
దేశ రాజధాని ఢిల్లీలో ఘోర ప్రమాదం చోటుచేసుకుంది. వివేక్ విహార్ ప్రాంతంలోని ఓ నివాస భవనం పైకప్పు ఒక్కసారిగా కుప్పకూలడంతో తీవ్ర కలకలం రేగింది. ఈ ఘటనలో పలువురు శిథిలాల కింద చిక్కుకున్నట్లు అనుమానాలు వ్యక్తమయ్యాయి. సమాచారం అందుకున్న అగ్నిమాపక సిబ్బంది, ఢిల్లీ పోలీసులు, సహాయక బృందాలు వెంటనే రంగంలోకి దిగి సహాయక చర్యలు చేపట్టాయి. ఈ ప్రమాదంతో స్థానికంగా భయాందోళనలు నెలకొన్నాయి.
వివరాల్లోకి వెళ్తే.. ఢిల్లీలోని వివేక్ విహార్ ఫేజ్-2 ప్రాంతంలో మంగళవారం (నవంబర్ 17) ఉదయం ఈ ప్రమాదం జరిగింది. సుమారు రెండున్నర అంతస్తుల ఎత్తున్న ఓ నివాస భవనం పైభాగం ఒక్కసారిగా కూలిపోయింది. ఉదయం 10 గంటల సమయంలో భారీ శబ్దం వినిపించడంతో స్థానికులు ఉలిక్కిపడ్డారు. వెంటనే సంఘటనా స్థలానికి చేరుకుని చూడగా, భవనం కొంతభాగం పూర్తిగా కూలిపోయి కనిపించింది. ఆ ప్రాంతమంతా దుమ్ముతో నిండిపోయింది. శిథిలాల కింద చిక్కుకున్న వారి ఆర్తనాదాలు వినిపించడంతో స్థానికులు తీవ్ర ఆందోళనకు గురయ్యారు.
ఉదయం సుమారు 10:13 గంటలకు అగ్నిమాపక విభాగానికి ప్రమాదంపై సమాచారం అందింది. వెంటనే రెండు ఫైర్ ఇంజిన్లు సంఘటనా స్థలానికి చేరుకున్నాయి. ఢిల్లీ పోలీసులు, రెస్క్యూ సిబ్బంది సహాయక చర్యలు ప్రారంభించారు. మొదట శిథిలాల కింద ఆరుగురు చిక్కుకుని ఉండవచ్చని అధికారులు భావించారు. స్థానికులు కూడా సహాయక బృందాలతో కలిసి శిథిలాలను తొలగిస్తూ బాధితులను బయటకు తీసుకొచ్చేందుకు ప్రయత్నించారు.
వివేక్ విహార్ ఫేజ్-2లో ఇళ్లు ఇరుకైన సందుల్లో ఉండటంతో సహాయక చర్యలకు కొంత ఇబ్బంది ఎదురైనట్లు తెలుస్తోంది. అయినప్పటికీ అగ్నిమాపక సిబ్బంది, పోలీసులు, స్థానికులు సమన్వయంతో సహాయక చర్యలు కొనసాగించారు. శిథిలాల నుంచి బయటకు తీసిన క్షతగాత్రులను సమీపంలోని ఆసుపత్రికి తరలించినట్లు సమాచారం. వారిలో ఓ చిన్నారి పరిస్థితి విషమంగా ఉన్నట్లు ప్రాథమిక కథనాలు వెల్లడించాయి.
మరోవైపు ఈ భవనం ఎందుకు కూలిపోయిందనే విషయం ఇంకా స్పష్టంగా తెలియరాలేదు. నిర్మాణ లోపాలా? భవనం పాతబడటమా? లేక మరేదైనా కారణమా? అనే కోణాల్లో పోలీసులు దర్యాప్తు చేస్తున్నారు. ఈ ప్రమాదానికి సంబంధించి మృతులు, క్షతగాత్రుల తుది సంఖ్యపై అధికారిక నిర్ధారణ రావాల్సి ఉంది. సహాయక చర్యలు, దర్యాప్తు కొనసాగుతున్న నేపథ్యంలో మరిన్ని వివరాలు వెలువడే అవకాశం ఉంది.
మరిన్ని జాతీయ వార్తల కోసం ఇక్కడ క్లిక్ చేయండి..