Garlic Mutton Roast: ఘాటైన వెల్లుల్లి కారంతో.. మటన్ వేపుడు.. ఒక్క సారి తింటే వదిలిపెట్టరు
ఆదివారం పూట నాన్‌వెజ్ ప్రియులకు మటన్ కూర లేదా వేపుడు ఉంటే ఆ భోజనమే ఒక పండుగలా అనిపిస్తుంది. అయితే సాధారణంగా మటన్ ఫ్రై చేస్తే ముక్క గట్టిపడిపోతుందని లేదా నమలడం కష్టమవుతుందని చాలామంది భావిస్తుంటారు. కానీ ముక్కను కుక్కర్‌లో మటన్ సూప్‌తో సహా పర్ఫెక్ట్‌గా ఉడికించి, చివర్లో తాజాగా నూరిన ఘాటైన వెల్లుల్లి కారంతో రోస్ట్ చేస్తే.. ముక్క నోట్లో వెన్నలా కరిగిపోవడమే కాకుండా అద్భుతమైన సువాసనతో ప్రతి ఒక్కరినీ మెప్పిస్తుంది.
కావలసిన పదార్థాలు: మీడియం సైజు తాజా మటన్ ముక్కలు అర కేజీ, అర టీస్పూన్ పసుపు, 1 టీస్పూన్ మిరియాల పొడి లేదా కారం పొడి, 1 టీస్పూన్ తాజా అల్లం-వెల్లుల్లి పేస్ట్, రుచికి సరిపడా ఉప్పు, ముక్కలుగా తరిగిన 1 మీడియం సైజు టమాటా, 3 మీడియం సైజు ఉల్లిపాయలు, అర గ్లాసు నుండి ముప్పావు గ్లాసు నీళ్లు, వంట నూనె, యాలకులు – 3, లవంగాలు – 4, దాల్చినచెక్క – 1 అంగుళం ముక్క, 5 నుండి 6 గాట్లు పెట్టిన పచ్చిమిరపకాయలు, 5 నుండి 6 రెమ్మల తాజా కరివేపాకు, 2 టీస్పూన్ల ధనియాల పొడి, 1 టీస్పూన్ వేయించిన జీలకర్ర పొడి, అర టీస్పూన్ గరం మసాలా పొడి, కొద్దిగా వేయించిన జీడిపప్పు పలుకులు, కొద్దిగా తాజా కొత్తిమీర తరుగు, తాజా వెల్లుల్లి కారం కోసం: ఒక గుప్పెడు నిండుగా పొట్టు తీసిన వెల్లుల్లి రెబ్బలు, అర టీస్పూన్ జీలకర్ర, ఒకటిన్నర టేబుల్ స్పూన్ల కారం పొడి
తయారీ విధానం: అర కేజీ మటన్‌ను శుభ్రంగా కడిగి కుక్కర్‌లోకి తీసుకోవాలి. ఇందులో అర టీస్పూన్ పసుపు, 1 టీస్పూన్ మిరియాల పొడి, 1 టీస్పూన్ అల్లం-వెల్లుల్లి పేస్ట్, 1 టీస్పూన్ సాల్ట్, 2 రెమ్మల కరివేపాకు, కొద్దిగా కొత్తిమీర, తరిగిన 1 టమాటా, 1 చిన్న ఉల్లిపాయ ముక్కలు, 1 టేబుల్ స్పూన్ నూనె మరియు అర నుండి ముప్పావు గ్లాసు నీళ్లు పోసి కలపాలి. కుక్కర్ మూతపెట్టి మీడియం మంటపై 4 నుండి 5 విజిల్స్ రానిచ్చి స్టవ్ ఆఫ్ చేయాలి. మటన్ ముదురుదైతే మరో విజిల్ ఎక్స్‌ట్రా రానివ్వాలి. ప్రెజర్ పోయాక మూత తీసి చూస్తే మటన్ చేత్తో తుంచితే తునిగేలా మెత్తగా ఉడకాలి; దీనిని నీళ్లతో సహా పక్కన పెట్టుకోవాలి.
మిక్సీ జార్‌లో లేదా రోట్లో గుప్పెడు వెల్లుల్లి రెబ్బలు, అర టీస్పూన్ జీలకర్ర, ఒకటిన్నర టేబుల్ స్పూన్ల కారం వేసి నీళ్లు లేకుండా కచ్చాపచ్చాగా గ్రైండ్ చేసి పక్కన పెట్టుకోవాలి. స్టవ్‌పై పాన్ పెట్టి 4 టేబుల్ స్పూన్ల నూనె వేడిచేయాలి. నూనె కాగాక యాలకులు, లవంగాలు, దాల్చినచెక్క వేసి వేయించాలి. ఆ తర్వాత తరిగిన 2 ఉల్లిపాయల ముక్కలు వేసి గోల్డెన్ బ్రౌన్ కలర్ వచ్చే వరకు మీడియం మంటపై వేపాలి. ఉల్లిపాయలు వేగిన తర్వాత ఉడికించి ఉంచుకున్న మటన్‌ను నీళ్లతో సహా మొత్తం పోయాలి. మంటను హై ఫ్లేమ్‌లో ఉంచి 5-6 నిమిషాల పాటు నీరంతా పూర్తిగా ఇంకిపోయి నూనె పైకి తేలే వరకు ఉడికించాలి.
నూనె పైకి తేలిన తర్వాత మంటను మీడియం ఫ్లేమ్‌లో పెట్టి.. మధ్యలో గాట్లు పెట్టిన 5-6 పచ్చిమిరపకాయలు, 5-6 రెమ్మల కరివేపాకు, సరిపడా సాల్ట్, 2 టీస్పూన్ల ధనియాల పొడి, 1 టీస్పూన్ జీలకర్ర పొడి, అర టీస్పూన్ గరం మసాలా పొడి వేసి ముక్కలను నూనెలో 2-3 నిమిషాలు వేయించాలి. ముక్కలు చక్కగా వేగిన తర్వాత.. ముందుగా సిద్ధం చేసుకున్న వెల్లుల్లి కారాన్ని మొత్తం వేయాలి. ఇప్పుడు మంటను లో ఫ్లేమ్‌లో పెట్టుకోవాలి; వెల్లుల్లి కారం ముక్కలకు బాగా పట్టి, వెల్లుల్లిలోని పచ్చివాసన పోయి కమ్మటి సువాసన వచ్చే వరకు మాడిపోకుండా నిదానంగా వేయించాలి.
చివరగా వేయించిన జీడిపప్పు పలుకులు, సన్నగా తరిగిన తాజా కొత్తిమీర చల్లుకుని స్టవ్ ఆఫ్ చేయాలి. అంతే, నోరూరించే ఆంధ్ర స్టైల్ 'వెల్లుల్లి మటన్ వేపుడు' సిద్ధం! వేడివేడి అన్నంలో ఈ వేపుడు ముక్కలు కలుపుకుని తిన్నా, లేదా పక్కన రసం, సాంబార్, పప్పుచారుకు నంజుకుని తిన్నా అద్భుతమైన ఘాటు, రుచితో పరవశింపజేస్తుంది!