Laya : రోజూ నేను తినే ఫుడ్ ఇదే.. 44 ఏళ్ల వయసులో డైట్ సీక్రెట్ రివీల్ చేసిన లయ..
టాలీవుడ్ ఇండస్ట్రీలో ఒకప్పుడు అగ్రకథానాయికగా ఓ వెలుగు వెలిగిన హీరోయిన్ లయ. అప్పట్లో స్టార్ హీరోస్ సరసన నటించి మంచి గుర్తింపు తెచ్చుకున్న ఆమె పెళ్లి తర్వాత సినిమాలకు దూరంగా ఉండిపోయింది. ఇప్పుడిప్పుడే సెకండ్ ఇన్నింగ్స్ స్టార్ట్స్ చేసింది. తాజాగా ఓ ఇంటర్వ్యూలో తన డైట్, ఫిట్నెస్ సీక్రెట్స్ రివీల్ చేసింది.
నటి లయ తన వ్యక్తిగత ఆహార రహస్యాలను, జీవనశైలిని ఓ ఇంటర్వ్యూలో పంచుకున్నారు. ఆమె తాను ఆచరించే పద్ధతులను ఎవరికీ సలహాగా ఇవ్వడం లేదని, ఇది కేవలం తన అలవాటు మాత్రమేనని అన్నారు. చాలా ఏళ్లుగా ఇదే విధానాన్ని పాటిస్తున్న లయ, ఇది తనకు బాగా సరిపోయిందని వివరించారు. లయ అల్పాహారం (బ్రేక్ఫాస్ట్) చేయనని తెలిపారు. అల్పాహారం సమయానికి, మధ్యాహ్న భోజనం సమయానికి మధ్య తనకు ఎక్కువ సమయం ఉండదని, కాబట్టి బ్రేక్ఫాస్ట్ చేయడం తనకు వర్కవుట్ అవ్వదని తెలిపారు. దీనికి బదులుగా, ఆమె నేరుగా లంచ్ చేస్తారు.
పొద్దున లేవగానే వంట చేయడం మొదలుపెట్టి, సుమారు 11 గంటల సమయంలో వంట పూర్తవగానే భోజనం చేస్తారు. ఇదే ఆమెకు లంచ్ అవుతుంది. ఇంట్లో లేని సమయాల్లో మినహా, యూఎస్లో తన పని కూడా ఇంటి నుండే కాబట్టి ఈ దినచర్యను పాటిస్తానని చెప్పారు. లంచ్ కొంచెం ముందుగా తినడం వల్ల, ఆమె మధ్యలో స్నాక్స్ లేదా ఫ్రూట్స్ తీసుకోరు. సీజనల్ పండ్లు దొరికితే అప్పుడప్పుడు తింటారు. సాయంత్రం 6 లేదా 7 గంటల సమయంలో మళ్లీ ఆకలి వేసినప్పుడు, మిగిలిన కుటుంబ సభ్యులతో కలిసి ఆమె రెండోసారి భోజనం చేస్తారు.
రోజుకు రెండు పూటలా తినడమే తన అలవాటని లయ వివరించారు. ఆమె ఆహారంలో కూరలు అధిక మొత్తంలో ఉంటాయి. ముగ్గురు, నలుగురికి సరిపడే కూరను ఆమె ఒక్కరే తింటారని తెలిపారు. కూరగాయలు, పప్పులు ఎక్కువగా తీసుకుంటారు. అన్నాన్ని చాలా తక్కువ మోతాదులో, సుమారు మూడవ వంతు కప్పు మాత్రమే తీసుకుంటారు. అన్నం లేకుండా కేవలం కూర తినడం అనే ఫీలింగ్ రాకుండా ఉండటానికి మాత్రమే అన్నం తింటానని, లేకపోతే అది కూడా ఉండదని లయ పేర్కొన్నారు. అనేకమంది పెరుగు తినకూడదని చెబుతున్నప్పటికీ, లయ చిన్నప్పటి నుంచి పెరుగు తింటారు.
పాలు, కాఫీ, టీ తాగని ఆమెకు కాల్షియం లభించేందుకు పెరుగు అవసరమని, అందుకే గ్రీక్ యోగర్ట్ తీసుకుంటానని తెలిపారు. గ్రీక్ యోగర్ట్లో ప్రోటీన్ అధికంగా ఉంటుందని ఆమె అన్నారు. లయ పూర్తి శాకాహారి. జిమ్కు వెళ్లేవారు ప్రోటీన్ గురించి మాట్లాడినప్పుడు, శాకాహారులకు ప్రోటీన్ ఎక్కడి నుండి వస్తుందనేది ఒక సవాలని ఆమె ఒప్పుకున్నారు. అయితే, తాను పాటించే ఈ విధానం తన ఆరోగ్యానికి, శరీరానికి సరిపోయిందని, అందుకే తాను దీనిని కొనసాగిస్తున్నానని లయ స్పష్టం చేశారు.
మామిడి పండ్లు వేసవిలో, సీతాఫలాలు, నేరేడు పండ్లు, పనసకాయలు వాటి సీజన్లలో మాత్రమే తీసుకుంటానని చెప్పారు. అన్ని కాలాల్లో లభించని ఈ పండ్లను ఇష్టపడతానని ఆమె పేర్కొన్నారు. ఇది ఆమె ఆరోగ్యానికి, అందానికి దోహదపడుతుందని తెలిపారు. సౌందర్య సంరక్షణ విషయానికి వస్తే, లయ ఒక సాధారణ రొటీన్ను పాటిస్తారు. ఇందులో ఫేస్ వాష్, మాయిశ్చరైజర్, సన్స్క్రీన్ మాత్రమే ఉంటాయని తెలిపారు. సీరంలు వంటి అదనపు ఉత్పత్తులు వాడనని, తన రొటీన్ చాలా సింపుల్గా ఉంటుందని ఆమె వివరించారు. తన చర్మంపై ఎటువంటి అనవసర ప్రయోగాలు చేయనని తెలిపారు.