Mega157 Movie: ‘విశ్వంభర’లో విశేషాలేంటి.. చిరంజీవి సినిమా ఎలా ఉండబోతుంది..?
ఈ రోజు చిన్న సినిమాలు మొదలైతేనే రీ సౌండ్ మామూలుగా ఉండట్లేదు.. అలాంటిది చిరంజీవి లాంటి పెద్ద హీరో షూటింగ్ మొదలైతే మోత మామూలుగా ఉండదు కదా..! కానీ చిరు మాత్రం చాలా సైలెంట్‌గా పని మొదలు పెట్టాడు. తన నెక్ట్స్ సినిమా షూటింగ్ షురూ చేసాడు. వశిష్ట దర్శకత్వంలో ఈయన కమిటైన మెగా 156 షూటింగ్ మొదలైంది. నవంబర్ 22న ఈ చిత్ర రెగ్యులర్ షూటింగ్ మొదలు పెట్టారు.
డిసెంబర్ మొదటి వారంలో చిరంజీవి సెట్‌కు రానున్నాడు. అప్పటి వరకు ఆయన లేని సన్నివేశాల చిత్రీకరణ జరగనుంది. హైదరాబాద్‌లోనే మొదటి షెడ్యూల్ ప్లాన్ చేస్తున్నాడు దర్శకుడు వశిష్ట. యువీ క్రియేషన్స్ నిర్మిస్తున్న ఈ సినిమాపై అంచనాలు భారీగా ఉన్నాయి. బడ్జెట్ కూడా 200 కోట్ల వరకు పెడుతున్నట్లు అంచనా. సోషియో ఫాంటసీ నేపథ్యంలో ఈ సినిమాను తెరకెక్కిస్తున్నాడు వశిష్ట. బింబిసార తర్వాత ఈయన చేస్తున్న సినిమా కావడంతో అంచనాలు మామూలుగా లేవు.
పైగా జగదేకవీరుడు అతిలోకసుందరి, అంజి లాంటి సినిమాల తర్వాత చిరు చేస్తున్న పూర్తిస్థాయి సోషియో ఫాంటసీ డ్రామా ఇది. అన్నింటికీ మించి భోళా శంకర్ తర్వాత చిరు ఫ్యాన్స్ డీలా పడిపోయారు. ఓ వైపు ఒరిజినల్ స్టోరీస్‌తో రజినీ, కమల్, బాలయ్య లాంటి సీనియర్స్ వరస విజయాలు అందుకుంటుంటే.. చిరు మాత్రం రీమేక్స్ నమ్ముకుంటున్నారంటూ విమర్శలు వచ్చాయి. అందుకే చిరంజీవి కూడా ఆలోచనలో పడిపోయాడు.
తన తర్వాతి సినిమాల కథల విషయంలో ఒకటికి పదిసార్లు ఆలోచిస్తున్నాడు. అందుకే కళ్యాణ్ కృష్ణతో ముందు ప్లాన్ చేసిన బ్రో డాడీ రీమేక్ కూడా పక్కన బెట్టేసాడు. 156వ సినిమాను హోల్డ్‌లో పెట్టి.. వశిష్ట సినిమాను సెట్స్‌పైకి తీసుకొచ్చాడు మెగాస్టార్. 157 అనుకున్న సినిమా కాస్తా ఇప్పుడు 156కి మారిపోయింది. ఇప్పుడు ఈ చిత్ర షూటింగ్ కూడా సైలెంట్‌గానే మొదలు పెట్టాడు మెగాస్టార్.
మరోవైపు వశిష్ట సినిమా చేస్తూనే.. కూతురు సుష్మిత బ్యానర్‌లో ఓ సినిమా చేయాలని చూస్తున్నాడు చిరు. కాకపోతే ఈ సినిమాకు కథ ఇంకా సెట్ అవ్వలేదు. వశిష్ట సినిమాకు విశ్వంభర టైటిల్ దాదాపు ఖరారైపోయినట్లే. మూడు లోకాల చుట్టూ తిరిగే కథ ఇది.ఈ సినిమాలో హీరోయిన్స్ ఎవరనేది ఆసక్తికరంగా మారింది. ఆల్రెడీ తమన్నా రెండు సినిమాలు చేసారు.. నయన్‌తోనూ 2 సినిమాలు చేసారు చిరు. పైగా గాడ్ ఫాదర్‌లో చెల్లిగా నటించారు. దాంతో అనుష్క వైపు దర్శక నిర్మాతల చూపులు వెళ్తున్నాయి.
ఆమెతో పాటు మృణాళ్ ఠాకూర్ కూడా ఇందులో మరో హీరోయిన్‌గా నటించే అవకాశం లేకపోలేదు. ఇందులో ముగ్గురు హీరోయిన్లు ఉంటారని.. అలాగని చిరుతో వాళ్ల రొమాన్స్ ఎక్స్‌పెక్ట్ చేయొద్దు.. కథ ప్రకారమే అన్ని పాత్రలు నడుచుకుంటాయని చెప్పాడు దర్శకుడు వశిష్ట. తన చిన్నపుడు చిరును ఎలాగైతే చూసి మాయలో పడిపోయానో.. నేటి జనరేషన్ ఆడియన్స్‌కు అలాంటి చిరంజీవిని చూపించాలనే తన ప్రయత్నం అంటున్నాడు ఈ దర్శకుడు. స్టాలిన్‌లో స్పెషల్ సాంగ్ మినహాయిస్తే.. హీరోయిన్‌గా నటించలేదు జేజమ్మ. దాంతో మెగా 157లో ఆమె అయితే బాగుంటారని భావిస్తున్నారు మేకర్స్. ఈ మేరకు చర్చలు మొదలైనట్లు తెలుస్తుంది. మొత్తానికి సందడి లేకుండానే విశ్వంభర మొదలైంది.. మరి దాని రీసౌండ్ ఎలా ఉండబోతుందో..?