Dhanush: అన్నాడీఎంకేలోకి ధనుష్..? మాజీ మంత్రి సంచలన కామెంట్స్..

Dhanush Political Entry

తమిళ సినీ రంగం నుంచి రాజకీయాల్లోకి మరో స్టార్ హీరో అడుగుపెట్టబోతున్నారా? విజయ్ తమిళగ వెట్రి కళగం పార్టీ స్థాపించి రాజకీయాల్లో దూకుడు పెంచిన వేళ.. నేషనల్ అవార్డ్ విన్నింగ్ స్టార్ యాక్టర్ ధనుష్ కూడా పొలిటికల్ ఎంట్రీ ఇవ్వనున్నారనే వార్తలు కోలీవుడ్‌తో పాటు తమిళనాడు రాజకీయ వర్గాల్లో ఒక్కసారిగా పెను దుమారం రేపుతున్నాయి. ఈ నేపథ్యంలో తమిళనాడు మాజీ మంత్రి, అన్నాడీఎంకే సీనియర్ నేత కేటీ రాజేంద్ర బాలాజీ వ్యాఖ్యలు రాజకీయ వర్గాల్లో హాట్ టాపిక్‌గా మారాయి. శివకాశిలో మీడియాతో మాట్లాడిన మాజీ మంత్రి రాజేంద్ర బాలాజీకి ధనుష్ రాజకీయ ఎంట్రీపై విలేకరుల నుంచి ప్రశ్నలు ఎదురయ్యాయి. దీనిపై ఆయన స్పందిస్తూ.. ధనుష్ యువతలో విపరీతమైన ఆదరణ, బలమైన ప్రభావం ఉన్న అగ్ర కథానాయకుడని ప్రశంసించారు. ‘‘ధనుష్ అన్నాడీఎంకేలో చేరాలని భావిస్తే.. మేము ఆయన్ను రెండు చేతులా సాదరంగా ఆహ్వానిస్తాం’’ అని స్పష్టం చేశారు. పార్టీని బలోపేతం చేసేందుకు, పార్టీ సిద్ధాంతాలను ముందుకు తీసుకెళ్లేందుకు ఉపయోగపడే ప్రతి ఒక్కరినీ చేర్చుకునేందుకు అన్నాడీఎంకే సిద్ధంగా ఉంటుందని ఆయన తెలిపారు.

పళనిస్వామి సమర్థుడు

అన్నాడీఎంకే ప్రధాన కార్యదర్శి, మాజీ ముఖ్యమంత్రి ఎడప్పాడి కె. పళనిస్వామి నాయకత్వం గురించి ప్రస్తావిస్తూ.. విభిన్న వర్గాల ప్రజలను ఏకతాటిపైకి తీసుకురావడంలో ఆయన సమర్థుడని, కొత్తగా పార్టీలోకి వచ్చేవారి విషయంలో ఎలాంటి వివక్ష చూపించబోమని అన్నారు. పార్టీ ఎదుగుదలకు ఉపయోగపడే నిర్మాణాత్మక సలహాలను అధిష్టానం ఎప్పుడూ స్వీకరిస్తుందని తెలిపారు.

సినిమాలు, రాజకీయం రెండూ ఒకేసారి వద్దు

నటులు ప్రజా జీవితంలోకి రావడానికి పూర్తి హక్కు ఉందని చెబుతూనే.. రాజేంద్ర బాలాజీ ఒక కీలక సూచన చేశారు. ప్రత్యక్ష రాజకీయాల్లోకి అడుగుపెట్టిన తర్వాత సినిమాల్లో నటించడం మానేయాలని ఆయన అభిప్రాయపడ్డారు. ఎవరి పేరూ ప్రస్తావించకుండానే.. ఒకే సమయంలో సినిమాలు, రాజకీయాలు రెండూ చేయడం సరైన పద్ధతి కాదని విమర్శించారు. అయితే ధనుష్ అన్నాడీఎంకే నేతలతో చర్చలు జరిపారా లేదా అనే విషయంపై మాత్రం ఆయన స్పష్టత ఇవ్వలేదు. ‘‘ధనుష్ అన్నాడీఎంకేలో చేరతారనే సమాచారంలో నిజం ఎంత ఉంది? లేక ఇది కేవలం వదంతులేనా? అనేది కాలమే నిర్ణయిస్తుంది’’ అని వ్యాఖ్యానించారు.

సోషల్ మీడియాలో వైరల్ అవుతున్న పార్టీ పేరు.. అసలు నిజమేంటి?

గత కొద్ది రోజులుగా ధనుష్ ఎన్నికల సంఘం వద్ద తన రాజకీయ పార్టీని రిజిస్టర్ చేయించారని, దానికి తమిళనాడు ఉచ్చి కళగం అని పేరు పెట్టినట్లు సోషల్ మీడియాలో విస్తృతంగా ప్రచారం జరుగుతోంది. అయితే ఈ ప్రచారంపై ఇప్పటివరకు ధనుష్ గానీ, ఆయన అధికారిక బృందం గానీ ఎలాంటి అధికారిక ప్రకటన చేయలేదు.

మరోవైపు అక్టోబర్ 15న ధనుష్ ఫ్యాన్స్ క్లబ్ ప్రతినిధుల సమావేశం జరిగినట్లు సమాచారం. భవిష్యత్ కార్యక్రమాలపై చర్చించిన ఈ సమావేశంలో.. అభిమాన సంఘాలను ఒక సేవా సంస్థగా విస్తరించాలని, దీనికి ప్రత్యేకంగా ఒక జెండా, చిహ్నం కూడా రూపొందిస్తున్నట్లు వార్తలు వచ్చాయి. అభిమాన సంఘాల సేవా కార్యక్రమాల విస్తరణను కొందరు రాజకీయ పార్టీ ఏర్పాటుకు లేదా ఏదైనా ఇప్పటికే ఉన్న పార్టీలో చేరికకు నాందిగా ప్రచారం చేస్తుండటంతో ఈ ఊహాగానాలకు మరింత బలం చేకూరింది. విజయ్ ఎంట్రీతో ఇప్పటికే వేడెక్కిన తమిళనాట.. ధనుష్ పొలిటికల్ అడుగులు నిజంగానే రాజకీయ దిశగా పడతాయా? లేక కేవలం సామాజిక సేవలకే పరిమితం అవుతారా? అనేది తెలియాలంటే స్వయంగా ధనుష్ నోరు విప్పే వరకు వేచి చూడాల్సిందే.