టమాటా పండా? కూరగాయనా? 133 ఏళ్ల మిస్టరీ వెనుక ఉన్న అసలు నిజం ఇదే.. 90 శాతం మందికి తెలియదు..!
Tomato Fruit or Vegetable: టమాటా పండా లేక కూరగాయనా అనే గందరగోళం ఇంకా కొనసాగుతున్నప్పటికీ, అది మన ఆరోగ్యానికి ఒక అద్భుతమైన వరప్రసాదం అనే విషయంలో ఎలాంటి సందేహం లేదు. మీ డైట్లో ప్రతిరోజూ టమాటాను భాగం చేసుకోవడం ద్వారా రుచితో పాటు సంపూర్ణ ఆరోగ్యాన్ని మీ సొంతం చేసుకోవచ్చు.
Tomato Fruit or Vegetable: ప్రతిరోజూ మన వంటకాల్లో రారాజులా వెలిగిపోయే టమాటా అసలు పండా లేక కూరగాయనా? శతాబ్దాలుగా ప్రపంచవ్యాప్తంగా సాగుతున్న ఈ ఆసక్తికరమైన చర్చకు సైన్స్ ఒకలా సమాధానం చెబితే, మన వంటగది మరోలా గుర్తిస్తుంది. అసలు టమాటా నిజమైన గుర్తింపు ఏంటి, దీని వెనుక ఉన్న ఆశ్చర్యకరమైన కోర్టు కథేంటో ఇప్పుడు తెలుసుకుందాం.
మన వంటగది మాయాజాలం.. టమాటా ప్రస్థానం: వందల సంవత్సరాలుగా మనం నిత్యం వాడుతున్న టమాటా చుట్టూ ఒక పెద్ద రహస్యం దాగి ఉందంటే నమ్ముతారా? ఎవరినైనా టమాటా పండా లేక కూరగాయనా అని అడిగితే.. వంటల్లో వేసే టమాటా కూరగాయ కాకపోతే పండెలా అవుతుందని నవ్వుతూ ఎదురుప్రశ్న వేస్తారు. కూరల్లో అద్భుతమైన రుచిని అందించడమే కాకుండా, శరీరానికి ఎన్నో ఆరోగ్య ప్రయోజనాలను చేకూర్చే టమాటాకు మార్కెట్లో ఎప్పుడూ విపరీతమైన డిమాండ్ ఉంటుంది. అందుకే దీని ధరలు పెరిగినా, తగ్గినా ఎప్పుడూ వార్తల్లో నిలుస్తూనే ఉంటుంది.
సైన్స్ ఏం చెబుతోంది? టమాటా అసలు రూపం ఇదే..!: నిజం చెప్పాలంటే మనలో చాలా మందికి తెలియని పచ్చి నిజం ఒకటి ఉంది. సైన్స్ నియమాల ప్రకారం టమాటా నూటికి నూరు శాతం ఒక 'పండు'. వినడానికి కాస్త వింతగా అనిపించినా ఇది ముమ్మాటికీ నిజం. వృక్షశాస్త్ర సూత్రాల ప్రకారం, ఒక పువ్వు నుంచి అభివృద్ధి చెంది, లోపల గింజలను కలిగి ఉండే ఏ మొక్క భాగమైనా 'పండు' కిందకే వస్తుంది. ఈ లెక్కన టమాటాలో గింజలు ఉంటాయి కాబట్టి అది ఖచ్చితంగా పండే. ప్రపంచ ప్రఖ్యాతి గాంచిన ఆక్స్ఫర్డ్ డిక్షనరీ కూడా టమాటాను పండ్ల జాబితాలోనే చేర్చింది.
విషపూరితమైన అడవి పండుగా భావించిన భారతీయులు: ఇంతటి ప్రాధాన్యం ఉన్న ఈ పండు మన వంట గదిలోకి వచ్చేసరికి కూరగాయగా ఎలా మారిందనేది అత్యంత ఆసక్తికరమైన అంశం. నిజానికి భారతీయ వంటకాల్లోకి టమాటా చాలా ఆలస్యంగా ప్రవేశించింది. 16వ శతాబ్దంలో పోర్చుగీసు వారు దీనిని మన దేశానికి పరిచయం చేసినప్పుడు, ఇక్కడి ప్రజలు దీనిని ఒక అడవి పండుగా, తింటే ప్రాణాలకే ప్రమాదకరమైన విషపూరితమైనదిగా భావించి చాలా కాలం పాటు దూరంగా పెట్టారు.
ఆ రోజుల్లో మనవాళ్లు వంటల్లో పులుపు కోసం కేవలం చింతపండు, నిమ్మకాయలను మాత్రమే వాడేవారు. కాలక్రమేణా టమాటాలోని పులుపు రుచి అందరినీ ఆకట్టుకుంది. పచ్చిగా తింటే పండు అని, వండి తింటే కూరగాయ అనే నమ్మకం ప్రజల్లో బలపడటంతో ఇది పూర్తిగా కూరగాయల జాబితాలోకి చేరిపోయింది.
అమెరికా సుప్రీం కోర్టు వరకు వెళ్లిన వివాదం..!: ఈ 'పండు-కూరగాయ' వివాదం ఏకంగా న్యాయస్థానం మెట్లు కూడా ఎక్కింది. 1893లో అమెరికాలో జరిగిన ప్రసిద్ధ 'నిక్స్ వర్సెస్ హెడెన్' కేసులో, దిగుమతి చేసుకునే కూరగాయలపై పన్ను విధించాలని, పండ్లపై పన్ను ఉండకూడదనే నియమం ఉండేది. టమాటా ఒక పండు కాబట్టి దానికి పన్ను మినహాయింపు ఇవ్వాలని వ్యాపారులు వాదించారు. కానీ అమెరికా సుప్రీం కోర్టు మాత్రం.. సైన్స్ను పక్కన పెడితే, ప్రజలు దీనిని నిత్యం కూరగాయలాగే వండుకుని తింటున్నారు కాబట్టి, చట్టప్రకారం టమాటా 'కూరగాయల' వర్గం కిందకే వస్తుందని చారిత్రాత్మక తీర్పునిచ్చింది.
అద్భుతమైన ఆరోగ్య ప్రయోజనాల గని: ప్రస్తుతం ప్రపంచవ్యాప్తంగా 9,000 కంటే ఎక్కువ టమాటా రకాలు అందుబాటులో ఉన్నాయి. ఇందులో ఉండే 'లైకోపీన్' అనే శక్తివంతమైన యాంటీఆక్సిడెంట్ క్యాన్సర్ వంటి ప్రాణాంతక వ్యాధుల ముప్పును తగ్గిస్తుంది. అలాగే ఇది చర్మాన్ని యవ్వనంగా ఉంచడానికి, జీర్ణక్రియను మెరుగుపరచడానికి ఎంతో తోడ్పడుతుంది. సూర్యుని నుండి వచ్చే హానికరమైన కిరణాల నుంచి చర్మాన్ని రక్షించడంలో, కడుపులో హానికరమైన బ్యాక్టీరియా వృద్ధిని అరికట్టడంలో టమాటా కీలక పాత్ర పోషిస్తుంది.