
చేతులు లేదా కాళ్లలో తరచుగా తిమ్మిర్లు పట్టడం, జలదరింపు లేదా సూదులతో గుచ్చినట్లు అనిపించడం వంటి లక్షణాలు కనిపిస్తే నిర్లక్ష్యం చేయకూడదు. వీటికి అనేక కారణాలు ఉన్నప్పటికీ, శరీరంలో విటమిన్ బి12 లోపం కూడా ఒక ముఖ్య కారణం కావచ్చు. నాడీ వ్యవస్థ పనితీరుకు, ఎర్ర రక్తకణాల తయారీకి విటమిన్ బి12 అత్యంత కీలకం.
విటమిన్ బి12 లోపించినప్పుడు నాడీ కణాల రక్షణ పొరపై ప్రభావం పడే అవకాశం ఉంటుంది. దీనివల్ల మెదడు నుంచి శరీర భాగాలకు వెళ్లే సంకేతాల వేగం తగ్గి, చేతులు, కాళ్లలో స్పర్శ తగ్గడం, జలదరింపు లేదా తిమ్మిర్లు రావచ్చు. లోపం చాలాకాలం పాటు కొనసాగితే పెరిఫెరల్ న్యూరోపతి వంటి నరాల సంబంధిత సమస్యలు తలెత్తే ప్రమాదం ఉందని వైద్య నిపుణులు సూచిస్తున్నారు.
విటమిన్ బి12 లోపం వల్ల ఎర్ర రక్తకణాల ఉత్పత్తి దెబ్బతిని రక్తహీనత ఏర్పడవచ్చు. ఫలితంగా శరీర కణజాలాలకు, నరాలకు తగినంత ఆక్సిజన్ అందక అలసట, నీరసంతో పాటు తిమ్మిర్లు, జలదరింపు తీవ్రతరం కావచ్చు. కొన్ని సందర్భాల్లో శరీర సమతాస్థితి తగ్గి నడిచేటప్పుడు తడబాటు లేదా కళ్లు తిరగడం వంటి లక్షణాలు కూడా కనిపించవచ్చు.
విటమిన్ బి12 ప్రధానంగా జంతు సంబంధ ఆహారాలలో చేపలు, మాంసం, గుడ్లు, పాల ఉత్పత్తులలో లభిస్తుంది. కాబట్టి పూర్తి శాఖాహారులలో దీని లోపం వచ్చే అవకాశం ఎక్కువగా ఉంటుంది. అలాగే జీర్ణాశయం లేదా పేగుల సంబంధిత సమస్యలు ఉన్నవారిలో ఆహారం నుంచి బి12 శోషణ సరిగా జరగకపోవచ్చు. వయసు పెరిగేకొద్దీ శరీరం విటమిన్ బి12ను గ్రహించే సామర్థ్యం తగ్గడం వల్ల వృద్ధుల్లోనూ ఈ సమస్య కనిపించవచ్చు.
చేతులు, కాళ్లలో తిమ్మిర్లు లేదా జలదరింపు కొనసాగితే సొంతంగా చికిత్స కాకుండా వైద్యుడిని సంప్రదించి రక్త పరీక్షల ద్వారా బి12 స్థాయిలను పరిశీలించుకోవడం మంచిది. లోపాన్ని త్వరగా గుర్తించి వైద్యుల సూచన మేరకు పోషకాహారం లేదా సప్లిమెంట్లు తీసుకుంటే సమస్యను నియంత్రించవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..