Vaccination: భారత్ లో కరోనా వ్యాక్సినేషన్ మొదలై ఆరునెలలు.. ఇప్పటివరకూ ఎంతమందికి టీకా అందిందంటే..

Vaccination In India

Vaccination: భారతదేశంలో వ్యాక్సినేషన్ ప్రారంభించి ఆరు నెలలు పూర్తి కావస్తోంది. రేపటితో అంటే జూలై 16తో 180 రోజులు పూర్తి అవుతాయి. ఇప్పటివరకూ దేశవ్యాప్తంగా 39 కోట్లకు పైగా మోతాదులను ప్రజలకు అందించారు. మొదట్లో వేగంగా ప్రారంభమైన వ్యాక్సినేషన్ కార్యక్రమం వివిధ కారణాల వల్ల మధ్యలో మందగించింది. సరిపడినన్ని టీకాలు అందుబాటులో లేకపోవడంతో కొన్నిరోజుల పాటు దేశవ్యాప్తంగా వ్యాక్సినేషన్ కార్యక్రమం దాదాపుగా నిలిచిపోయింది. ఈ దశలో కేంద్రం తక్షణ చర్యలు చేపట్టి.. వ్యాక్సినేషన్ కోసం ప్రత్యేక విధానం తీసుకువచ్చింది. దీంతో టీకా కార్యక్రమం దేశవ్యాప్తంగా ఊపందుకుంది. వేగవంతంగా టీకాలను అందించేందుకు కేంద్రం ప్రయత్నాలు కొనసాగిస్తోంది. కేంద్ర ఆరోగ్య మంత్రిత్వ శాఖ వెల్లడించిన వివరాల ప్రకారం, బుధవారం సాయంత్రం వరకు వచ్చిన సమాచారం మేరకు దేశవ్యాప్తంగా వ్యాక్సినేషన్ల సంఖ్య 39.10 కోట్లకు పెరిగింది.

దేశవ్యాప్తంగా బుధవారం 32.10 లక్షలకు పైగా టీకాలు వేశారు. వీరిలో 18 నుంచి 44 సంవత్సరాల వయస్సులో 13.82 లక్షల జనాభాకు మొదటి, 1.57 లక్షల మందికి రెండవ మోతాదు ఇచ్చారు. 37 రాష్ట్రాలు, కేంద్రపాలిత ప్రాంతాలలో, ఈ వయస్సు వారిలో మొత్తం 11.78 కోట్ల మందికి మొదటి మోతాదు ఇవ్వడం జరిగింది.

8 రాష్ట్రాల్లో, 18-44 సంవత్సరాల వయస్సు గల 50 లక్షల మందికి మొదటి మోతాదు టీకా ఇచ్చారు. ఉత్తర ప్రదేశ్, మధ్యప్రదేశ్, రాజస్థాన్, తమిళనాడు, బీహార్, గుజరాత్, కర్ణాటక, మహారాష్ట్ర 8 రాష్ట్రాలు దరఖాస్తు చేసుకున్న 18 నుంచి 44 ఏళ్ల వయస్సు గల వారికి మొదటి మోతాదును పూర్తిగా ఇచ్చాయి. ఆంధ్రప్రదేశ్, అస్సాం, ఛత్తీస్‌గఢ్, ఢిల్లీ, హర్యానా, జార్ఖండ్, కేరళ, తెలంగాణ, హిమాచల్ ప్రదేశ్, ఒడిశా, పంజాబ్, ఉత్తరాఖండ్, పశ్చిమ బెంగాల్ లో ఈ వయసు వారికి పది లక్షల మందికి పైగా టీకాలు వేశారు.

ముంబైలోని 35 కేంద్రాల్లో..

ముంబైలోని 35 టీకా కేంద్రాల్లో జూలై 15 నుంచి గర్భిణీ స్త్రీలకు కరోనా వ్యాక్సిన్ ఇస్తామని బృహన్ ముంబై మునిసిపల్ కార్పొరేషన్ (బిఎంసి) బుధవారం తెలిపింది. బుధవారం వరకు నగరంలో మొత్తం 62.33 లక్షల మందికి కరోనా వ్యాక్సిన్ ఇచ్చారు. వీరిలో 13.68 లక్షలు రెండవ మోతాదును అందుకున్నారు. ప్రస్తుతం ముంబైలో 407 క్రియాశీల కరోనా టీకా కేంద్రాలు ఉన్నాయి. వీటిలో 286 బీఎంసీ, 20 మహారాష్ట్ర ప్రభుత్వం, 101 ప్రైవేట్ కేంద్రాలు ఉన్నాయి.

దేశవ్యాప్తంగా ఇప్పటివరకూ టీకాలు పొందిన వివిధ వర్గాల లెక్కలు ఇలా..

ఆరోగ్య సంరక్షణ కార్మికులు

1 వ మోతాదు – 1.02 కోట్లు
2 వ మోతాదు – 74.47 లక్షలు

ఫ్రంట్‌లైన్ కార్మికుల

మొదటి మోతాదు – 1.77 కోట్లు
రెండవ మోతాదు – 1 కోట్లు

18-44 సంవత్సరాల వయస్సు

మొదటి మోతాదు – 11.64 కోట్లు
రెండవ మోతాదు – 40.30 లక్షలు

45-59 సంవత్సరాల వయస్సు

1 వ మోతాదు – 9.56 కోట్ల
2 వ మోతాదు – 2.54 కోట్లు

60 ఏళ్లలోపు

మొదటి మోతాదు – 7.13 కోట్లు
రెండవ మోతాదు – 2.93 కోట్లు

Also Read: Vaccination: ఎంత విచిత్రం.. అమ్మ బాబోయ్‌ అన్నవారే ఇప్పుడు భారీ వర్షంలో క్యూ కట్టారు

‘సెకండ్ వేవ్ ఇంకా తగ్గలేదు’.. దేశంలో మళ్లీ పెరిగిన మరణాలు.. గుబులు పుట్టిస్తున్న కొత్త వేరియంట్లు.!