గ్రాములు , ఫైబర్ 2.5 గ్రాములు , ప్రోటీన్: 0.5 గ్రాము , కొవ్వు: 0.1 గ్రాము , విటమిన్ సి: 15-20 మిల్లీగ్రాములు, ఐరన్ 0.3-0.5 గ్రాములు, 20-30 మిల్లీగ్రాములు క్యాల్షియం ఉంటుంది.
బీరకాయ ప్రయోజనాలు: ఒక శాస్త్రీయ అధ్యయనం ప్రకారం, బీరకాయలో 20.6 శాతం ఫైబర్ , 7.7 శాతం ఖనిజాలు ఉంటాయి. అమైనో ఆమ్లాల విశ్లేషణలో ఇందులో కార్నోసిన్ అత్యధికంగా ఉన్నట్లు, ఆ తర్వాత ఆస్పార్టిక్ ఆమ్లం, అమైనోఅడిపిక్ ఆమ్లాలు ఉన్నట్లు తేలింది. అలాగే, దీని ఇథైల్ అసిటేట్ సారంలో శక్తివంతమైన యాంటీఆక్సిడెంట్ గుణాలు ఉన్నట్లు పరిశోధనలు వెల్లడించాయి. ఇవి మన పూర్తి ఆరోగ్యానికి ఎంతగానో దోహదపడుతాయని నిపుణులు చెబుతున్నారు.
ఈ రెండింటిలో ఏది ఎక్కువ పోషకమైనది?: సొరకాయ, బీరకాయ రెండు కూడా తేలికగా, సులభంగా జీర్ణమయ్యే పోషకాలు కలిగిన కూరగాయలు. అయితే మీకు తీవ్రమైన ఎండ వల్ల అలసటగా ఉన్నప్పుడు, కడుపు ఉబ్బరంగా లేదా అసిడిటీగా అనిపించినప్పుడు సొరకాయ ఉత్తమ ఎంపిక. ఇది శరీరానికి ఆహారం రూపంలోనే కాకుండా అద్భుతమైన హైడ్రేషన్ అందించి చల్లబరుస్తుంది. ఒక వేళ మీ శరీరానికి ఎక్కువ ఫైబర్, ఐరన్ ,యాంటీఆక్సిడెంట్లు అవసరమైనప్పుడు బీరకాయను ఎంచుకోవడం మంచిది. ఇది జీర్ణక్రియకు మరింత మెరుగైన మద్దతును ఇస్తుంది. కాబట్టి ఏది ఉత్తమమైనది అనేది మీ అవసరాలను బట్టి మారుతుంది.