బరువు తగ్గడానికి గుడ్డును ఎలా తినాలి? బాయిల్డ్, పోచ్డ్ లేక ఆమ్లెట్.. ఏది బెస్ట్ ఆప్షన్? నిపుణుల సూచన..
బరువు తగ్గడం (Weight Loss) అనేది ప్రస్తుత రోజుల్లో చాలా మందికి ఒక పెద్ద సవాలుగా మారింది. వెయిట్ లాస్ డైట్లో ప్రొటీన్లు ఎక్కువగా ఉండే ఆహారానికి ప్రాధాన్యత ఇస్తారు. ఈ లిస్ట్లో మొదటి స్థానంలో ఉండేది గుడ్డు (Egg). గుడ్డు తినడం వల్ల కండరాలు బలోపేతం అవ్వడమే కాకుండా, ఎక్కువ సమయం ఆకలి వేయకుండా ఉంటుంది. అయితే, గుడ్డును ఏ రూపంలో తింటే బరువు వేగంగా తగ్గుతారు? బాయిల్డ్ ఎగ్గా, లేక ఆమ్లెటా? ఇందులో ఏది అత్యుత్తమమైనదో డైటీషియన్లు వివరించారు.
బరువు తగ్గాలని ప్రయత్నించే వారికి గుడ్డు ఒక అద్భుతమైన ఆహారం. అయితే గుడ్డును వండే విధానాన్ని బట్టి అందులోని క్యాలరీల పరిమాణం మారిపోతుంది. ఆరోగ్య నిపుణుల ప్రకారం.. వెయిట్ లాస్ జర్నీలో ఉన్నవారికి బాయిల్డ్ ఎగ్ (ఉడకబెట్టిన గుడ్డు), పోచ్డ్ ఎగ్ (నీటిలో ఉడికించే అరుదైన రూపం) అత్యంత ఉత్తమమైనవి. ఎందుకంటే వీటి తయారీలో ఎలాంటి అదనపు నూనె లేదా వెన్న ఉపయోగించరు. దీనివల్ల క్యాలరీలు పెరగకుండా ప్రొటీన్లు పూర్తిగా అందుతాయి. అదే సమయంలో ఆమ్లెట్ తినాలనుకుంటే,..
బాయిల్డ్ ఎగ్ (ఉడకబెట్టిన గుడ్డు) - మొదటి ప్రాధాన్యత: బరువు తగ్గాలనుకునే వారికి ఉడకబెట్టిన గుడ్డు అత్యంత సురక్షితమైనది. సులువైనది. ఒక హార్డ్-బాయిల్డ్ ఎగ్ తీసుకుంటే అందులో కేవలం 78 క్యాలరీలు మాత్రమే ఉంటాయి. దీనిని వండటానికి ఎలాంటి నూనె, వెన్న లేదా మసాలాలు వాడరు కాబట్టి గుడ్డులోని అసలైన పోషకాలు నేరుగా శరీరానికి అందుతాయి. ఇది మెటబాలిజాన్ని పెంచి, కొవ్వును కరిగించడంలో సహాయపడుతుంది.
పోచ్డ్ ఎగ్ (Poached Egg) - మరో అద్భుత మార్గం: చాలా మందికి పోచ్డ్ ఎగ్ గురించి తెలియదు. గుడ్డు పెంకును పగలగొట్టి, మరుగుతున్న నీటిలో నేరుగా వేసి ఉడికించడాన్ని పోచింగ్ అంటారు. బాయిల్డ్ ఎగ్ లాగే దీని తయారీలో కూడా నూనె అస్సలు ఉపయోగించరు. ఇది తినడానికి ఎంతో రుచిగా ఉండటమే కాకుండా, క్యాలరీల కౌంట్ను అస్సలు పెంచదు. వెయిట్ లాస్ డైట్లో బోర్ కొట్టకుండా ఉండటానికి ఇది ఒక మంచి వెరైటీ ఆప్షన్.
ఆమ్లెట్ (Omelette) - ఇలా తింటేనే మేలు: సాధారణంగా ఆమ్లెట్ వేసేటప్పుడు నూనె లేదా వెన్న (Butter) ఎక్కువగా వాడుతుంటారు. దీనివల్ల గుడ్డులోని క్యాలరీల సంఖ్య, శాచురేటెడ్ ఫ్యాట్ విపరీతంగా పెరిగిపోతాయి. ఇది బరువు తగ్గడానికి బదులు బరువు పెరగడానికి కారణమవ్వచ్చు. అయితే, ఆమ్లెట్ను బరువు తగ్గేలా మార్చుకోవచ్చు. నూనెకు బదులు కొద్దిగా ఒలివ్ ఆయిల్ లేదా నెయ్యి వాడాలి. అందులో ఉల్లిపాయలు, పాలకూర, టొమాటో, క్యాప్సికమ్ వంటి కూరగాయలు ఎక్కువగా వేసుకుని వెజిటబుల్ ఆమ్లెట్ లాగా తింటే ఫైబర్, విటమిన్లు కలిసి అంది బరువు తగ్గడానికి దోహదపడతాయి.
బరువు తగ్గడమే మీ ఏకైక లక్ష్యం అయితే బాయిల్డ్ ఎగ్ లేదా పోచ్డ్ ఎగ్ మొదటి ఛాయిస్ కావాలి. అలాగే గుడ్డు లోపలి పచ్చసొన (Yolk) లో కొవ్వు ఎక్కువగా ఉంటుంది. కాబట్టి, బరువు తగ్గాలనుకునే వారు రోజుకు ఒక పచ్చసొన తిని, మిగిలిన వాటిలో కేవలం తెల్లసొన (Egg White)ను మాత్రమే తీసుకోవడం వల్ల ఉత్తమ ఫలితాలు ఉంటాయి.