వెంకటేష్ తో చిరంజీవి మల్టీస్టారర్.. సోషల్ మీడియాలో ట్రెండ్ అవుతున్న న్యూస్
చిరంజీవి, వెంకటేష్ కాంబినేషన్‌లో మల్టీస్టారర్ రాబోతుందా..? టాలీవుడ్ సర్కిల్స్‌లోనే కాదు.. సోషల్ మీడియాలోనూ బాగా ట్రెండ్ అవుతున్న న్యూస్ ఇది. మరి ఇందులో నిజమెంత..? ఒకవేళ ఇదే నిజమైతే చిరుతో ఏ సినిమా కోసం వెంకీ రెడీ అవుతున్నారు..? అనిల్ రావిపూడి సినిమాలోనే ఈ క్రేజీ కాంబినేషన్‌ను చూసే ఛాన్స్ ఉందా..?
చిరంజీవి ప్రస్తుతం విశ్వంభరతో బిజీగా ఉన్నారు. దీని తర్వాత అనిల్ రావిపూడి లైన్‌లో స్క్రిప్ట్‌తో సిద్ధంగా ఉన్నారు. సమ్మర్ తర్వాత ఈ సినిమాను సెట్స్‌పైకి తీసుకొచ్చి.. రికార్డ్ స్పీడ్‌లో పూర్తి చేయాలని చూస్తున్నారు అనిల్. సంక్రాంతి రిలీజ్‌కు సినిమాను ప్లాన్ చేస్తున్నారు. ఉగాది రోజు చిరంజీవి, అనిల్ సినిమా ముహూర్తం జరగనుంది.
చిరంజీవి ప్రస్తుతం అనిల్ రావిపూడితో పాటు శ్రీకాంద్ ఓదెల సినిమాకి కూడా ఓకే చెప్పారు. అయితే చిరు చేయబోయే ఈ సినిమాల్లో ఏదో ఒకదాంట్లో వెంకటేష్ నటించబోతున్నట్లు ప్రచారం జరుగుతుంది.
ఈ ఇద్దరి కాంబోలో మల్టీస్టారర్ పక్కా అనే వార్తలు బాగా వైరల్ అవుతున్నాయి. పైగా చిరు కూడా వెంకీతో నటించాలని ఉందంటూ గతంలోనే చెప్పారు. చిరంజీవి సినిమాలో వెంకటేష్ అంటే ముందుగా గుర్తుకొచ్చే దర్శకుడు అనిల్ రావిపూడే.
ఎందుకంటే వెంకీతో ఇప్పటికే మూడు సినిమాలు చేసారీయన. పైగా చిరు నెక్ట్స్ చేయబోయే సినిమా ఈయనతోనే. అంటే ఈ కాంబో కనిపించబోయేది అనిల్ రావిపూడి సినిమాలోనే అంటున్నారు. పైగా మల్టీస్టారర్స్‌కు వెంకీ ఎప్పుడూ ఓపెన్‌గానే ఉంటారు.
మహేష్, పవన్ కళ్యాణ్ లాంటి స్టార్ హీరోలతో పాటు.. రామ్, నాగ చైతన్య లాంటి ఈ జనరేషన్ హీరోలతోనూ స్క్రీన్ షేర్ చేసుకున్నారు. కథ నచ్చితే ఎవరితో అయినా నటించడానికి రెడీ అంటున్నారు. ఈ క్రమంలోనే చిరుతో ఓ సినిమా చేయబోతున్నట్లు వార్తలు వినిపిస్తున్నాయి. ఈ కాంబినేషన్ కలిస్తే చూడ్డానికి రెండు కళ్లు సరిపోవేమో..?