Gnanavel Raja: అనుకోని వివాదంలో నిర్మాత జ్ఞానవేల్ రాజా
నిర్మాత అంటే తన సినిమా విడుదలకు ముందు సాధ్యమైనంత వరకు వివాదాలకు దూరంగా ఉంటారు.. కానీ ఇక్కడో నిర్మాత మాత్రం తెలియకుండానే వివాదాల్లో ఇరుక్కున్నాడు.. రజినీకాంత్ ఫ్యాన్స్ ఈ నిర్మాతను టార్గెట్ చేసి చుక్కలు చూపిస్తున్నారని చెప్పాలి.. ఇలా వివాదంలో ఇరుకున్న ఆ నిర్మాత ఎవరో తెలుసా ??
ఏ నిర్మాతైనా తన సినిమా విడుదలకు ముందు వీలైనంత వరకు వివాదాలకు దూరంగా ఉంటాడు.. కానీ ఇక్కడో నిర్మాత మాత్రం అనుకోకుండా వివాదాల్లో ఇరుక్కున్నాడు. ఏకంగా రజినీ ఫ్యాన్స్ ఆయన్నిప్పుడు టార్గెట్ చేసి చుక్కలు చూపిస్తున్నారు. నేనన్నది రజినీని కాదురా నాయన అంటే కూడా వినిపించుకోవట్లేదు. మరి అలా ఇరుక్కుపోయిన ఆ నిర్మాతెవరు..? ఇంతకీ ఆయనేం అన్నారు..?
ఎవ్వరితో అయినా పెట్టుకోవచ్చు కానీ ఫ్యాన్స్‌తో మాత్రం అస్సలు పెట్టుకోకూడదు.. ఎందుకంటే వాళ్లు కేవలం ఎమోషన్స్‌తోనే ముందుకు వెళ్తుంటారు. ఇప్పుడు తమిళ నిర్మాత జ్ఞానవేల్ రాజాకు ఈ ఫ్యాన్స్ నుంచే ఓ రేంజ్‌లో చుక్కలు కనిపిస్తున్నాయి. కంగువా రిలీజ్ హడావిడిలో ఉన్న ఈయనకు.. అనుకోని కష్టాలు వచ్చాయిప్పుడు.
నవంబర్ 14న ప్రపంచ వ్యాప్తంగా కంగువా విడుదల కానుంది. దాదాపు 200 కోట్లకు పైగా బడ్జెట్‌తో ఈ సినిమాను నిర్మిస్తున్నారు జ్ఞానవేల్ రాజా. ఇది కేవలం పార్ట్ 1 మాత్రమే.. రెండో భాగం షూటింగ్ వచ్చే ఏడాది మొదలయ్యే అవకాశాలున్నాయి. సూర్య కెరీర్‌కు కూడా ఈ సినిమా కీలకంగా మారింది. తెలుగులోనూ కంగువా భారీ స్థాయిలో విడుదల కానుంది.
అంతా బాగానే ఉంది కానీ కంగువా విడుదలకు ముందు అనుకోని చిక్కుల్లో పడిపోయారు నిర్మాత జ్ఞానవేల్ రాజా. కంగువా క్యాస్టింగ్ ఎవరో పోస్టర్స్‌తో విడుదల చేయొచ్చుగా అని అభిమానులు అడిగిన ప్రశ్నకు ఈయనిచ్చిన సమాధానం వివాదంలో పడేసింది. ఈ మధ్యే ఓ పెద్ద సినిమాకు ఇలాగే క్యాస్టింగ్ రివీల్ చేసారు.. కానీ అంత మంది స్టార్స్ ఉన్నా ఓపెనింగ్ కూడా రాలేదంటూ ఆన్సర్ ఇచ్చారు.
ఇన్ డైరెక్టుగా వేట్టయన్ సినిమాను జ్ఞానవేల్ రాజా టార్గెట్ చేసారంటూ రజినీ ఫ్యాన్స్ మండిపడుతున్నారు. కానీ తను చెప్పింది హిందీ సినిమా ఖేల్ ఖేల్ మే గురించి అంటూ క్లారిటీ ఇచ్చారు జ్ఞానవేల్ రాజా. అందులో అక్షయ్ కుమార్ సహా చాలా మంది ఉన్నా ఓపెనింగ్స్ కూడా రాలేదని.. అదే తాను ఎగ్జాంపుల్‌గా చెప్పానంటున్నారు. కానీ రజినీ ఫ్యాన్స్ మాత్రం వేట్టయన్‌నే అన్నారంటూ ట్రోల్ చేస్తున్నారు.