గుడ్లు vs పనీర్.. ఎందులో ఎక్కువ ప్రోటీన్ ఉంటుంది..? ఆరోగ్యానికి ఏది బెస్ట్..!
మన నిత్య జీవితంలో ప్రోటీన్ అనగానే ఠక్కున గుర్తొచ్చే పేర్లు గుడ్లు, పన్నీర్. వ్యాయామం చేసే వారి నుంచి బరువు తగ్గాలనుకునే వారి దాకా చాలామంది డైట్లో ఈ రెండూ భాగమైపోయాయి. యితే ప్రోటీన్, కేలరీలు, ఇతర పోషక విలువల పరంగా ఈ రెండింటిలో ఏది ఉత్తమమైనది అనే సందేహం చాలామందిలో ఉంటుంది. దీనికి సంబంధించి ICMR-NIN లెక్కలు ఏం చెబుతున్నాయో ఈ స్టోరీలో తెలుసుకుందాం..
ఐసీఎంఆర్-ఎన్ఐఎన్ డేటా ప్రకారం.. ప్రోటీన్ పరంగా చూస్తే పన్నీర్ కాస్త ముందంజలో ఉన్నట్లు కనిపిస్తుంది. ప్రతి 100 గ్రాముల పన్నీర్లో దాదాపు 18.9 గ్రాముల ప్రోటీన్, 258 కిలో కేలరీలు లభిస్తాయి. అదే 100 గ్రాముల గుడ్లలో సుమారు 13.3 గ్రాముల ప్రోటీన్, 147 కిలో కేలరీలు ఉంటాయి. అంటే గ్రాముల లెక్కన చూస్తే పన్నీర్ నుంచే ఎక్కువ ప్రోటీన్ అందుతుంది.
కేవలం ప్రోటీన్ మాత్రమే కాకుండా కేలరీలు, కొవ్వులను కూడా పరిగణనలోకి తీసుకోవాల్సి ఉంటుంది. 100 గ్రాముల పనీర్లో 14.8 గ్రాముల కొవ్వు ఉంటే, అంతే పరిమాణంలోని గుడ్లలో 10 గ్రాముల కొవ్వు మాత్రమే ఉంటుంది. బరువు తగ్గాలనుకునే వారు లేదా కేలరీలను నియంత్రణలో ఉంచుకోవాలనుకునే వారికి పన్నీర్ కంటే గుడ్లు మెరుగైన ఎంపికగా నిలుస్తాయి.
శాకాహారులకు పనీర్ ఒక అద్భుతమైన ప్రోటీన్ వనరుగా కొనసాగుతోంది. పాల ఉత్పత్తుల ద్వారా లభించే కాల్షియం, ఇతర ముఖ్య పోషకాలు ఇందులో సహజంగానే పుష్కలంగా ఉంటాయి. అయితే పనీర్ తయారీ విధానంపై కూడా కేలరీలు ఆధారపడి ఉంటాయి. ఫుల్-ఫ్యాట్ పాలతో చేసిన పనీర్, వండేటప్పుడు వాడే నూనె లేదా వెన్న కేలరీల సంఖ్యను మరింత పెంచే అవకాశం ఉంది.
కడుపు నిండిన అనుభూతిని అందించే విషయంలో రెండూ సమానంగా ఉంటాయి. సైన్స్ అధ్యయనాల ప్రకారం.. సమతుల్య మోతాదులో తీసుకున్నప్పుడు గుడ్లు, పనీర్ దాదాపు ఒకే స్థాయి తృప్తిని కలిగిస్తాయి. ఉదయం అల్పాహారంలో ప్రోటీన్ ఎక్కువగా తీసుకోవడం వల్ల ఆకలి అదుపులో ఉండి, మధ్యాహ్నం భోజనంలో అతిగా తినడాన్ని నిరోధించవచ్చు.
మీరు క్యాలరీలు తక్కువగా ఉండే ప్రోటీన్ ఆహారాన్ని వేగంగా తయారుచేసుకోవాలనుకుంటే గుడ్లు బెస్ట్ ఆప్షన్. అదే శాకాహార విధానాన్ని పాటిస్తూ, ప్రతి 100 గ్రాములకు ఎక్కువ ప్రోటీన్, కాల్షియం పొందాలనుకుంటే పనీర్ ఉత్తమం. మీ జీవనశైలి, ఫిట్నెస్ లక్ష్యాలు, ఆహారపు అలవాట్లను బట్టి మీ ప్లేట్లో దేనికి చోటివ్వాలో నిర్ణయించుకోవచ్చు.