వైభవ్‌కు షాక్.. తొలి టీ20లో భారత ఓపెనింగ్ జోడీ ఇదే.. క్లారిటీ ఇచ్చేసిన శ్రేయాస్ అయ్యర్
India vs West Indies T20I: వెస్టిండీస్‌తో తొలి టీ20 మ్యాచ్‌లో భారత యువ సంచలనం వైభవ్ సూర్యవంశీకి తుది జట్టులో చోటు దక్కేది అనుమానంగా మారింది. రెగ్యులర్ ఓపెనర్లు అభిషేక్ శర్మ, సంజూ శాంసన్‌లను కొనసాగించనున్నట్లు కెప్టెన్ శ్రేయస్ అయ్యర్ పరోక్షంగా స్పష్టం చేశాడు. వైభవ్ భవిష్యత్తులో అవకాశాలు పొందుతాడని ఆయన పేర్కొన్నాడు.
India vs West Indies T20I: వెస్టిండీస్‌తో మూడు వన్డేల సిరీస్‌ను శుభమాన్ గిల్ సారథ్యంలోని టీమ్ ఇండియా 2-1 తేడాతో విజయవంతంగా కైవసం చేసుకుంది. ఇప్పుడు క్రికెట్ అభిమానుల దృష్టి ఐదు మ్యాచ్‌ల టీ20 సిరీస్‌పై కేంద్రీకృతమైంది. ఏషియన్ గేమ్స్‌లో స్వర్ణం గెలుచుకున్న భారత పురుషుల టీ20 జట్టు, శ్రేయస్ అయ్యర్ కెప్టెన్సీలో స్వదేశంలో వెస్టిండీస్‌తో తలపడేందుకు సిద్ధమైంది. ఈ ఉత్కంఠభరిత సిరీస్‌లో భాగంగా ఇరు జట్ల మధ్య తొలి టీ20 మ్యాచ్ ఈ నెల ఆరవ తేదీన లక్నో వేదికగా జరగనుంది.
అయితే, ఈ సిరీస్ ప్రారంభానికి ముందే తుది జట్టు కూర్పుపై పలు చర్చలు మొదలయ్యాయి. ముఖ్యంగా భారత యువ సంచలనం వైభవ్ సూర్యవంశీకి తొలి మ్యాచ్‌లో చోటు దక్కుతుందా లేదా అనే ప్రశ్న అందరిలోనూ నెలకొంది. ఆసియా క్రీడలలో తన అద్భుతమైన ప్రదర్శనతో అందరినీ ఆకట్టుకున్నప్పటికీ, జట్టు కూర్పు కారణాల వల్ల వైభవ్‌ను మరోసారి బెంచ్‌కే పరిమితం చేసే అవకాశాలు కనిపిస్తున్నాయి. ఇప్పటికే గత నెలలో అఫ్ఘనిస్తాన్‌తో జరిగిన సిరీస్‌లోనూ వైభవ్ మూడు మ్యాచ్‌లకు గాను డ్రింక్స్ బాయ్‌గానే పరిమితమయ్యాడు. ఇది అతని ప్రస్తుత పరిస్థితికి అద్దం పడుతోంది.
వెస్టిండీస్‌తో సిరీస్‌లోనూ రెగ్యులర్ ఓపెనర్లు అభిషేక్ శర్మ, సంజూ శాంసన్‌లనే కొనసాగించబోతున్నట్లు సమాచారం. ఈ విషయంపై భారత కెప్టెన్ శ్రేయస్ అయ్యర్ పాకిస్తాన్‌తో జరిగిన ఫైనల్ మ్యాచ్ అనంతరం జియో హాట్‌స్టార్‌తో మాట్లాడిన వ్యాఖ్యలు మరింత స్పష్టతనిచ్చాయి. "ప్రస్తుతం మేము ప్రపంచ కప్ గెలిచిన జట్టులోని ఓపెనర్లతోనే ముందుకు వెళ్తున్నాం. వారు ఆ స్థానానికి పూర్తి అర్హులు" అని శ్రేయస్ అయ్యర్ పరోక్షంగా పేర్కొన్నారు. ఈ వ్యాఖ్యలు వైభవ్ ప్రస్తుత జట్టులో ఓపెనర్‌గా బరిలోకి దిగే అవకాశాలు తక్కువని స్పష్టం చేస్తున్నాయి.
అదే సమయంలో, శ్రేయస్ అయ్యర్ వైభవ్ సూర్యవంశి భవిష్యత్తు గురించి ఆశాజనకంగా మాట్లాడారు. "ప్రస్తుతం వైభవ్ 15 మంది సభ్యుల జట్టులోనే ఉన్నాడు కాబట్టి అతడికి భవిష్యత్తులో ఖచ్చితంగా అవకాశాలు వస్తాయి. అవకాశం వచ్చినప్పుడు అతడు మైదానంలో ఆధిపత్యం చలాయిస్తాడనే నమ్మకం నాకు ఉంది" అని అయ్యర్ అన్నారు. వైభవ్‌తో తనకున్న బంధం గురించి మాట్లాడుతూ, "నేను వైభవ్‌తో చాలా క్లోజ్‌గా ఉంటాను. అందరూ అతనితో ఎప్పుడూ క్రికెట్ గురించే మాట్లాడుతుంటారు. కానీ నేను మైదానం వెలుపల అతడి జీవనశైలి, కుటుంబం, ఇతర విషయాల గురించి ఎక్కువగా చర్చిస్తాను. ఇది అతనికి ఎంతో ఉత్సాహాన్ని ఇస్తుంది. అతడు చూడడానికి చాలా సైలెంట్‌గా ఉంటాడు, కానీ మైదానంలో మాత్రం ప్రత్యర్థులపై విరుచుకుపడుతుంటాడు. డ్రెస్సింగ్ రూమ్‌లో కూడా చాలా సరదాగా ఉంటాడు" అని శ్రేయస్ అయ్యర్ వివరించారు.
దీంతో మొత్తానికి అయితే వెస్టిండీస్‌తో జరగబోయే తొలి టీ20లో ఓపెనర్‌గా వైభవ్‌ను పక్కన పెట్టినట్టేనని స్పష్టమవుతోంది. సంజూ శాంసన్, అభిషేక్ శర్మలు ఓపెనర్లుగా బరిలోకి దిగనున్నారు. ఈ తొలి మ్యాచ్ ఈ నెల 6వ తేదీన లక్నోలోని అటల్ బిహారీ వాజ్‌పేయి క్రికెట్ స్టేడియం వేదికగా జరగనుంది. ఈ మ్యాచ్ భారత కాలమానం ప్రకారం రాత్రి 7 గంటలకు ప్రారంభం అవుతుంది. ఇప్పటికే లక్నోకు చేరుకున్న ఇరు జట్లు ఈరోజు ప్రాక్టీస్ చేయనున్నాయి. క్రికెట్ అభిమానులు ఈ సిరీస్ కోసం ఉత్కంఠగా ఎదురుచూస్తున్నారు.