బంగారం కొనుగోలుదారులకు అలర్ట్! యాసిడ్ టెస్ట్‌లోనూ దొరకని కల్తీ బంగారం.. ఈ మోసం ఎలా జరుగుతోంది?
Gold Adulteration Telugu: బంగారం మార్కెట్లో కొత్త తరహా కల్తీ మోసం వెలుగులోకి వచ్చింది. బంగారం బరువును పెంచేందుకు రుథేనియం, ఇరిడియం, ఓస్మియం వంటి భారీ లోహాల పొడిని కలుపుతున్నట్లు ఆరోపణలు వస్తున్నాయి. విచిత్రమేంటంటే.. సాధారణ యాసిడ్ టెస్ట్, టచ్‌స్టోన్ పరీక్షల్లోనూ ఈ కల్తీని గుర్తించడం కష్టమవుతోంది. అసలు ఈ మోసం ఎలా జరుగుతోంది? కల్తీ బంగారాన్ని ఎలా గుర్తించవచ్చో తెలుసుకుందాం.
Gold Adulteration Telugu: ఇటీవల చోటు చేసుకుంటున్న పరిణామాలతో బంగారం కొనుగోలు చేసే వారు, నగల వ్యాపారులు అప్రమత్తంగా ఉండాల్సిన పరిస్థితి ఏర్పడింది. మార్కెట్లో బంగారం కల్తీకి సంబంధించి కొత్త తరహా మోసం వెలుగులోకి వచ్చింది. కొందరు అక్రమ సరఫరాదారులు బంగారంలో అధిక సాంద్రత కలిగిన భారీ లోహాల పొడిని కలిపి దాని బరువును కృత్రిమంగా పెంచుతున్నట్లు ఆరోపణలు వస్తున్నాయి. ఈ పదార్థాన్ని మార్కెట్లో 'గోల్డ్ పౌడర్' అని పిలుస్తున్నట్లు సమాచారం. సాధారణంగా బంగారం స్వచ్ఛతను గుర్తించేందుకు ఉపయోగించే పరీక్షల్లో కూడా ఈ కల్తీని గుర్తించడం కష్టంగా మారిందని వ్యాపారులు ఆందోళన వ్యక్తం చేస్తున్నారు.
యాసిడ్ టెస్ట్ చేసినా గుర్తించడం కష్టమే!.. సాధారణంగా బంగారం నాణ్యతను తెలుసుకునేందుకు యాసిడ్ టెస్ట్, టచ్‌స్టోన్ పరీక్షలు నిర్వహిస్తుంటారు. అయితే కొత్త తరహా కల్తీ బంగారం ఈ పరీక్షల్లోనూ అసలైన బంగారంలా కనిపించే అవకాశం ఉందని తెలుస్తోంది. దీంతో వ్యాపారులు బంగారం స్వచ్ఛతపై తప్పుడు అంచనాకు వచ్చే ప్రమాదం ఉంది. అయితే నగలు తయారు చేసేందుకు బంగారాన్ని కరిగించి, ప్రాసెస్ చేసే సమయంలో అసలు విషయం బయటపడుతోంది. అనుకున్న బరువుతో పోలిస్తే చాలా తక్కువ పరిమాణంలో అసలైన బంగారం లభిస్తుండటంతో నగల తయారీదారులు నష్టపోతున్నారు.
ఇండోర్‌లో నగల వ్యాపారుల అత్యవసర సమావేశం.. మధ్యప్రదేశ్‌లోని ఇండోర్ సారాఫా మార్కెట్లో పనిచేస్తున్న పలువురు నగల తయారీదారులు బంగారం కల్తీపై స్థానిక వ్యాపారులకు ఫిర్యాదు చేసినట్లు సమాచారం. దీంతో ఇండోర్ సిల్వర్, గోల్డ్ అండ్ జ్యువెలరీ ట్రేడర్స్ అసోసియేషన్ సోమవారం సాయంత్రం అత్యవసర సమావేశం నిర్వహించింది. బంగారం కొనుగోలు, విక్రయాల సమయంలో మరింత జాగ్రత్తగా ఉండాలని బులియన్ డీలర్లు, బ్రోకర్లకు సూచించింది. లావాదేవీలు జరిపే ముందు బంగారం స్వచ్ఛతను నిర్ధారించుకోవాలని హెచ్చరించింది.
రుథేనియం, ఇరిడియం, ఓస్మియం లోహాలతో కల్తీ?.. సారాఫా మార్కెట్ వ్యాపారుల కథనం ప్రకారం.. గత రెండు, మూడేళ్లుగా బంగారంలో రుథేనియం, ఇరిడియం, ఓస్మియం వంటి భారీ లోహాలను కలుపుతున్నారనే ఫిర్యాదులు వస్తున్నాయి. ఈ లోహాల సాంద్రత బంగారం కంటే ఎక్కువగా ఉండటంతో తక్కువ మొత్తంలో కలిపినా మొత్తం బరువు పెరుగుతుంది. దీంతో సాధారణ పరీక్షల్లో వీటిని గుర్తించడం కష్టమవుతోంది. ఈ అనుమానాస్పద పదార్థం మహారాష్ట్ర, పశ్చిమ బెంగాల్ మార్గాల ద్వారా భారత మార్కెట్లలోకి వస్తున్నట్లు వ్యాపారులు చెబుతున్నారు. చైనాలో తయారవుతోందనే అనుమానాలు ఉన్నప్పటికీ, దాని అసలు మూలం ఇంకా స్వతంత్రంగా నిర్ధారణ కాలేదు. మార్కెట్ ధర కంటే సుమారు 10 శాతం తక్కువకు ఈ పదార్థం లభిస్తున్నట్లు సమాచారం.
కల్తీని గుర్తించేందుకు ఆధునిక పరీక్షలు అవసరం.. ఇలాంటి కల్తీని గుర్తించేందుకు ఎక్స్‌రే ఫ్లోరోసెన్స్ (XRF) విశ్లేషణ, ఎలక్ట్రాన్ మైక్రోస్కోపీ వంటి ఆధునిక సాంకేతిక పరీక్షలు అవసరమని నిపుణులు సూచిస్తున్నారు. ఇవి బంగారంలో ఇతర లోహాలు ఉన్నాయా? వాటి పరిమాణం ఎంత? అనే విషయాలను గుర్తించేందుకు సహాయపడతాయి. మరోవైపు వినియోగదారులు కూడా బంగారం కొనుగోలు చేసేటప్పుడు అప్రమత్తంగా ఉండాలి. నమ్మకమైన నగల దుకాణాల్లోనే హాల్‌మార్క్ ఉన్న ఆభరణాలను కొనుగోలు చేయాలి. కేవలం బరువు, ప్రాథమిక పరీక్షలను చూసి బంగారం స్వచ్ఛతపై నిర్ణయానికి రావద్దని ఈ పరిణామాలు సూచిస్తున్నాయి. (Disclaimer: ఈ కథనంలోని కల్తీ ఆరోపణలు వ్యాపారుల ఫిర్యాదులు, నివేదికల ఆధారంగా ఉన్నాయి. అనుమానాస్పద పదార్థం మూలం ఇంకా స్వతంత్రంగా నిర్ధారించబడలేదు.)