Puri Jagannadh: జీవితాన్ని మీ కంట్రోల్‌లోకి తెచ్చుకోవడం ఎలా.. ?.. పూరీ జగన్నాథ్ ఇంట్రెస్టింగ్ కామెంట్స్..
జీవితం ఎప్పుడూ మన చేతిలో ఉండదు, కానీ కొన్ని పనులు చేయడం ద్వారా 80% వరకు నియంత్రించవచ్చు అని అంటున్నారు డైరెక్టర్ పూరి జగన్నాథ్. క్రమం తప్పకుండా వ్యాయామం, మంచి ఆహారం, స్పష్టమైన ఆలోచనలు, సోషల్ మీడియాకు దూరం, నిజాయితీ వంటివి ఆ పనుల్లో కొన్ని. మిగిలిన 20% మన చేతుల్లో ఉండదు, బాహ్య శక్తులపై ఆధారపడి ఉంటుందని అన్నారు.
ప్రముఖ చలనచిత్ర దర్శకుడు పూరి జగన్నాథ్, తన పూరి మ్యూజింగ్స్ ద్వారా లైఫ్ ఇన్ కంట్రోల్ అనే అంశంపై తన వినూత్న ఆలోచనలను పంచుకున్నారు. జీవితం ఎల్లప్పుడూ మన చేతుల్లో ఉండదని, అదుపు తప్పినట్లు అనిపిస్తుందని ఆయన అభిప్రాయపడ్డారు. అయినప్పటికీ, కొన్ని ముఖ్యమైన పనులను క్రమం తప్పకుండా ఆచరించడం ద్వారా జీవితంలో 80% వరకు నియంత్రణ సాధించవచ్చని ఆయన చెప్పుకొచ్చారు. ప్రస్తుతం జగన్నాథ్ చేసిన కామెంట్స్ ఇప్పుడు సోషల్ మీడియాలో తెగ వైరలవుతున్నాయి.
పూరి జగన్నాథ్ ప్రకారం, జీవితాన్ని నియంత్రించడంలో కీలకమైన మొదటి మెట్టు శారీరక ఆరోగ్యం. పని ఉన్నా లేకపోయినా రోజుకు ఒక గంట వ్యాయామం చేయడం వల్ల 30% జీవితం మన నియంత్రణలో ఉంటుందని ఆయన అన్నారు. దీనివల్ల అనేక ఆరోగ్య సమస్యలు దూరమై, ఆసుపత్రుల పాలయ్యే అవసరం ఉండదు. మంచి ఆహారం తీసుకోవడం, నీళ్లు పుష్కలంగా తాగడం, ఆల్కహాల్ తగ్గించడం వంటివి శారీరక ఆరోగ్యానికి, తద్వారా జీవిత నియంత్రణకు దోహదపడతాయి.
రెండవ కీలక అంశం మానసిక ఆరోగ్యం, స్పష్టమైన ఆలోచనలు. ఏది తప్పో, ఏది ఒప్పో స్పష్టంగా తెలుసుకుంటే జీవితంలో సగం సమస్యలు తగ్గుతాయని పూరి జగన్నాథ్ పేర్కొన్నారు. పిచ్చి నమ్మకాలు, భయాలు, అత్యాశలు, మూఢనమ్మకాలకు దూరంగా ఉండటం వల్ల జీవితం మరింత మెరుగుపడుతుందని ఆయన సూచించారు. ఖాళీగా ఉండకుండా ఎప్పుడూ ఏదో ఒక పనిలో నిమగ్నమై ఉండటం వల్ల జీవితంపై పట్టు దొరుకుతుంది. సోషల్ మీడియాకు దూరంగా ఉండగలిగితే బాహ్య ప్రభావాల నుండి మనల్ని మనం రక్షించుకోవచ్చని ఆయన అభిప్రాయపడ్డారు.
వ్యక్తిగత విలువలకు ప్రాధాన్యత ఇవ్వడం మూడవ ముఖ్యమైన సూత్రం. ఒక వ్యక్తి యొక్క టాలెంట్, క్యారెక్టర్, నిజాయితీ వారిని చాలా వరకు కష్టాలకు దూరంగా ఉంచుతాయని పూరి జగన్నాథ్ వివరించారు. ఈ పనులన్నింటినీ నిబద్ధతతో పాటిస్తే, జీవితంలో 80% భాగం మన నియంత్రణలో ఉంటుందని ఆయన తెలిపారు. అయితే, మిగిలిన 20% మాత్రం మన చేతుల్లో ఉండదని పూరి జగన్నాథ్ వాస్తవికతను అంగీకరించారు. ఇవి ఇతరుల ప్రతిచర్యలు, రోడ్డు ప్రమాదాలు, సునామీ, వైరస్ మహమ్మారులు, యుద్ధాలు, టోర్నడోలు వంటి ప్రకృతి వైపరీత్యాలు లేదా ఊహించని సంఘటనలపై ఆధారపడి ఉంటాయని ఆయన అన్నారు. ఇవి మన నియంత్రణకు అతీతమైనవని అన్నారు.
పైన చెప్పిన నియమాలను పాటిస్తూ, ఏ అడవిలోనో సాధువులా జీవిస్తే, జాతకాలు చూపించాల్సిన అవసరం గానీ, గుళ్లలో పూజలు చేయించాల్సిన అవసరం గానీ ఉండదని పూరి జగన్నాథ్ బలంగా చెప్పారు. అలాంటి వ్యక్తి ప్రపంచానికి భారంగా ఉండడని, "You are burdenless" అని ఆయన అన్నారు. తనకు తెలిసిన ఎంతోమంది క్రమశిక్షణ కలిగిన అవివాహితులు (సింగిల్స్) తమకంటే సంతోషంగా, ప్రశాంతంగా ఉన్నారని ఆయన ఉదహరించారు. క్రమశిక్షణ కలిగిన వ్యక్తులకు 80% జీవితం వారి చేతుల్లోనే ఉంటుందని, మిగిలిన 20% దేవుడి దయ అని ఆయన ముగించారు. అయితే, చివరగా ఒక హాస్యభరితమైన వ్యాఖ్య చేస్తూ, ఎంత క్రమశిక్షణ కలిగిన వ్యక్తి అయినా పొరపాటున పెళ్లి చేసుకుంటే, 80% జీవితం వారి చేతుల్లో ఉండదని, మిగిలిన 20% కూడా వారి భాగస్వామి చేతుల్లోనే ఉంటుందని అన్నారు.