వానాకాలంలో ఇలా చేస్తే జలుబు, దగ్గు దెబ్బకు పారిపోతాయ్.. ఎవ్వరు చెప్పని ఇంటి చిట్కాలు ఇవే..
వర్షాకాలం వచ్చిందంటే ఎన్నో ఆరోగ్య సమస్యలు తలెత్తుతాయి. ప్రస్తుతం ఎక్కడ చూసినా వినిపిస్తున్న ఒకే ఒక్క మాట.. జలుబు, దగ్గు. ఉష్ణోగ్రతల్లో ఆకస్మిక మార్పులు, పెరిగిన కాలుష్యం కారణంగా ప్రతి ఇంటా ఒకరు ఈ సీజనల్ వ్యాధుల బారిన పడుతూనే ఉన్నారు. మరి ఈ సమస్యల నుండి మనల్ని మనం ఎలా కాపాడుకోవాలి? అనేది తెలుసుకుందాం..
వాతావరణ మార్పులతో ప్రస్తుతం దగ్గు, జలుబులు సర్వసాధారణం అవుతున్నాయి. ఉష్ణోగ్రతల్లో ఆకస్మికంగా వస్తున్న హెచ్చుతగ్గులు, పెరిగిన కాలుష్యం కారణంగా చాలా మంది ఈ సమస్యల బారిన పడుతున్నారు. ప్రారంభంలో తేలికపాటి దగ్గు, గొంతు నొప్పితో మొదలయ్యే ఈ లక్షణాలు, సరైన సమయంలో జాగ్రత్తలు తీసుకోకపోతే మరింత తీవ్రంగా మారే ప్రమాదం ఉంది. ఇటువంటి పరిస్థితుల్లో మందులతో పాటు మన ఇంట్లో సులభంగా దొరికే కొన్ని సహజ నివారణ పద్ధతులు అద్భుతమైన ఉపశమనాన్ని ఇస్తాయి.
అసలు వాతావరణం మారినప్పుడు జలుబు, దగ్గు ఎందుకు వస్తాయి?
వాతావరణంలో మార్పులు వచ్చినప్పుడు మన శరీరం వెంటనే సర్దుబాటు కాలేదు. దీనికి తోడు కొన్ని కారణాలు తోడవుతాయి..
వైరల్ ఇన్ఫెక్షన్లు: మారుతున్న కాలంలో వైరస్లు త్వరగా వ్యాప్తి చెందుతాయి.
ఆకస్మిక ఉష్ణోగ్రత మార్పులు: ఎండ, వాన, చలి ఒకదాని తర్వాత ఒకటి హఠాత్తుగా మారడం.
కాలుష్యం: వాతావరణంలోని ధూళి, పొగ, అలర్జీలు.
బలహీనమైన రోగనిరోధక శక్తి: శరీరంలో వ్యాధి నిరోధక శక్తి తగ్గడం, తగినంత నిద్ర, పోషణ లేకపోవడం.
ఆహారపు అలవాట్లు: చల్లని వస్తువులను విపరీతంగా తీసుకోవడం.
దగ్గు, గొంతు నొప్పి నుండి ఉపశమనానికి ప్రభావవంతమైన 6 ఇంటి చిట్కాలు..
అల్లం – తేనె: కొద్దిగా అల్లం రసంలో ఒక టీస్పూన్ తేనె కలిపి రోజుకు 2 నుండి 3 సార్లు తీసుకోవడం వల్ల దగ్గు త్వరగా తగ్గుతుంది.
పసుపు పాలు: పసుపులో యాంటీబయాటిక్ గుణాలు ఎక్కువ. అర టీస్పూన్ పసుపును గోరువెచ్చని పాలలో కలిపి రాత్రి నిద్రపోయే ముందు తాగితే మంచి ఫలితం ఉంటుంది.
తులసి – నల్ల మిరియాల కషాయం: తులసి ఆకులు, నల్ల మిరియాలతో చేసిన కషాయాన్ని తాగడం వల్ల గొంతు గరగర తగ్గి, శ్వాసనాళాలు శుభ్రపడతాయి.
ఉప్పు నీటి పుక్కిలింత: రోజుకు 2-3 సార్లు గోరువెచ్చని ఉప్పు నీటితో పుక్కిలించడం వల్ల గొంతు నొప్పి, వాపు నుండి తక్షణ ఉపశమనం లభిస్తుంది.
వేడి నీటి ఆవిరి: ముక్కు మూసుకుపోయి శ్వాస తీసుకోవడం ఇబ్బందిగా ఉన్నప్పుడు, వేడి నీటి ఆవిరిని పీల్చడం వల్ల శ్వాస సులభతరం అవుతుంది.
తేనె – నల్ల మిరియాలు: చిటికెడు నల్ల మిరియాల పొడిని ఒక టీస్పూన్ తేనెతో కలిపి నేరుగా సేవించడం వల్ల పొడి దగ్గు తగ్గుతుంది.
ఏం తినాలి? వేటిని దూరంగా ఉంచాలి?
తీసుకోవాల్సిన ఆహారం:
- నిరంతరం గోరువెచ్చని నీరు తాగాలి.
- వేడి వేడి సూప్లు, హెర్బల్ టీలు శరీరానికి శక్తినిస్తాయి.
- విటమిన్ సి అధికంగా ఉండే ఆహారాలు, కాలానుగుణ పండ్లను డైట్లో చేర్చుకోవాలి.
నివారించాల్సినవి:
- ఐస్ క్రీమ్లు, ఫ్రిజ్లో ఉంచిన చల్లని పానీయాలకు దూరంగా ఉండాలి.
- ధూమపానం అస్సలు చేయకూడదు.
- ధూళి, పొగ, కాలుష్యం ఎక్కువగా ఉన్న ప్రదేశాలకు వెళ్లకపోవడం మంచిది.
వైద్యుడిని ఎప్పుడు సంప్రదించాలి?
జలుబు, దగ్గుకు ఇంటి చిట్కాలు పనిచేసినప్పటికీ.. కింది లక్షణాలు కనిపిస్తే మాత్రం ఏమాత్రం నిర్లక్ష్యం చేయకుండా వెంటనే డాక్టర్ను సంప్రదించాలి..
- దగ్గు రెండు వారాల కంటే ఎక్కువ కాలం వేధిస్తుంటే.
- శరీర ఉష్ణోగ్రత పెరిగి తీవ్రమైన జ్వరం వస్తే.
- శ్వాస తీసుకోవడంలో తీవ్రమైన ఇబ్బంది ఎదురైతే.
- ఛాతీలో విపరీతమైన నొప్పిగా అనిపించినా.. లేదా దగ్గినప్పుడు రక్తపు చారలు పడినా.. వెంటనే వైద్య సహాయం తప్పనిసరి.
వాతావరణం మారుతున్నప్పుడు సరైన పోషకాహారం, తగినంత నిద్ర, కనీస జాగ్రత్తలు తీసుకోవడం ద్వారా మన రోగనిరోధక శక్తిని కాపాడుకోవచ్చు. ఆరోగ్యకరమైన అలవాట్లే మిమ్మల్ని సీజనల్ వ్యాధుల నుండి రక్షిస్తాయి..
(గమనిక: ఈ కథనంలో పేర్కొన్న అంశాలు కేవలం మీ అవగాహన కోసం మాత్రమే..ఆరోగ్య సమస్యలు తీవ్రంగా ఉన్నా లేదా పైన పేర్కొన్న లక్షణాలు కనిపించినా వెంటనే అర్హత కలిగిన వైద్యులను సంప్రదించి సలహా తీసుకోవడం ఉత్తమం.)