Indian Railways: రైల్వే స్టేషన్లలో ఇకపై టీ, కాఫీ విక్రయాలు బంద్.. రైల్వే కీలక నిర్ణయం!
Indian Railways New Rules Telugu: రైల్వే ప్రయాణికులకు ముఖ్య గమనిక. స్టేషన్లలోని కిరాణా కియోస్క్‌లలో విక్రయించే వస్తువులపై సెంట్రల్ రైల్వే కొత్త నిబంధనలు తీసుకొచ్చింది. ఇకపై టీ, కాఫీ, వండిన ఆహార పదార్థాలను విక్రయించడానికి అనుమతి ఉండదు. మరి ఏయే వస్తువులను అమ్ముకోవచ్చు? పూర్తి వివరాలు తెలుసుకోండి.
Indian Railways New Rules Telugu: రైల్వే స్టేషన్లలో ప్రయాణికులకు అందుబాటులో ఉండే కిరాణా దుకాణాల విషయంలో సెంట్రల్ రైల్వే కీలక నిర్ణయం తీసుకుంది. ఈ కియోస్క్‌లలో విక్రయించేందుకు అనుమతించిన వస్తువుల జాబితాను అన్ని డివిజన్లలో ఒకే విధంగా అమలు చేయాలని నిర్ణయించింది. ఇందులో భాగంగా వండిన ఆహార పదార్థాలు, టీ, కాఫీ విక్రయాలపై నిషేధం విధించింది. స్టేషన్లలో పరిశుభ్రతను మెరుగుపరచడం, ప్రయాణికులకు మెరుగైన సేవలు అందించడం, అనధికార విక్రయాలను అరికట్టడం లక్ష్యంగా ఈ చర్యలు చేపట్టింది.
రైల్వే స్టేషన్లలోని దుకాణాల్లో ఏయే వస్తువులు విక్రయించవచ్చంటే?
రైల్వే శాఖ కొత్త మార్గదర్శకాల ప్రకారం కిరాణా కియోస్క్‌లలో నిత్యావసర వస్తువులు, ప్యాకేజ్డ్ ఆహార పదార్థాలు, వ్యక్తిగత సంరక్షణ ఉత్పత్తులను విక్రయించేందుకు అనుమతి ఉంది. వీటిలో బియ్యం, గోధుమలు, పప్పులు, పిండి, వంట నూనెలు, చక్కెర, ఉప్పు, మసాలా దినుసులు, డ్రై ఫ్రూట్స్ వంటి వస్తువులు ఉన్నాయి.
అలాగే రైల్వే శాఖ ఆమోదించిన బ్రాండ్లకు చెందిన ప్యాకేజ్డ్ తాగునీరు, పండ్ల రసాలు, ఎనర్జీ డ్రింక్స్, శీతల పానీయాలను విక్రయించవచ్చు. బిస్కెట్లు, పాప్‌కార్న్, చిప్స్ వంటి ప్యాకేజ్డ్ స్నాక్స్‌తో పాటు ఇన్‌స్టంట్ నూడుల్స్, రెడీ టు ఈట్ ఆహార పదార్థాలు, సాస్‌లు, జామ్‌లు, ఊరగాయలకు కూడా అనుమతి ఉంది. పాల ఉత్పత్తులు, బేకరీ పదార్థాలను సైతం విక్రయించవచ్చు. పరోటాలు, కట్లెట్స్, నగెట్స్ వంటి వండుకోవడానికి సిద్ధంగా ఉండే ఫ్రోజెన్ స్నాక్స్‌ను కూడా విక్రయించేందుకు అనుమతి ఇచ్చారు. ఐస్‌క్రీమ్‌లను నిల్వ చేసేందుకు మీడియం సైజు డీప్ ఫ్రీజర్లను ఉపయోగించవచ్చు.
వ్యక్తిగత సంరక్షణ ఉత్పత్తులకూ అనుమతి
ప్రయాణికులకు అవసరమైన వ్యక్తిగత సంరక్షణ, పరిశుభ్రత ఉత్పత్తులను కూడా కియోస్క్‌లలో అందుబాటులో ఉంచవచ్చు. సబ్బులు, షాంపూలు, టూత్‌పేస్ట్‌లు, డిటర్జెంట్లు, టిష్యూలు, న్యాప్‌కిన్లు, టాయిలెట్ పేపర్ వంటి వస్తువులు ఈ జాబితాలో ఉన్నాయి. వీటితో పాటు పిల్లల డైపర్లు, బేబీ ఫుడ్, బేబీ వైప్స్, పెంపుడు జంతువుల ఆహారం, వాటి సంరక్షణకు అవసరమైన ఉత్పత్తులు, స్టేషనరీ వస్తువులు, చిన్నపాటి గృహోపకరణాలను కూడా విక్రయించవచ్చు.
టీ, కాఫీ, వండిన ఆహార పదార్థాల విక్రయాలపై నిషేధం
కొత్త నిబంధనల్లో భాగంగా కిరాణా కియోస్క్‌లలో వండిన ఆహార పదార్థాలు, టీ, కాఫీ విక్రయించడాన్ని సెంట్రల్ రైల్వే నిషేధించింది. అన్ని స్టేషన్లలోని కియోస్క్‌ల నిర్వాహకులు ఒకే విధమైన నిబంధనలను పాటించేలా ఈ నిర్ణయం తీసుకుంది. అదేవిధంగా, దుకాణాల నిర్వాహకులు ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) నిబంధనలను తప్పనిసరిగా పాటించాలి. దుకాణాల లోపల, పరిసర ప్రాంతాల్లో పరిశుభ్రతను నిర్వహించాలి. దుకాణానికి సుమారు ఒక మీటరు పరిధిలో చెత్త సంచులతో కూడిన డస్ట్‌బిన్‌లను ఏర్పాటు చేయాలి.
పరిశుభ్రత, ప్రయాణికుల సౌకర్యానికి ప్రాధాన్యం
స్పెషల్ క్లీన్లీనెస్ క్యాంపెయిన్ 6.0లో భాగంగా ఈ చర్యలు చేపట్టినట్లు సెంట్రల్ రైల్వే వెల్లడించింది. ప్రయాణికులకు అవసరమైన నిత్యావసరాలు, బ్రాండెడ్ ఉత్పత్తులు, గృహోపకరణాలు సరసమైన ధరలకు అందుబాటులో ఉంచడంతో పాటు స్టేషన్లలో పరిశుభ్రతను కాపాడటమే ఈ మార్గదర్శకాల ప్రధాన ఉద్దేశమని తెలిపింది.
రైల్వే శాఖకు నాన్-ఫేర్ రెవెన్యూ (NFR) ఆదాయాన్ని పెంచడంతో పాటు, పారదర్శకమైన వాణిజ్య కార్యకలాపాలను ప్రోత్సహించడం, అనధికార విక్రయాలను నియంత్రించడం కూడా ఈ నిర్ణయం లక్ష్యాలుగా ఉన్నాయి. ఈ వివరాలతో సెంట్రల్ రైల్వే ముఖ్య ప్రజాసంబంధాల అధికారి డాక్టర్ స్వప్నిల్ నీలా సోమవారం పత్రికా ప్రకటన విడుదల చేశారు.